တပ်ႉသိုၵ်းတဢၢင်း TNLA ၽိုတ်ႉဢိူမ်ႈၸမ် ဝဵင်းၼမ်တူႈမႃးလၢႆလၢႆၾၢႆႇလႄႈ ၶွင်ႇသီႇသိုၵ်းမၢၼ်ႈ ၸႂ်ႉႁိူဝ်းမိၼ်တေႃႉဢဝ် လုၵ်ႈလၢင်းၼၢင်းမေး ၶၢႆႉဢွၵ်ႇတပ်ႉ/ဝဵင်းၼမ်ႉတူႈ ထိုင်တီႈတပ်ႉသိုၵ်းတဢၢင်း TNLA ၶဝ်ႈဢဝ်တီႈယူႇ ၽႅဝ်ၼႂ်းဝဵင်းၼမ်ႉတူႈ သေ သွင်ၾၢႆႇလႆႈၶဵင်ႈၶႅင် ၼႃႈသိုၵ်းတေႃႇၵၼ်ဝႆႉ ၼႆယူႇယဝ်ႉ။

မိူဝ်ႈဝၼ်းထီႉ 18/12/2023 ၼၼ်ႉ တပ်ႉသိုၵ်းတဢၢင်း TNLA တူင်ႉၼိုင်ဢိူမ်ႈၸမ်ဝဵင်းၼမ်ႉတူႈ ဢိူမ်ႈၸမ်တပ်ႉၶွင်ႇသီႇသိုၵ်းမၢၼ်ႈမႃး လၢႆၾၢႆႇလႄႈ မိူဝ်ႈၶၢဝ်းယၢမ်း ဝၢႆးဝၼ်း 15:00 မူင်းၼၼ်ႉၼိုင်ႈပွၵ်ႈ ၶၢဝ်းယၢမ်း 16:55 မူင်းၼၼ်ႉထႅင်ႈၼိုင်ႈပွၵ်ႈ ၾၢႆႇၶွင်ႇသီႇသိုၵ်းမၢၼ်ႈ ၸႂ်ႉ ႁိူဝ်းမိၼ် မႃးတေႃႉတၢင်ႇဢဝ် ၸိူဝ်းပဵၼ် လုၵ်ႈလၢင်း ၼၢင်းမေးၶဝ် တီႈတပ်ႉ ၶမယ(324) သေ ဝၢႆႇဢွၵ်ႇမိူဝ်း ၵႂႃႇ တၢင်း ၸေႈဝဵင်းလႃႈသဵဝ်ႈ ၼႆယူႇယဝ်ႉ။

ထိုင်မႃး မိူဝ်ႈၼႆႉ ဝၼ်းထီႉ 19/12/2023 ၶၢဝ်းယၢမ်း ၵၢင်ၼႂ် 7:15 မူင်းၼၼ်ႉ သၢႆသိုၵ်းတဢၢင်း TNLA ႁႅင်း ၵူၼ်းသိုၵ်း မွၵ်ႈ 80 ၵေႃႉ လုၵ်ႉၾၢႆႇႁွင်ႇဝဵင်းၼမ်ႉတူႈသေ ၶဝ်ႈတူင်ႉၼိုင် ဢဝ်တီႈယူႇထိုင် ၼႂ်းဝဵင်းၼမ်ႉတူႈ ၸိူဝ်းပွၵ်ႉမၢႆ (8) ၊ ပွၵ်ႉမၢႆ(1) ၊ ပွၵ်ႉမၢႆ(3) ၊ ပွၵ်ႉမၢႆ(5) ဢၼ်မီးၾၢႆႇႁွင်ႇ ႁွင်ႈၼမ်ႉတူႈၼၼ်ႉသေ ၶဵင်ႈၶႅင်ၼႃႈ သိုၵ်းတေႃႇၵၼ်ဝႆႉ တင်း ၶွင်ႇသီႇသိုၵ်းမၢၼ်ႈ တပ်ႉၶမယ (324) ဢၼ်ပၵ်းသဝ်းဝႆႉ ၾၢႆႇၸၢၼ်းႁွင်ႈၼမ်ႉတူႈ ဝဵင်းၼမ်ႉတူႈ ၼၼ်ႉယူႇယဝ်ႉ။

ယွၼ်ႉသွင်ၾၢႆႇ ဢိူမ်ႈၸမ် ၶဵင်ႈၶႅင်ၼႃႈသိုၵ်းတေႃႇၵၼ်ဝႆႉ ၼႂ်းဝဵင်းၼမ်ႉတူႈၼၼ်ႉသေ ၸိူဝ်းပဵၼ်ႁူင်းႁဵၼ်းသွၼ်လိၵ်ႈ လႄႈ လၢၼ်ႉၶၢႆၶူဝ်းၵုၼ်ႇ ၼႂ်းၵၢတ်ႇ ၊ ၼွၵ်ႈ ၵၢတ်ႇ ၼႂ်းၸေႈဝဵင်းၼမ်ႉတူႈၵမ်ႉၼမ် လႆႈပိၵ်ႉဢိုတ်းဝႆႉ ၊ ၵူၼ်းၵႂႃႇမႃးပႆ ၼႂ်းဝဵင်းၼမ်ႉတူႈၵေႃႈ ဢမ်ႇပေႃးမီး ၼႆယူႇယဝ်ႉ။

မိူဝ်ႈၼႆႉၶၢဝ်းယၢမ်း ၵၢင်ၼႂ် 5:00 မူင်းပၢႆၼၼ်ႉ‌ၵေႃႈ တပ်ႉသိုၵ်ႈတဢၢင်း TNLA တင်း ၶွင်ႇသီႇသိုၵ်းမၢၼ်ႈ တပ်ႉၶလယ (130) လႆႈပဵၼ်ပၢင်တိုၵ်းၵၼ်ႁၢဝ်ႈႁႅင်း တီႈ ၼႂ်း ၸေႈဝဵင်း ဝၢၼ်ႈတူင်ႈ ၾၢႆႇသိုၵ်းမၢၼ်ႈ လႆႈ ၸႂ်ႉႁိူဝ်းမိၼ်တိုၵ်း ၶဝ်ႈယိုဝ်းၸွႆႈလႄႈ တေႃႇထိုင်ယၢမ်းလဵဝ် ၶၢဝ်းယၢမ်း 16:00 မူင်းၵေႃႈ သဵင်ၵွင်ႈသဵင်မၢၵ်ႇပႆႇယဵၼ် တိုၵ်ႉပဵၼ်ပၢင်တိုၵ်း ၵၼ်ဝႆႉယူႇ ၼႆယဝ်ႉ။#shanstateprogressparty

#shanstatearmy

#SSPPInfo

#ၶွင်ႇသီႇသိုၵ်းမၢၼ်ႈ

#TNLA

#ၶဵင်ႈၶႅင်ၼႃႈသိုၵ်း