ၽွင်းလူင်ၾၢႆႇၼွၵ်ႈမိူင်း မိူင်းၶႄႇ တိုၵ်းသူၼ်း လၢတ်ႈတီႈၼႂ်းပၢင်သပ်းၸႅင်ႈၶၢဝ်ႇၵႂႃႇဝႃႈ ႁႂ်ႈလႆႈဢွၼ်ၵၼ် ႁူမ်ႈ ႁဵတ်းသၢင်ႈပၼ် ပုၼ်ႈတႃႇမိူင်းႁူမ်ႈတုမ် မျၢၼ်ႇမႃႇ တေလႆႈလွင်ႈငမ်းယဵၼ် ၼၼ်ႉၼႆယူႇယဝ်ႉ။

ၽွင်းလူင်ၾၢႆႇၼွၵ်ႈမိူင်း မိူင်းၶႄႇ လၢတ်ႈတီႈပၢင်သပ်းၸႅင်ႈၶၢဝ်ႇ မိူဝ်ႈဝၼ်းထီႉ 20/11/2023 ၼၼ်ႉဝႃႈ- ယွၼ်ႉပၢင်တိုၵ်း မိူင်းတႆးပွတ်းႁွင်ႇသေ တႃႇတေၸွႆႈထႅမ် ၵူၼ်းပၢႆႈ ၽေး လႄႈ ၵူၼ်းၼွၵ်ႈမိူင်းဢၼ်ၶမ်ဝႆႉ ဢမ်ႇၸၢင်ႈပွၵ်ႈ ၶိုၼ်းမိူင်း ၼၼ်ႉ ယူႇတီႈလူင်ပွင်ၸိုင်ႈမိူင်းၶႄႇ လႆႈၸႂ်ႉႁႅင်းၵူၼ်း ၊ ႁႅင်းငိုၼ်းတၢင်းၼမ် ႁဵတ်းသၢင်ႈၸွႆႈထႅမ်ပၼ် ၵႂႃႇယူႇ ၼႆယဝ်ႉ။

ငဝ်းလၢႆးပၢင်တိုၵ်းဢၼ်ပဵၼ်ယူႇမိူင်းတႆးပွတ်းႁွင်ႇၼၼ်ႉ ၵေႃႈ ယူႇတီႈလူင်ပွင်ၸိုင်ႈမိူင်းၶႄႇ လႆႈပၵ်းတႃ ပႂ်ႉ တူၺ်းဝႆႉ ၸမ်ၸမ်လႄႈ ၼင်ႇႁိုဝ်ပၢင်တိုၵ်းတေၵိုတ်းၵႂႃႇလႆႈ ဝႆးဝႆးၼၼ်ႉ လႆႈႁဵတ်းသၢင်ႈၸွႆႈထႅမ်ၵႂႃႇယူႇ ဝႃႈ ၼင်ႇၼႆ။

လၢတ်ႈပႃးထႅင်ႈဝႃႈ- ၶႆႈႁႂ်ႈ ၸုမ်းယိပ်းၵွင်ႈၵၢင်ႇၸၢဝ်းၶိူဝ်း တင်း ၶွင်ႇသီႇသိုၵ်းမၢၼ်ႈ ၵိုတ်းတိုၵ်းၵၼ် တၢင်းသွင် ၾၢႆႇယဝ်ႉ ႁႂ်ႈမုင်ႈႁၼ် လွင်ႈၽွၼ်းပၢင်ႈပၢႆးမၢၵ်ႈမီး ၵူၼ်းမိူင်းမိူဝ်းၼႃႈလႄႈ ၶဝ်ႈႁႃဢုပ်ႇဢူဝ်းၵၼ် ၼိူဝ်ႁၢၼ်ႉ ၽိူၼ် သေ ႁႃၶေႃႈတွပ်ႇၵႄႈလိတ်ႈပၼ်ႁႃၵႂႃႇ ၊ ၼင်ႇႁိုဝ်မိူင်းႁူမ်ႈတုမ် မျၢၼ်ႇမႃႇ တေလႆႈလွင်ႈငမ်းယဵၼ်ၼၼ်ႉ ၶႆႈတိုၵ်းသူၼ်း ႁႂ်ႈႁူမ်ႈၵၼ်ၸွႆႈထႅမ် ႁဵၼ်းသၢင်ႈၵႂႃႇယူႇ ဝႃႈၼႆ။

ယွၼ်ႉပၢင်တိုၵ်း ၸုမ်းဢူၺ်းလီ(3) ၸုမ်း တင်း ၶွင်ႇသီႇသိုၵ်းမၢၼ်ႈ ဢၼ်ပဵၼ်ယူႇ မိူင်းတႆးပွတ်းႁွင်ႇၼႆႉ သေ ၵူၼ်းမိူင်းပိုၼ်ႉတီႈ လၢႆလၢႆၸေႈဝဵင်း လႆႈဢွၼ်ၵၼ် ပၢႆႈၽေးပၢင်တိုၵ်း ႁူမ်ႈသဵင်ႈတၢင်းမူတ်း ဢမ်ႇယွမ်း (50 ,000) ၵေႃႉ ၊ ယွၼ်ႉသဵၼ်ႈတႃႈသၢႆတၢင်း လူႉလႅဝ်လႄႈ ၶူဝ်းၵုၼ်ႇ လွင်ႈၵိၼ်ယႅမ်ႉ ၼႂ်းပိုၼ်ႉတီႈ ႁႃသိုဝ်ႉယၢပ်ႇ ၊ ၵႃႈ ၶၼ်ၵုၼ်ႇ ၶိုၼ်ႈသုင်မႃး ၵူၼ်းမိူင်းပိုၼ်ႉတီႈ ထူပ်းလွင်ႈယၢပ်ႇၽိုတ်ႇ လွင်ႈၵိၼ်ယမ်ႉ ၊ လွင်ႈၵၢၼ်တူၺ်း ထိုင် ပၢႆးယူႇလီ ၸဵမ်ၸိူဝ်းၼႆႉယူႇယဝ်ႉ။

Photo-Crd:#shanstateprogressparty

#shanstatearmy

#SSPP #SSA#ပႃႇတီႇမႂ်ႇသုင်ၸိုင်ႈတႆး

#တပ်ႉသိုၵ်းၸိုင်ႈတႆး

#ၽွင်းလူင်ၾၢႆႇၼွၵ်ႈမိူင်းမိူင်းၶႄႇ

#ပၢင်သပ်းၸႅင်ႈၶၢဝ်ႇ