ၸုမ်းၾၢႆႇပၢႆးယူႇလီ(မေႃယႃ)ၼႂ်းၼႃႈတီႈ ၾၢႆႇဢုပ်ႉပိူင်ႇ ပႃႇတီႇမႂ်ႇသုင်ၸိုင်ႈတႆးတပ်ႉသိုၵ်းၸိုင်ႈတႆး SSPP/SSA ၸေႈဝဵင်းၼမ်ႉၶမ်းၼၼ်ႉ လူင်းၸွႆႈထႅမ်တူၺ်းထိုင်ပၼ် ပၢႆးယူႇလီၵူၼ်းပၢႆးၽေး ပၢင်တိုၵ်း ၼႂ်းၸေႈဝဵင်း ၼမ်ႉၶမ်း ၼႆယူႇယဝ်ႉ ။

မိူဝ်ႈဝၼ်းထီႉ20-11-2023 ၶၢဝ်းယၢမ်းၵၢင်ၼႂ် (09:00)မူင်းတေႃႇထိုင် (16:00) မူင်းယူႇတီႈၸုမ်းၾၢႆႇပၢႆးယူႇလီ (မေႃယႃ) ပႃႇတီႇမႂ်ႇသုင်ၸိုင်ႈတႆး တပ်ႉသိုၵ်းၸိုင်ႈတႆး SSPP/SSA ၼႂ်း‌ၸေႈဝဵင်းၼမ်ႉၶမ်း လႆႈလူင်းတူၺ်းထိုင် ၵူတ်ႇထတ်းပၼ်တၢင်းပဵၼ် လႄႈ ၸွႆႈယူတ်းယႃပၼ်ၵူၼ်းပဵၼ် တီႈဢွင်ႈပၢင်သဝ်းၵူၼ်းပၢႆႈၽေး ဢွင်ႈတီႈဝတ်ႉၵျွင်းမုၼ်ၸဝ်ႈဝၢၼ်ႈၵုၼ်ႁႆး ၊ ဝၢၼ်ႈၼွင်ၶမ်း လႄႈ ဝၢၼ်ႈၵုၼ် ႁႆးတႂ်ႈ ဢိူင်ႇၵုၼ်ႁႆး ၸေႈဝဵင်းမၢႆ(12) ၼမ်ႉၶမ်း ၸိုင်ႈတႆးပွတ်းႁွင်ႇ ၼၼ်ႉယူႇယဝ်ႉ ။

ပေႃႈမႄႈၵူၼ်းမိူင်း ၸိူဝ်းဢၼ်လႆႈပၢႆႈၽေးပၢင်တိုၵ်း ၼႂ်း ၸေႈဝဵင်းၼမ်ႉၶမ်း ၼႆႉ ၵမ်ႈၽွင်းၵေႃႈ လႆႈတၢင်း ၸဵပ်းမၢတ်ႇ ၸၢၵ်ႇမၢၵ်ႇတိူဝ်ႉၺႃးဝႆႉၵေႃႈမီး ၵမ်ႈၽွင်ႈမီးတၢင်းပဵၼ်ၼၢဝ် ၊ လိူတ်ႈၶိုၼ်ႈ ၊ ႁႅင်းယွမ်း ၊ တၢင်း ပဵၼ်ၵဵဝ်ႇၵပ်းတွင်ႉ ၸိူဝ်းၼႆႉ သေ ယွၼ်ႉငဝ်းလၢႆးၼႂ်းပိုၼ်ႉတီႈဢမ်ႇမီးလွင်ႈႁူမ်ႇလူမ်ႈ ၊ ၵူၼ်းပဵၼ် မီးတၢင်းယၢပ်ႇၽိုတ်ႇ ဢမ်ႇ ၸၢင်ႈၵႂႃႇယူတ်းယႃ တၢင်းပဵၼ်တီႈလႂ် လႄႈ ယူႇတီႈပႃႇတီႇမႂ်ႇသုင် ၸိုင်ႈတႆး တပ်ႉသိုၵ်းၸိုင်ႈတႆး SSPP/SSA ၸင်ႇလႆႈ ၵႂႃႇၸွႆႈယူတ်းယႃ တူၺ်းထိုင်ပၼ်လွင်ႈပၢႆးယူႇလီ ပေႃႈမႄႈၵူၼ်းမိူင်း တီႈဢွင်ႈပၢင်သဝ်းၵူၼ်းပၢႆးၽေး ပၢင်တိုၵ်းၼၼ်ႉယူႇယဝ်ႉ ။

ၵူၼ်းပၢႆႈၽေးပၢင်တိုၵ်း ၼႂ်းၸေႈဝဵင်းၼမ်ႉၶမ်း ၼႆႉ တၢင်းမူတ်းႁူမ်ႈၵၼ် မီးၸမ်(3000) ၵေႃႉသေ မႃးသွၼ်ႈသဝ်းယူႇဝႆႉတီႈ ဝတ်ႉၵျွင်းမုၼ်ၸဝ်ႈ ဝၢၼ်ႈၼွင်ၶမ်း ၊ ၵျွင်းမုၼ်ၸဝ်ႈ ဝၢၼ်ႈၵုၼ်ႁႆးတႂ်ႈ/ၼိူဝ် ၊ ၵျွင်းမုၼ်ၸဝ်ႈ ဝၢၼ်ႈ ႁူဝ်သၢႆး ၊ ၵျွင်းမုၼ်ၸဝ်ႈဝၢၼ်ႈသွၼ်း ၊ ၵျွင်းမုၼ်ၸဝ်ႈဝၢၼ်ႈဢၢႆႇတႂ်ႈ (ထုင်ႉလွႆႁူဝ်သိူဝ် ) ၸဵမ်ၸိူဝ်းၼႆႉ ယူႇယဝ်ႉ ။#shanstateprogressparty

#shanstatearmy

#SSPP #SSA

#ပႃႇတီႇမႂ်ႇသုင်ၸိုင်ႈတႆး

#တပ်ႉသိုၵ်းၸိုင်ႈတႆး

#ၸုမ်းၾၢႆႇပၢႆးယူႇလီ

#ၵူၼ်းပၢႆႈၽေးပၢင်တိုၵ်း