ၶွင်ႇသီႇသိုၵ်းမၢၼ်ႈ တင်း တပ်ႉသိုၵ်းတဢၢင်း TNLA ပဵၼ်ပၢင်တိုၵ်းၵၼ် ၼႂ်းဢိူင်ႇၼမ်ႉသိမ်ႇ ၸေႈဝဵင်းသီႇ ပေႃႉ ၾၢႆႇၶွင်ႇသီႇသိုၵ်းမၢၼ်ႈ ၸႂ်ႉမၢၵ်ႇလူင်ပိုတ်းယိုဝ်း ၸွႆႈ တီႈပဵၼ်ပၢင်တိုၵ်း မၢၵ်ႇတူၵ်းတႅၵ်ႇတိူဝ်ႉၺႃးၵူၼ်း မိူင်း လႆႈမီးလွင်ႈမၢတ်ႇၸဵပ်း (4) ၵေႃႉ လူႉသဵင်ႈသၢႆၸႂ် (1) ၵေႃႉၼႆယူႇယဝ်ႉ။

မိူဝ်ႈဝၼ်းထီႉ 22/11/2023 တေႇဢဝ်ၶၢဝ်းယၢမ်း ၵၢင်ၼႂ် 06:30 မူင်း တေႃႇပေႃးထိုင် ၵၢင်ဝၼ်း 11:45 မူင်း ၼၼ်ႉ ၶွင်ႇသီႇသိုၵ်းမၢၼ်ႈ တင်း တပ်ႉသိုၵ်းတဢၢင်း TNLA လႆႈပဵၼ်ပၢင်တိုၵ်းၵၼ် တီႈၶူဝ်လူင် ပုင်ႇၽၢၼ်း ႁိမ်းသဵၼ်ႈတၢင်းၶဝ်ႈ ဝၢၼ်ႈၼမ်ႉသိမ်ႇ ဢိူင်ႇၼမ်ႉသိမ်ႇ ၸေႈဝဵင်းသီႇပေႃႉၼၼ်ႉသေ မိူဝ်ႈၽွင်းပဵၼ်ပၢင်တိုၵ်း ၼၼ်ႉ ၾၢႆႇ ၶင်ႇသီႇသိုၵ်းမၢၼ်ႈ လုၵ်ႉတီႈတပ်ႉ ၶမယ (503) ယိုဝ်းၵွင်ႈလူင် ၵႂႃႇတူၵ်းသႂ်ႇ ၼႂ်းဝၢၼ်ႈၸၢမ်ၽိူၵ်ႇ ပွၵ်ႉမႂ်ႇ လႄႈ မၢၵ်ႇတူၵ်းတိူဝ်ႉၺႃးႁိူၼ်းၵူၼ်းဝၢၼ်ႈ (3) လင် တိူဝ်ႉၺႃးပႃးၸဝ်ႈႁိူၼ်း ဢၼ်ပဵၼ်ၸၢဝ်းၶိူဝ်း မၢၼ်ႈ လႆႈတၢင်းမၢတ်ႇၸဵပ်းၸွမ်း (4) ၵေႃႉ လူႉတၢႆထင်တီႈ (1) ၵေႃႉၼႆယူႇယဝ်ႉ။

ၵူၼ်းမိူင်း ဝၢၼ်ႈၸၢမ်ၽိူၵ်ႇ ၸိူဝ်းဢၼ် ထုၵ်ႇၺႃးၸၢၵ်ႇမၢၵ်ႇတိူဝ်ႉၺႃးသေလႆႈတၢင်းမၢတ်ႇၸဵပ်းလူႉတၢႆၼၼ်ႉ ၸိုဝ်ႈႁွင်ႉဢူးၺၢၼ်ႇထေး ဢႃႇယုမွၵ်ႈ (40) ပၢႆ ၸၢၵ်ႇမၢၵ်ႇတိူဝ်ႉၺႃး လႆႈလူႉတၢႆထင်တီႈ လိူဝ်သေၼၼ်ႉဢၼ် ပဵၼ် ဢူးမွင်ႇမွင်ႇ ၊ ဢူးဢွင်ႇတူႇ ၊ ဢူးလူႇပျုဝ်ႇ ၊ ဢူးတိၼ်ႇဢေး သႅၼ်းဢႃႇယု မွၵ်ႈ (30) တေႃႇ(30) ပၢႆ (4) ၵေႃႉၼၼ်ႉ လႆႈတၢင်းမၢတ်ႇၸဵပ်းသေ လႆႈသူင်ႇယူတ်းယႃတူဝ်ဝႆႉ တီႈႁူင်းယႃလူင်ဝဵင်းသီႇပေႃႉၼႆယူႇယဝ်ႉ။#shanstateprogressparty

#shanstatearmy

#SSPP #SSA

#ပႃႇတီႇမႂ်ႇသုင်ၸိုင်ႈတႆး

#တပ်ႉသိုၵ်းၸိုင်ႈတႆး

#ပၢင်တိုၵ်း

#TNLA

#ၶွင်ႇသီႇသိုၵ်းမၢၼ်ႈ