မိူဝ်ႈၽွင်း ၵၢၼ်သိုၵ်းၵၢၼ်မိူင်း ၼႂ်းၸိုင်ႈတႆးပွတ်းႁွင်ႇ တိုၵ်ႉသုၵ်ႉယုင်ႈပဵၼ်ပၢင်တိုၵ်း လႄႈ ပေႃႈမႄႈၵူၼ်းမိူင်း လူဝ်ႇၼႅတ်ႈဢဝ်ၼႅတ်ႈသိမ်း ၶူဝ်းၽုၵ်ႇၶူဝ်းသွမ်ႈ မၢၵ်ႇၶဝ်ႈ တဝ်ႈၼမ်ႉၼၼ်ႉ ၵေႃႉသိုၵ်းၵေႃႉႁၢၼ် ၾၢႆႇတပ်ႉၾၢႆႇဢုပ်ႉပိူင်ႇပႃႇတီႇမႂ်ႇသုင်ႇၸိုင်ႈတႆး တပ်ႉသိုၵ်းၸိုင်ႈတႆး SSPP/SSA ၸိူဝ်းဢၼ်ပၵ်းသဝ်းတူင်ႉၼိုင်ဝႆႉ ၼႂ်းၼႃႈတီႈၽႂ်မၼ်းၵေႃႈ ၼႅတ်ႈၸွႆႈထႅမ်ပေႃႈမႄႈ ၵူၼ်းမိူင်း ၼႂ်းပိုၼ်ႉတီႈ ၼႅတ်ႈဢဝ်ၼႅတ်ႈသိမ်းမၢၵ်ႇၶဝ်ႈတဝ်ႈၼမ်ႉယူႇယဝ်ႉ။
မိူဝ်ႈဝၼ်းထီႉ 13/14-11-2023 ၶၢဝ်းတၢင်း(2) ဝၼ်း ၼၼ်ႉၵေႃႉသိုၵ်းႁၢၼ် ၾၢႆႇတပ်ႉၾၢႆႇဢုပ်ႉပိူင်ႇ ပႃႇတီႇမႂ်ႇသုင်ၸိုင်ႈတႆး တပ်ႉသိုၵ်းၸိုင်ႈတႆး SSPP/SSA ႁႅင်းၵူၼ်းသိုၵ်း (12) ၵေႃႉ ၸွႆႈထႅမ် ၵၢၼ်ပေႃႈမႄႈၵူၼ်းမိူင်း ၸွႆႈပၢတ်ႇၶဝ်ႈပၼ် လုင်းသူၺ်ႇထွၼ်း + ပႃႈၶိၼ်ႇမေႇ ဝၢၼ်ႈယႃႇသဵတ်ႈ ဢိူင်ႇပၢၼ်ႉပူၺ်း ၶျႅင်း ၸေႈဝဵင်းၵျွၵ်ႉမႄးၸိုင်ႈတႆးပွတ်းႁွင်ႇ လႄႈ ႁႅင်း ၵူၼ်းသိုၵ်း (4) ၵေႃႉ လႆႈၵႂႃႇ ၸွႆႈပုမ်ႇၶဝ်ႈပၼ် လုင်းၸၢႆး + ပႃႈၶွတ်ႇ ဝၢၼ်ႈတူၼ်ႈႁုင်း ဢိူင်ႇမိူင်းပၢတ်ႇ ၸေႈဝဵင်းတၢင်ႉယၢၼ်း ၊ ႁႅင်းၵူၼ်းသိုၵ်း (17) ၵေႃႉ ၸွႆႈၵၢၼ်ႉၶဝ်ၵၢပ်ႇ ပၼ် လုင်းၸၼ်ႇတ ဝၢၼ်ႈပၢင်မူင်ႈ ဢိူင်ႇပၢင်သၢင်း ၸေႈဝဵင်းလၢႆးၶႃႈ သေ ၵေႃႉသိုၵ်း ၵေႃႉႁၢၼ် ၼႂ်းတပ်ႉႁူမ်ႇလူမ်ႈ ႁွင်ႈၵၢၼ်မၢႆ(2) ငဝ်ႈငုၼ်း ႁႅင်းၵူၼ်းသိုၵ်း (6) ၵေႃႉ လႆႈၵႂႃႇ ၸွႆႈထႅမ်ပုမ်ႇၶဝ်ႈပၼ် လုင်းဢုင်း + ပႃႈၶမ်း ဝၢၼ်ႈပၢင်ႇ လေႃႉ ဢိူင်ႇပၢင်ႇလေႃႉ ၸေႈဝဵင်း ဝဵင်းမႂ်ႇ ဝၢၼ်ႈႁႆး ၸိုင်ႈတႆးပွတ်းၸၢၼ်း ၸဵမ်ၸိူဝ်းၼႆႉ ယူႇယဝ်ႉ။
