ဢိင်ၼိူဝ်ငဝ်းလၢႆး ပၢင်တိုၵ်း ၸုမ်းဢူၺ်းလီ(3) ၸုမ်း တင်းၶွင်ႇသီႇသိုၵ်းမၢၼ်ႈ တိုၵ်းယိုဝ်းပဵၼ်ပၢင်တိုၵ်းၵၼ် ႁၢဝ်ႈ ႁႅင်း ၼႂ်းၸိုင်ႈတႆးပွတ်းႁွင်ႇ သေ ၼင်ႇႁိုဝ်ပေႃႈမႄႈၵူၼ်းမိူင်း ၸိူဝ်းဢၼ်လူဝ်ႇဢဝ် လူဝ်ႇသိမ်းမၢၵ်ႇၶဝ်ႈတဝ်ႈၼမ်ႉ ၼၼ်ႉ ပေႃးတေၼႅတ်ႈ ဢဝ်ၼႅတ်ႈသိမ်းယဝ်ႉတူဝ်ႈ ၼႆလႄႈ ယူႇတီႈၵေႃႉသိုၵ်းၵေႃႉႁၢၼ် ၾၢႆႇတပ်ႉၾၢႆႇဢုပ်ႉပိူင်ႇ ပႃႇတီႇမႂ်ႇသုင်ၸိုင်ႈတႆး တပ်ႉသိုၵ်းၸိုင်ႈတႆး SSPP/SSA ဢၼ်ပၵ်းသဝ်းတူင်ႉၼိုင် ၼႂ်းၼႃႈတီႈဢုပ်ႉပိူင်ႇ ၼႃႈမိူင်းပွတ်းႁွင်ႇ ၼၼ်ႉ လႆႈဢွၼ်ၵၼ် ၶတ်းၸႂ် ၸွႆႈၵၢၼ်ပေႃႈမႄႈၵူၼ်းမိူင်း ၼႂ်းပိုၼ်ႉတီႈယူႇယဝ်ႉ ။

တေႇဢဝ် ‌မိူဝ်ႈဝၼ်းထီႉ 28-10-2023 တေႃႇထိုင်ဝၼ်းထီႉ 06/11/2023 ၼႂ်းၶၢဝ်းယၢမ်း ၸုမ်းဢူၺ်းလီ (3) ၸုမ်း ၶိုၼ်ႈလေႃႇတိုၵ်း ၶွင်ႇသီႇသိုၵ်းမၢၼ်ႈ ၼႂ်းၸိုင်ႈတႆးပွတ်းႁွင်ႇၼၼ်ႉမႃး ၵေႃႉသိုၵ်း ၵေႃႉႁၢၼ် ၾၢႆႇတပ်ႉၾၢႆႇဢုပ်ႉပိူင်ႇ ပႃႇတီႇမႂ်ႇသုင်ၸိုင်ႈတႆး တပ်ႉသိုၵ်းၸိုင်ႈတႆး SSPP/SSA လႆႈၶတ်းၸႂ် ဢဝ်ႁူမ်ႇလူမ်ႈပၼ်ပေႃႈမႄႈၵူၼ်းမိူင်း ၸိူဝ်းလူဝ်ႇၼႅတ်ႈဢဝ် ၼႅတ်ႈသိမ်းမၢၵ်ႇၶဝ်ႈတဝ်ႈၼမ်ႉ လႄႈ ၼႅတ်ႈၶတ်းၸႂ် ၸွႆႈပၢတ်ႇၶဝ်ႈ ၊ ပုမ်ႇၶဝ်ႈ ၊ ပေႃႉၶဝ်ႈ/ၽတ်ႉၶဝ်ႈ ၊ ပိတ်းၶဝ်ႈၵၢပ်ႇ(ၶဝ်ႈၶႄႇ) ပၼ် ပေႃႈမႄႈ ၵူၼ်းမိူင်း ၼႂ်းပိုၼ်ႉတီႈ ၸေႈဝဵင်းမၢႆ(1) တၢင်ႉယၢၼ်း ၊ ၸေႈဝဵင်းမၢႆ (17) ထုင်ႉမိူင်းယဵၼ် ဝဵင်းၼမ်ႉတူႈ ၊ ၸေႈဝဵင်းမၢႆ (24) ၵျွၵ်ႉမႄး ၊ ၸေႈဝဵင်းမၢႆ (30) ထုင်ႉမိူင်းပႃး ဝဵင်းသႅၼ်ဝီ ၊ ၸေႈဝဵင်းမၢႆ(11) ထုင်ႉမိူင်းပၢတ်ႇ ၸေႈဝဵင်းတၢင်ႉယၢၼ်း ၊ ၼႂ်းဢိူင်ႇမိူင်းငေႃႉ ၸေႈဝဵင်းမၢႆ(20) ၵျွၵ်ႉမႄး ၸဵမ်ၸိူဝ်းၼႆႉယူႇယဝ်ႉ။

ဢိင်ၼိူဝ်ငဝ်းလၢႆး ၵၢၼ်မိူင်း ၵၢၼ်သိုၵ်းဢၼ်ပဵၼ်ယူႇ ၼႂ်းၼႃႈမိူင်းပွတ်းႁွင်ႇ မိူၼ်ၼင်ႇဢွင်ႈတီႈပဵၼ်ပၢင်တိုၵ်း ႁၢဝ်ႈႁႅင်း ထိုင်တီႈ ပေႃႈမႄႈၵူၼ်းမိူင်း လႆႈၸုၼ်ႉပွႆႇပႅတ်ႈ ႁိူၼ်းယေး ၶူဝ်းၽုၵ်ႇသွမ်ႈ ၵူႈလွင်ႈလွင်ႈသေ လႆႈပၢႆႈ ၽေးဢဝ်တူဝ်လွတ်ႈဝႆႉၵေႃႈမီး ၊ တီႈဢၼ်ပၢင်တိုၵ်းပႆႇႁၢဝ်ႈႁႅင်း လႄႈ ပေႃႈမႄႈၵူၼ်းမိူင်း လူဝ်ႇၼႅတ်ႈဢဝ်ၼႅတ်ႈသိမ်း မၢၵ်ႇၶဝ်ႈတဝ်ႈၼမ်ႉၼၼ်ႉၵေႃႈ ယူႇတီႈ ၵေႃႉသိုၵ်းၵေႃႉႁၢၼ် ပႃႇတီႇမႂ်ႇသုင်ၸိုင်ႈတႆး တပ်ႉသိုၵ်းၸိုင်ႈတႆး SSPP/SSA ၼႅတ်ႈၶတ်းၸႂ် ၸွႆႈဢဝ်ႁူမ်ႇလူမ်ႈ ၊ ၸွႆႈႁဵတ်း ၵၢၼ်သိမ်းမၢၵ်ႇၶဝ်ႈတဝ်ႈၼမ်ႉပၼ်ပေႃႈမႄႈ ၵူၼ်းမိူင်း သေဢမ်ႇၵႃး တႃႇဝၢၼ်ႈမိူင်းတေမီးလွင်ႈၼိမ်သဝ်းမႃး တႃႇတေၸွႆႈထႅမ်တူၺ်းထိုင် ပေႃႈမႄႈၵူၼ်း မိူင်းၸိူဝ်းလႆႈပၢႆႈၽေး ‌ထူပ်းလွင်ႈယၢပ်ႇၽိုတ်ႇၸဵမ်ၸိူဝ်းၼႆႉ ပႃႇတီႇမႂ်ႇသုင်ၸိုင်ႈတႆးတပ်ႉသိုၵ်းၸိုင်ႈတႆး SSPP/SSA တိုၵ်ႉသိုပ်ႇ ၶတ်းၸႂ် ႁႃလၢႆးတၢင်း ၸွႆႈထႅမ်ၵႂႃႇ ယူႇယဝ်ႉ။#shanstateprogressparty

#shanstatearmy

#SSPP

#SSA#ပႃႇတီႇမႂ်ႇသုင်ၸိုင်ႈတႆး

#တပ်ႉသိုၵ်းၸိုင်ႈတႆး

#ၸွႆႈၵၢၼ်ပေႃႈမႄႈၵူၼ်းမိူင်း