မုၵ်ႉၸုမ်း ၵူၼ်းၼုမ်ႇ ငဝ်ႈငုၼ်း ပႃႇတီႇမႂ်ႇသုင်ၸိုင်ႈတႆး တပ်ႉသိုၵ်းၸိုင်ႈတႆး SSPP/SSA ၸွႆႈထႅမ် ၶဝ်ႈသၢၼ်/ၶိူင်ႈၵိၼ်ယမ်ႉလႄႈ ငိုၼ်း တီႈ‌ပေႃႈမႄႈၵူၼ်းမိူင်း ၸိူဝ်းပၢႆႈ ၽေးပၢင်တိုၵ်း ၼႂ်းၸေႈဝဵင်းၼမ်ႉၶမ်း ၸိုင်ႈတႆးပွတ်းႁွင်ႇ ။

မိူဝ်ႈဝၼ်းထီႉ 15 /11/2023 ၼၼ်ႉ ယူႇတီႈငဝ်ႈငုၼ်း ပႃႇတီႇမႂ်ႇသုင်ၸိုင်ႈတႆးတပ်ႉသိုၵ်းၸိုင်ႈတႆး SSPP/SSA လႆႈ ၵႂႃႇၸွႆႈထႅမ် ၶဝ်ႈသၢၼ်/ငိုၼ်း /ၶိူင်ႈၵိၼ်ယမ်ႉ တႃႇ ၵူၼ်းပၢႆႈၽေးပၢင်တိုၵ်း (2878) ၵေႃႉ ဢၼ်မႃးသွၼ်ႈသဝ်းယူႇဝႆႉတီႈဝတ်ႉၵျွင်း ဝၢၼ်ႈၵုၼ်ႁႆး ၊ ဝတ်ႉ ၵျွင်း ဝၢၼ်ႈသွၼ်း ၊ ဝတ်ႉၵျွင်း ဝၢၼ်ႈၼွင်ၶမ်း ၊ဝတ်ႉၵျွင်း ဝၢၼ်ႈၵုၼ်တႂ်ႈ ၊ဝတ်ႉၵျွင်း ဝၢၼ်ႈႁူဝ်သၢႆး ၊ဝတ်ႉၵျွင်း ဝၢၼ်ႈဢၢႆႇတႂ်ႈ ၼႂ်း ၸေႈဝဵင်းၼမ်ႉၶမ်း ၼႆႉယူႇယဝ်ႉ။

ၶိူင်ႈၶူဝ်းဢၼ် မုၵ်ႉၸုမ်း ၵူၼ်းၼုမ်ႇငဝ်ႈငုၼ်း SSPP/SSA လႆႈၸွႆႈထႅမ်ၵႂႃႇၼၼ်ႉ ၶဝ်ႈသၢၼ် (100) ထူင် ၊ ငိုၼ်း (5,000,000) ႁႃႈသိပ်းသႅၼ်ၵျၢပ်ႈ လႄႈ ၶိူင်ႈၵိၼ်ယမ်ႉ လၢႆလၢႆလွင်ႈ ၸဵမ်ၸိူဝ်းၼႆႉယူႇယဝ်ႉ။

ၵူၼ်းပၢႆႈၽေးပၢင်တိုၵ်းၼႂ်းၸေႈဝဵင်းၼမ်ႉၶမ်းၼႆႉ လိူဝ်သေဢၼ်မႃးသွၼ်ႈသဝ်းဝႆႉ တီႈဝတ်ႉၵျွင်းမုၼ်ၸဝ်ႈယဝ်ႉ ဢၼ်ပၢႆႈၵႂႃႇယူႇဝႆႉၸွမ််း ႁိူၼ်းပီႈၼွင်ႉၽႂ်မၼ်း ၵေႃႈ တိုၵ်ႉမီးထႅင်ႈတၢင်းၼမ် ပေႃးမႃးႁူမ်ႈၵၼ် တၢင်းသဵင်ႈ ႁူဝ်ၼပ်ႉၵူၼ်းပၢႆႈၽေး ဢမ်ႇယွမ်း (4000) ၵေႃႉ ၼႆ ယူႇယဝ်ႉ။

ယူႇတီႈ ပႃႇတီႇမႂ်ႇသုင်ၸိုင်ႈတႆး တပ်ႉသိုၵ်းၸိုင်ႈတႆး SSPP/SSA သေ လႆႈၸွႆႈထႅမ်ၵူၼ်းပၢႆႈၽေးပၢင်တိုၵ်း ၼႂ်း ၸေႈဝဵင်းၼမ်ႉၶမ်း ၊ ၸေႈဝဵင်းလႃႈသဵဝ်ႈ ၊ ၸေႈဝဵင်းသႅၼ်ဝီ ဢၼ်ပဵၼ်ၼႂ်း ၼႃႈတီႈဢုပ်ႉပိူင်ႇ SSPP ၸေႈတွၼ်ႈ မၢႆ(9) ၸေႈတွၼ်ႈမၢႆ(10) တေႇၸဵမ်မိူဝ်ႈ ဝၼ်းထီႉ 3/11/2023 တေႃႇပေႃးထိုင် ဝၼ်းထီႉ 15/11/2023 ၼႆႉ ႁူမ်ႈၵၼ်တၢင်းသဵင်ႈ တူၵ်းမႅၼ်ႈသၢင်ႉငိုၼ်း (81,444,500 ) ပႅတ်ႇပၢၵ်ႇ သိပ်းသီႇသႅၼ် သီႇမိုၼ်ႇ သီႇႁဵင်ႁႃႈပၢၵ်ႇၵျၢပ်ႈ လႄႈ ၵႃႈၼင်ႇပွင်ပဵၼ်လႆႈ ၼၼ်ႉ မိူဝ်း ၼႃႈမႃးၵေႃႈ ယူႇတီႈပႃႇတီႇမႂ်ႇသုင်ၸိုင်ႈတႆးတပ်ႉသိုၵ်း ၸိုင်ႈတႆး SSPP/SSA တေသိုပ်ႇ ၶတ်းၸႂ် ၸွႆႈထႅမ်ၵႂႃႇ ယူႇယဝ်ႉ။

#shanstateprogressparty

#shanstatearmy

#SSPP

#SSA#ပႃႇတီႇမႂ်ႇသုင်ၸိုင်ႈတႆး

#တပ်ႉသိုၵ်းၸိုင်ႈတႆး

#ၸွႆႈထႅမ်ၵူၼ်းပၢႆႈၽေး