တပ်ႉသိုၵ်းတဢၢင်း TNLA ႁူမ်ႈ PDF ၶွၼ်ႈႁႅင်းၵၼ် ၶိုၼ်ႈလေႃႇတိုၵ်းတပ်ႉသိုၵ်းမၢၼ်ႈ တီႈတပ်ႉ ၶမယ(501) ၸေႈဝဵင်းၵျွၵ်ႉမႄး လႄႈ သွင်ၾၢႆႇလႆႈပဵၼ်ပၢင်တိုၵ်းၵၼ်ဝႆႉယူႇယဝ်ႉ။မိူဝ်ႈၼႆႉ ဝၼ်းထီႉ 29/11/2023 ၶၢဝ်းယၢမ်းၵၢင်ၼႂ် 09:30 မူင်း ၼႆႉ တပ်ႉသိုၵ်းတဢၢင်း TNLA ႁူမ်ႈ PDF ႁႅင်း ၵူၼ်းမွၵ်ႈ (80) ၵေႃႉ ၶိုၼ်ႈလေႃႇတိုၵ်း တပ်ႉသိုၵ်း ၶွင်ႇသီႇသိုၵ်းမၢၼ်ႈ တီႈတပ်ႉ ၶမယ (501) တီႈလွႆၸဝ်ႈၶုၼ် ၸေႈဝဵင်း ၵျွၵ်ႉမႄး ၸိုင်ႈတႆးပွတ်းႁွင်ႇသေ မိူဝ်ႈၶၢဝ်းယၢမ်း ၵၢင်ၼႂ် 10 မူင်းၼၼ်ႉ တပ်ႉသိုၵ်းတဢၢင်း TNLA ႁူမ်ႈ PDF ၶိုၼ်းထွႆဢွၵ်ႇ တီႈဢၼ်ပဵၼ်ပၢင်တိုၵ်းၼၼ်ႉ လႄႈ သဵင်ၵွင်ႈသဵင်မၢၵ်ႇၸင်ႇၶိုၼ်းယဵၼ်ၵႂႃႇၼႆယူႇ ယဝ်ႉ။

ယွၼ်ႉတပ်ႉသိုၵ်းတဢၢင်း TNLA ႁူမ်ႈ PDF တင်း ၶွင်ႇသီႇသိုၵ်းမၢၼ်ႈ ၵႆႉၵႆႉပဵၼ်ပၢင်တိုၵ်းၵၼ် ၼႂ်းၸေႈဝဵင်း ၵျွၵ်ႉမႄး သေ ႁဵတ်းႁႂ်ႈမၢၵ်ႇလူင် တူၵ်းတိူဝ်ႉၺႃး ႁိူၼ်း ၵူၼ်းမိူင်း လႆႈလူႉၵွႆ ၊ ၵူၼ်းမိူင်းပိုၼ်ႉတီႈ (400) ၵေႃႉပၢႆ လႄႈ သၢင်ႇၶႃႇၸဝ်ႈ (93) ပႃး လႆႈဢွၼ်ၵၼ် ငိူင်ႉပၢႆႈ ၽေးပၢင်တိုၵ်း ၵႂႃႇသွၼ်ႈသဝ်းဝႆႉၸွမ်းဝတ်ႉၵျွင်း ဝၢၼ်ႈ ၶိူဝ်းၼိမ်း ၊ ဝတ်ႉၵျွင်း ဝၢၼ်ႈၽီတိုတ်ႉ ၊ ဝတ်ႉၵျွင်းဝၢၼ်ႈလုၵ်းပႃ ၊ ဝတ်ႉၵျွင်းဝၢၼ်ႈၵုင်းၺွင်ႇ ၸဵမ်ၸိူဝ်းၼႆႉ ယူႇ ယဝ်ႉ။

Photo- Crd:#shanstateprogressparty

#shanstatearmy #SSPP

#SSA#ပၢင်တိုၵ်း

#TNLA

#PDF#ၶွင်ႇသီႇသိုၵ်းမၢၼ်ႈ