ယွၼ်ႉၽူၼ်လူင်တူၵ်းႁႅင်း ၼႂ်းပိုၼ်ႈတီႉ မိူင်းတႆးပွတ်းႁွင်ႇ လႄႈ ႁဵတ်းႁႂ်ႈၼမ်ႉၼွင်းလူၵ်ႈထူမ်ႈ သူၼ်တိူၵ်ႇႁႆႊလွၵ်း ၼႃး ၵူၼ်းမိူင်း ႁိူၼ်းၵူၼ်းမိူင်းပိုၼ်ႉတီႈ လူႉၵွႆလူႉသုမ်း တင်းၼမ် ႁဵတ်းႁႂ်ႈမီးၵူၼ်း လူႉတၢႆပႃးၸွမ်း။

မိူဝ်ႈဝႃး ဝၼ်းထီႉ 12/10/2023 ၼၼ်ႉ ၽူၼ်လူင်တူၵ်းႁႅင်း လႄႈ ၼမ်ႉႁူၺ်ႈၼမ်ႉလွႆၼွင်းႁႅင်း ၼမ်ႉယိုင်ႈၶိုၼ်ႈႁႅင်းလူၵ်ႈၼွင်း ၼႂ်းဝၢၼ်ႈၼႂ်းသူၼ်၊ ပႃးၸဵမ်ႁိူၼ်း ၵူၼ်းမိူင်းပိုၼ်ႉတီႈ လႆႈလူႉၵွႆတင်းၼမ်၊ မိူၼ်ၼင်ႇ ထုင်ႉမိူင်းယဵၼ် ၸေႈဝဵင်းၼမ်ႉတူႈ ၊ ဝဵင်းသီႇပေႃႉၸိူဝ်းၼႆႉ ၵူၼ်းမိူင်းဢမ်ႇၸၢင်ႈၵႂႃႇမႃး ၵူၺ်းဢမ်ႇၵႃး ႁဵတ်းႁႂ်ႈမီးလိၼ် ၵူၼ်ႇလိၼ်ပင်း တဵင်သႂ်ႇ ၵူၼ်းမိူင်း ဝၢၼ်ႈၼႃးၵႅင်း ဢိူင်ႇ ၼမ်ႉပၢႆႇ ၸေႈဝဵင်းၼမ်ႉတူႈ မီးလွင်ႈလူႉတၢႆ ၼိုင်ႈၵေႃႉ မၢတ်ႇၸဵပ်း 2 ၵေႃႉ ၊ ၵူၼ်း ဢၼ်မၢတ်ႇၸဵပ်းႁၢဝ်ႈႁႅင်း 2 ၵေႃႉၼၼ်ႉ တိုၵ်ႉသူင်ႇယူတ်းယႃတူဝ်ဝႆႉ တီႈႁူင်းယႃလူင်ဝဵင်းသီႇပေႃႉ ယူႇယဝ်ႉ။

ၵူၼ်းမိူင်းပိုၼ်ႉတီႈ မိူင်းယဵၼ်ၵေႃႉၼိုင်ႈလၢတ်ႈၼႄသိုဝ်ႇၶၢဝ်ႇႁဝ်းၶႃႈဝႃႈ – “မိူဝ်ႈၼႆႉၽူၼ်တူၵ်းႁႅင်း ၼႃႇ ၼမ်ႉ ၼွင်းယိုင်ႈၶိုၼ်ႈဝႆးႁႅင်း လႄႈ ၶူဝ်ၶၢမ်ႈၼမ်ႉ ၊ တူင်ႈ ၼႃး ႁိူၼ်းယေးၼႂ်းဝၢၼ်ႈ ၸိူဝ်းၼႆႉ ၺႃးၼမ်ႉလူၵ်ႈၵႂႃႇမူတ်း ၊ ၶဝ်ႈၼႂ်းၼႃး ၊ သူၼ်မၢၵ်ႇၸွၵ်းၵေႃႈ ထုၵ်ႇၼမ်ႉလူၵ်ႈၵႂႃႇမူတ်းယဝ်ႉၶႃႈ ၊ လိူဝ်ၼၼ်ႉၵေႃႈ ႁိူၼ်းယေး ၵူၼ်းမိူင်းၼႆႉ ၺႃးၼမ်ႉထူမ်ႈတႄႉထူမ်ႈဝႃႈ လူႉသုမ်ႉတႄႉၶႃႈဢေႃႈပီႊ ၼႆႉ ၵူႈပီႊၼႆႉ ၼမ်ႉဢမ်ႇတွၼ်ႉၶိုၼ်ႈတၼ်ႇၼႆႉသေပွၵ်ႈ ၶႃႈ။ ဢၼ်လီမႆႈၸႂ်တေႉ ၽၢႆ (သႄႇမျွင်း) တီႈမိူင်းယဵၼ် ၼႆႉဢေႃႈ ပေႃးၽၢႆၼႆႉ ၵွႆတေႉ ဝၢၼ်ႈႁိမ်းႁွမ်း မွၵ်ႈ 3 ဝၢၼ်ႈ ၼႂ်းမိူင်းယဵၼ်ၼႆႉထႅင်ႈ 4 ပွၵ်ႉတေၺႃးၽေးၼမ်ႉထူမ်ႈမူတ်းယဝ်ႉၶႃႈ မိူဝ်ႈလဵဝ်ၼမ်ႉၼႆႉ ၼမ်ႉလူၼ်ႉၽၢႆဝႆႉယဝ်ႉၶႃႈ” ဝႃႈၼႆ။

လိူဝ်သေၼၼ်ႉ မိူၼ်ၼင်ႇ ၸွမ်းဝၢၼ်ႈပၢင်ဝူဝ်း ၊ ဝၢၼ်ႈ ၼမ်ႉမႅင်းသေႃႉ ဢိူင်ႇသၢႆးၶၢဝ် ၸေႈဝဵင်းၼမ်ႉ တူႈၼႆႉ ၵေႃႈ ယွၼ်ႉႁွင်ႈၼမ်ႉဢွၼ်ႇ ၼမ်ႉႁၢတ်ႇဢူႈ ၼွင်းၶိုၼ်ႈလႄႈ ထူမ်ႈၺႃး ႁိူၼ်း ၊ သူၼ် ၊ ၼႃး ၵူၼ်းမိူင်း ၸဵမ်ၸိူဝ်းၼႆႉသေ မိူၼ်ၼင်ႇ ၼႂ်းဝၢၼ်ႈပဵင်းလူင် ဢိူင်ႇၼႃးၵႄး ၵေႃႈ ယွၼ်ႉၼမ်ႉမီႇ ၵိုင်ႉ ၵၢင်ႉ ၼွင်းၶိုၼ်ႈထူမ်ႈပႃးႁိူၼ်း ၵူၼ်းဝၢၼ်ႈ သူၼ်ႁႆႊ ၊ ၼႃး ၸဵမ်ၸိူဝ်းၼႆႉ ၼႆယူႇယဝ်ႉ။ ၵူၼ်းမိူင်းၼမ်ႉတူႈ လၢတ်ႈဝႃႈ – ၼမ်ႉထူမ်ႈဝႆးႁႅင်းၼႃႇၶႃႈ တီႈဝၢၼ်ႈၼႃးၵႅင်းၼၼ်ႉ ၵူၼ်းႁိူၼ်းၶဝ် 3 ၵေႃႉ ၺႃးလိၼ်ၵူၼ်ႇမႃးၸွမ်းၼမ်ႉၼွင်း လႄႈ လႆႈလူႉတၢႆပႅတ်ႈၼိုင်ႈၵေႃႉ မၢတ်ႇၸဵပ်း 2 ၵေႃႉၶႃႈ ဢေႃႈ ၊ သမ်ႉပဵၼ်ၵူၼ်း ဢႃႇယူႉယႂ်ႇ လႄႈ ဢမ်ႇတၼ်းႁူႉတူဝ်ႁိုဝ်ၵေႃႈဢမ်ႇယဝ်ႉၶႃႈ လိူဝ်သေၼၼ်ႉ ႁိူၼ်းယေးၸိူဝ်းဢၼ်ၸမ်ၽင်ႇၼမ်ႉတႄႉ ထူမ်ႈၼမ်ဢေႃႈ ၼမ်ႉၶိုၼ်ႈထူမ်ႈပေႃး ဢမ်ႇၸၢင်ႈၵႂႃႇ မႃးၶႃႈယဝ်ႉ၊ ပၢႆသလိူဝ်ပဵၼ်ၶၢဝ်း ၸမ်လူဝ်ႇ ဢဝ်မၢၵ်ႇၶဝ်ႈတဝ်ႈၼမ်ႉ ဢၼ်ဢွၵ်ႇၼႂ်းသူၼ် ၸိူဝ်းၼႆႉ ၶႃႈယဝ်ႉ ဝႃႈၼႆ။

တၢင်းပိုၼ်ႉတီႈ မိူင်းတႆးပွတ်းႁွင်ႇၼႆႉ ၽူၼ်းတူၵ်းႁႅင်း (4) ဝၼ်း ထပ်းၵၼ် ႁဵတ်းႁႂ်ႈၼမ်ႉၶိုၼ်ႈဝႆး သူၼ် မၢၵ်ႇ သူၼ် ၼႃး ၊ ႁိူၼ်းယေးၵူၼ်းမိူင်း ထုၵ်ႇၼမ်ႉထူမ်ႈ ၼပ်ႉႁူဝ်ပၢၵ်ႇ ႁဵတ်းႁႂ်ႈၵူၼ်းမိူင်းပိုၼ်ႉတီႈ မီး လွင်ႈယၢပ်ႇၽိုတ်ႇ ၽေးသၽႃႇဝ ၼမ်ႉလူၵ်ႈၼမ်ႉၼွင်း ပွၵ်ႈၵမ်းၼႆႉတႄႉတႄႉ၊ ၵဵဝ်ႇလူၺ်ႈ ၵူၼ်းမိူင်း ထူပ်းၽေး ၼႂ်းပွၵ်ႈၵမ်းၼႆႉ ယူႇတီႈငဝ်ႈငုၼ်းပႃႇတီႇမႂ်ႇသုင်ၸိုင်ႈတႆး တပ်ႉသိုၵ်းၸိုင်ႈတႆး လႆႈၸီႉသင်ႇ ၽၢႆႇဢုပ်ႉပိူင်ႇၵူႈတီႈတီႈ ႁႂ်ႈမီးလွင်ႈတူၺ်းထိုင် ၸွႆႈထႅမ်ၵူၼ်းမိူင်းၸိူဝ်းထူပ်းၽေး သၽႃႇဝ ၼမ်ႉထူမ်ႈ ၼမ်ႉလူၵ်ႈ လႄႈ ၵဵပ်းသဵၼ်ႈမၢႆ လွင်ႈလူႉသုမ်းၵူၼ်းမိူင်းၵူႈတီႈတီႈ သူင်ႇထိုင်ငဝ်ႈငုၼ်း SSPP/SSA ၵႂႃႇ ၼႆယူႇယဝ်ႉ။

#shanstateprogressparty

#shanstatearmy

#SSPP #SSA

#ပႃႇတီႇမႂ်ႇသုင်ၸိုင်ႈတႆး

#တပ်ႉသိုၵ်းၸိုင်ႈတႆး

#ၽေးသၽႃႇဝ

#ၼမ်ႉၼွင်း