ၸုမ်းဢူၺ်းလီပွတ်းႁွင်ႇ (3) ၸုမ်း ၶိုၼ်ႈလေႃႇတိုၵ်းတပ်ႉပၵ်းသဝ်း ၶွင်ႇသီႇသိုၵ်းမၢၼ်ႈ ႁိမ်းဝၢၼ်ႈၼမ်ႉႁႆး ဢိူင်ႇမိူင်းမေႃႇ ၸေႈဝဵင်းဝၢၼ်ႈတူင်ႈ လႄႈ တပ်ႉ ၶလယ ဝဵင်းသႅၼ်ႈဝီ ၸိုင်ႈတႆးပွတ်းႁွင်ႇ ၊ ၾၢႆႇၶွင်ႇသီႇသိုၵ်းမၢၼ်ႈ လႆႈၸႂ်ႉႁိူဝ်းမိၼ် ၶဝ်ႈပွႆႇမၢၵ်ႇတိုၵ်းၸွႆႈပႃး တၢင်းသွင်တီႈ ၼႆယူႇယဝ်ႉ။

မိူဝ်ႈၼႆႉ ဝၼ်းထီႉ 29/10/2023 ၶၢဝ်းယၢမ်းၵၢင်ၼႂ် 6 : 00 မူင်းၼၼ်ႉ ၸုမ်းဢူၺ်းလီပွတ်းႁွင်ႇ (3) ၸုမ်း ဢၼ်ပႃး တပ်ႉသိုၵ်းၵဝ်ႈၵၢင်ႉ MNDAA ၊ တပ်ႉသိုၵ်းပူတ်းပွႆႇၸိူဝ်ႉ ၸၢတ်ႈတဢၢင်း TNLA ၊ တပ်ႉသိုၵ်းရၶႅင်ႇ AA ႁူမ်ႈ PDF ၶဝ် ႁူမ်ႈႁႅင်းၵၼ် ၶဝ်ႈလူမ်ႇယိုဝ်း တပ်ႉပၵ်းသဝ်း ၾၢႆႇၶွင်ႇသီႇသိုၵ်းမၢၼ်ႈ ဢၼ်မီးဝႆႉတီႈ ႁူဝ်ဝၢၼ်ႈ ဝၢၼ်ႈ ၼမ်ႉႁႆး ဢိူင်ႇမိူင်းမေႃႇ ၸေႈဝဵင်းဝၢၼ်ႈတူင်ႈ လႄႈ တပ်ႉ ၶလယ (16) ၼႂ်းၸေႈဝဵင်းသႅၼ်ႈဝီ ၼၼ်ႉသေ သွင်ၾၢႆႇလႆႈပဵၼ်ပၢင်တိုၵ်းၵၼ်ႁၢဝ်ႈႁႅင်း တေႃႇထိုင် ယၢမ်းၵၢင်ဝၼ်း 12 :00 မူင်း သဵင်ၵွင်ႈသဵင်မၢၵ်ႇပႆႇယဵၼ် ၊ တီႈၼႂ်းပၢင်တိုၵ်း ၼၼ်ႉ ႁိူဝ်းမိၼ်တိုၵ်း ၶွင်ႇသီႇသိုၵ်းမၢၼ်ႈသွင်လမ်း မႃးပွႆႇမၢၵ်ႇတိုၵ်းယိုဝ်းၸွႆႈ တီႈဢၼ်ပဵၼ်ပၢင်တိုၵ်းၵၼ် ၼၼ်ႉ ၼႆယူႇယဝ်ႉ။

ၸုမ်းဢူၺ်းလီပွတ်းႁွင်ႇ (3) ၸုမ်း မိူၼ်ၼင်ႇ တပ်ႉသိုၵ်းၵဝ်ႈၵၢင်ႉ MNDAA ၊ တပ်ႉသိုၵ်းပူတ်းပွႆႇၸိူဝ်ႉၸၢတ်ႈတဢၢင်း TNLA ၊ တပ်သိုၵ်းရၶႅင်ႇ AA ႁူမ်ႈ ၸုမ်း PDF တင်း ၶွင်ႇသီႇသိုၵ်းမၢၼ်ႈတေႇပဵၼ်ပၢင်တိုၵ်းၵၼ်မႃး ၼႆႉ ၸဵမ်မိူဝ်ႈ ဝၼ်းထီႉ 26/10/2023 တေႃႇပေႃးထိုင်မိူဝ်ႈၼႆႉ ဝၼ်းထီႉ 29/10/2023 ၶၢဝ်းတၢင်း 4 ဝၼ်းထပ်းၵၼ်သေ လႆႈပဵၼ် ပၢင်တိုၵ်းၵၼ် ၼႂ်းၸေႈဝဵင်း သႅၼ်ႈဝီ ၊ ၸေႈဝဵင်းလႃႈသဵဝ်ႈ ၊ ၸေႈဝဵင်း လၢဝ်ႇၵၢႆႇ ၊ ၸေႈဝဵင်းမူႇၸေႈ ၊ ၸေႈဝဵင်းၼမ်ႉၶမ်း ၊ ၸေႈဝဵင်းၵုၼ်လူင် ၊ ၸေႈဝဵင်းဝၢၼ်ႈတူင်ႈ ၊ ၸေႈဝဵင်းၼွင်ၶဵဝ် ၸဵမ်ၸိူဝ်းၼႆႉသေ ဢွင်ႈတီႈၵမ်ႈပႃႈၼမ် ပဵၼ်ၸုမ်းဢူၺ်းလီပွတ်းႁွင်ႇ (3) ၸုမ်း ႁူမ်ႈ PDF ၶဝ်ႈလူမ်ႇတိုၵ်း တပ်ႉပၵ်း သဝ်း ၶွင်ႇသီႇသိုၵ်းမၢၼ်ႈ ယူႇယဝ်ႉ။

တေႃႇထိုင်ၶၢဝ်းယၢမ်း မိူဝ်ႈလဵဝ် ၵၢင်ဝၼ်း 12:00 မူင်း ၼႆႉၵေႃႈ တီႈတပ်ႉၶွင်ႇသီႇသိုၵ်းမၢၼ်ႈ ၶလယ (16) သႅၼ်ႈဝီၼၼ်ႉ တိုၵ်ႉသိုပ်ႇပဵၼ်ပၢင်တိုၵ်းၵၼ်ဝႆႉသေ ၾၢႆႇၶွင်ႇသီႇသိုၵ်းမၢၼ်ႈ ၸႂ်ႉႁိူဝ်းမိၼ် (jet) ၼိုင်ႈလမ်း ပွႆႇမၢၵ်ႇတိုၵ်းယိုဝ်းၸွႆႈယူႇၼႆယဝ်ႉ။

Photo-Credit

#shanstateprogressparty

#shanstatearmy #SSPP #SSA

#ပႃႇတီႇမႂ်ႇသုင်ၸိုင်ႈတႆး

#တပ်ႉသိုၵ်းၸိုင်ႈတႆး

#ပၢင်တိုၵ်း#ၸုမ်းဢူၺ်းလီ

#ၶွင်ႇသီႇသိုၵ်းမၢၼ်ႈ