ၾၢႆႇၶွင်ႇသီႇသိုၵ်းမၢၼ်ႈ ၸႂ်ႉႁိူဝ်းမိၼ်တိုၵ်း (Jet Fighter) ၼိုင်ႈလမ်းသေ ပွႆႇမၢၵ်ႇသႂ်ႇ တပ်ႉပၢင်သဝ်းၸူဝ်ႈၶၢဝ်း သိုၵ်းၶၢင် KIA ဢၼ်မီးၼႂ်းဢိူင်ႇတီးမ ၸေႈဝဵင်းမူႇၸေႈ ၸိုင်ႈတႆးပွတ်းႁွင်ႇ ၼၼ်ႉယူႇယဝ်ႉ။

မိူဝ်ႈၼႆႉဝၼ်းထီႉ 20/10/2023 ၶၢဝ်းယၢမ်း ဝၢႆးဝၼ်း 2:25 မူင်းၼၼ်ႉ ၾၢႆႇၶွင်ႇသီႇသိုၵ်းမၢၼ်ႈ ၸႂ်ႉႁိူဝ်းမိၼ် တိုၵ်း (Jet Fighter) ၼိုင်ႈလမ်းသေ ပွႆႇမၢၵ်ႇသႂ်ႇ တပ်ႉပၢင်သဝ်းၸူဝ်ႈၶၢဝ်း တပ်ႉသိုၵ်းလွတ်ႈလႅဝ်းသဝ်းၶေႃၶၢင် KIA တီႈလွႆၼွင်ၶဵဝ် ဢၼ်မီးၾၢႆႇၸဵင်ႇႁွင်ႇဝၼ်းဢွၵ်ႇဝၢၼ်ႈတီးမ ယၢၼ်ၵႆဝၢၼ်ႈတီးမ မွၵ်ႈ (4) လၵ်း ၼႂ်းဢိူင်ႇတီးမ ၸေႈဝဵင်းမူႇၸေႈ ၸိုင်ႈတႆးပွတ်းႁွင်ႇ ၊ လွင်ႈလူႉတၢႆမၢတ်ႇၸဵပ်း မီးဢမ်ႇမီးတေႉ ပႆႇလႆႈႁူႉၸွမ်း ၼႆယဝ်ႉ။

ၵဵဝ်ႇလူၺ်ႈလွင်ႈၼႆႉသေ ၵူၼ်းမိူင်းပိုၼ်ႉတီႈၵေႃႉၼိုင်ႈ လၢတ်ႈၼႄဝႃႈ- ” ၸႂ်ႈၶႃႈဢေႃႈ ႁိူဝ်းမိၼ် မႃးယိုဝ်းတပ်ႉသိုၵ်းၶၢင် ဢၼ်မီးၾၢႆႇဢွၵ်ႇဝၢၼ်ႈတီးမၼႆႉဢေႃႈ ႁိူဝ်းမိၼ်တေႉလမ်းလဵဝ်ၵူၺ်း မႃးယိုဝ်းမွၵ်ႈသွင်လုၵ်ႈသေ ၶိုၼ်းပၼ်ႇၵႂႃႇပၼ်ႇမႃး ယူႇယူႇမႃးယိုဝ်း ႁဵတ်း ၼၼ် ဢေႃႈ တေႃႇပေႃးထိုင်ယၢမ်းဝၢႆးဝၼ်း 2:50 ၼႆႉ ဢေႃႈ။ ၶဝ်ယိုဝ်းမႅၼ်ႈ 11 လုၵ်ႈယဝ်ႉၶႃႈ ” ဝႃႈၼႆ။

တီႈၼႂ်းဢိူင်ႇတီးမ ၸေႈဝဵင်းမူႇၸေႈၼႆႉ လိူဝ်သေ တပ်ႉသိုၵ်းပႃႇတီႇမႂ်ႇသုင်ၸိုင်ႈတႆးတပ်ႉသိုၵ်းၸိုင်ႈတႆး SSPP/SSA ယဝ်ႉ မီးတပ်ႉသိုၵ်းလွတ်ႈလႅဝ်းသဝ်းၶေႃ ၶၢင် KIA ၊ တပ်ႉသိုၵ်းပူတ်းပွႆႇၸိူဝ်ႉၸၢတ်ႈတဢၢင်း TNLA လႄႈ ၾၢႆႇၶွင်ႇသီႇသိုၵ်းမၢၼ်ႈၶဝ် တူင်ႉၼိုင်ၵႂႃႇမႃးသေ ၶွင်ႇသီႇသိုၵ်းမၢၼ်ႈတင်း ၸုမ်းယိပ်းၵွင်ႈၵၢင်ႇ ၸၢဝ်းၶိူဝ်းၶဝ်ၵေႃႈ ယူႇယူႇၵႆႉလႆႈပဵၼ်ပၢင်တိုၵ်းၵၼ် ယူႇယဝ်ႉ။

#shanstateprogressparty

#shanstatearmy

#SSPP #SSA

#ပႃႇတီႇမႂ်ႇသုင်ၸိုင်ႈတႆး

#တပ်ႉသိုၵ်းၸိုင်ႈတႆး

#ႁိူဝ်းမိၼ်တိုၵ်း

#ၶွင်ႇသီႇသိုၵ်းမၢၼ်ႈ#KIA