ၶွင်ႇသီႇသိုၵ်းမၢၼ်ႈ ဢၼ်တူင်ႉၼိုင်ပၵ်းသဝ်း ၼႂ်းဢိူင်ႇႁၢႆးသႅင် ၸေႈဝဵင်းလၢႆးၶႃႈၼၼ်ႉ ဢႃးထမ်ႇမ ဢဝ် ၵိၼ်ၵႆႇ ၵူၼ်းဝၢၼ်ႈ လႄႈ လၢတ်ႈၵႂၢမ်းတဵၵ်းတဵင်လွၵ်ႇငိူတ်ႈ တီႈၵူၼ်းဝၢၼ်ႈ ႁႂ်ႈႁဵတ်းသိုၵ်း ပျီႇတုၸိတ်ႉ ၼိုင်ႈ ႁိူၼ်းလႂ် ၼိုင်ႈၵေႃႉ ၼႆယူႇယဝ်ႉ။

မိူဝ်ႈဝၼ်းထီႉ 11.10.2023 ၶၢဝ်းယၢမ်း ၵၢင်ၼႂ် 7:00 မူင်းၼၼ်ႉ ၶွင်ႇသီႇသိုၵ်းမၢၼ်ႈ ဢၼ်ပၵ်းသဝ်းတူင်ႉ ၼိုင်ဝႆႉ တီႈၵွင်းမူးႁၢႆးသႅင် ဢိူင်ႇႁၢႆးသႅင် ၸေႈဝဵင်းလၢႆးၶႃႈ ၼၼ်ႉ မိူဝ်းလၵ်ႉပိုတ်း ဢဝ်ၵိၼ်ၵႆႇ ၵူၼ်းဝၢၼ်ႈ ၼႂ်းဝၢၼ်ႈ ၵၢင်းဢုၼ် ဢိူင်ႇႁၢႆးသႅင် သေ တဵၵ်းတဵင်လွၵ်ႇငိူတ်ႈ လၢတ်ႈတီႈၵူၼ်းဝၢၼ်ႈ ႁႂ်ႈၵူၼ်းဝၢၼ်ႈ ႁဵတ်း သိုၵ်းပျီႇတုၸိတ်ႉ ၼိုင်ႈႁိူၼ်းလႂ်ၼိုင်ႈၵေႃႉ ၊ ၵူၼ်းဝၢၼ်ႈဢွၼ်ၵၼ်ၵူဝ် ယွၼ်ႉဢမ်ႇၶႆႈႁဵတ်းသိုၵ်း ပျီႇတု ၸိတ်ႉ လႄႈ ၵမ်ႈၽွင်ႈ ၵေႃႈ ႁၢင်ႈႁႅၼ်းတႃႇတေ ဢွၵ်ႇပၢႆႈႁႂ်ႈလွတ်ႈႁဵတ်းသိုၵ်း ပျီႇတုၸိတ်ႉ ၼႆယူႇယဝ်ႉ။

ၵူၼ်းမိူင်းပိုၼ်ႉတီႈ ၵေႃႈၼိုင်ႈလၢတ်ႈၼႄႁဝ်းၶႃႈဝႃႈ- “ ၸႂ်ႈၶႃႈဢေႃႈ သိုၵ်ႈမၢၼ်ႈဢၼ်ပၵ်းသဝ်းဝႆႉ တီႈၵွင်းမူးႁၢႆးသႅင်ၼၼ်ႉ ၶဝ်လူင်းမႃးၼႂ်းဝၢၼ်ႈႁဝ်းၶႃႈသေ မႃးပိုတ်း ဢဝ်ၵႆႇၵႂႃႇဢေႃႈ။ လိူဝ်သေၼၼ်ႉ ၶဝ် လၢတ်ႈတီႈၵူၼ်းဝၢၼ်ႈႁဝ်းၶႃႈဝႃႈ ၼႂ်းဝၢၼ်ႈၵၢင်းဢုၼ်ၼႆႉ ၼိုင်ႈႁိူၼ်း တေလႆႈႁဵတ်းသိုၵ်း ပီႇတုၸိတ်ႉ (1) ၵေႃႉ ပေႃးၵူၼ်းဝၢၼ်ႈ ဢမ်ႇႁဵတ်းၼႆ ၶဝ်ဢမ်ႇဢၢၼ်းမိူဝ်းၶိုၼ်း ဝႃႈၼႆဢေႃႈ။

ႁဝ်းၶႃႈတေႉ တိုၼ်းဢမ်ႇၶႆႈ ႁဵတ်းသိုၵ်းပျီႇတုၸိတ်ႉၶႃႈ ယွၼ်ႉၼၼ် ၵူၼ်းဝၢၼ်ႈၵမ်ႈၽွင်ႈၵေႃႈ ၵူဝ်လႆႈႁဵတ်းသိုၵ်းပျီႇတုၸိတ်ႉလႄႈ ဢွၼ်ၵၼ်ၶိုင် ၶႂ်ႈပၢႆႈယဝ်ႉၶႃႈ ဢၼ်ၶဝ်လၢတ်ႈၼၼ်ႉ လၢတ်ႈတေႉႁိုဝ်လၢတ်ႈလဵၼ်ႈဢမ်ႇႁူႉၶႃႈလႄႇၼေႃႈ ၵူၼ်းဝၢၼ်ႈၶဝ်တေႉဢွၼ်ၵၼ်ၵူဝ်ဝႆႉ ယဝ်ႉၶႃႈ ” ဝႃႈၼႆ။ဝၢႆးသေၶွင်ႇသီႇသိုၵ်းမၢၼ်ႈ ယိုတ်းသိမ်းဢႃႇၼႃႇၸိုင်ႈမိူင်းမႃးၼႆႉ ၵၢၼ်မိူင်းၵၢၼ်သိုၵ်း ၼႂ်းမိူင်းၵေႃႈ ဢမ်ႇ မီးလွင်ႈၼိမ်သဝ်း ၶွင်ႇသီႇသိုၵ်းမၢၼ်ႈတင်း တပ်ႉသိုၵ်းၵႅတ်ႇ ၶႄၵူၼ်းမိူင်း PDF ၊ ၸုမ်းယိပ်းၵွင်ႈၵၢင်ႇၸၢဝ်း ၶိူဝ်းၶဝ် လၢႆလၢႆၸုမ်း ၵႆႉၵႆႉပဵၼ်ပၢင်တိုၵ်းၵၼ်လႄႈ ၾၢႆႇၶွင်ႇသီႇသိုၵ်းမၢၼ်ႈ မီးလွင်ႈလူႉယႂ်ႇသုမ်းၼမ်သေ တႃႇတေတူင်ႉ ၼိုင် ၼႂ်းပိုၼ်ႉတီႈလၢႆတီႈလၢႆတၢင်းၼၼ်ႉ ၶွင်ႇသီႇသိုၵ်းမၢၼ်ႈ လႆႈၸႂ်ႉပႃး ႁႅင်းသိုၵ်း ပျီႇတု ၸိတ်ႉ တူင်ႉၼိုင်ၸွမ်းပႃး ၼႆယူႇယဝ်ႉ။

Photo-Crd:

#shanstateprogressparty #shanstatearmy

#SSPP

#SSA

#ပႃႇတီႇမႂ်ႇသုင်ၸိုင်ႈတႆး

#တပ်ႉသိုၵ်းၸိုင်ႈတႆး

#ပျီႇတုၸိတ်ႉ

#ၶွင်ႇသီႇသိုၵ်းမၢၼ်ႈ