ၶွင်ႇသီႇသိုၵ်းမၢၼ်ႈ လၢမ်းယိုဝ်းၵွင်ႈလူင်ၾၢႆႇလဵဝ် တူၵ်းတိူဝ်ႉၺႃး ႁိမ်းႁိူၼ်းၵူၼ်းမိူင်းပိုၼ်ႉတီႈ ၼႂ်းဢိူင်ႇၵုၼ် ၵွၵ်ႇ ၸေႈဝဵင်းသႅၼ်ဝီသေ ၸၢၵ်ႇမၢၵ်ႇသဵၼ်တိူဝ်ႉပႃး ႁိူၼ်းယေး လႄႈ မႄႈပႃးတွင်ႉၵေႃႉၼိုင်ႈလႆႈမၢတ်ႇၸဵပ်း ၸွမ်း ၼႆယူႇယဝ်ႉ။မိူဝ်ႈၼႆႉ ဝၼ်းထီႉ 09/10/2023 ၶၢဝ်းယၢမ်း ၵၢင်ၼႂ် 10:00 မူင်း ၶွင်ႇသီႇသိုၵ်းမၢၼ်ႈ ယူႇတီႈဝၢၼ်ႈပၢင်ႇ ၼႂ်း ဢိူင်ႇၸေႈဢူ တီႈၼိုင်ႈ ၊ လုၵ်ႉဢဝ်တီႈ တပ်ႉၼမ်ႉၸလၢပ်ႈ ဢိူင်ႇၼမ်ႉၸလၢပ်ႈ တီႈၼိုင်ႈသေ ယိုဝ်းၵွင်ႈ လူင် ၵႂႃႇတူၵ်းႁိမ်း ဝၢၼ်ႈပဵင်းၵၢင်း (2) လုၵ်ႈ ၊ တူၵ်းၼႂ်းဝၢၼ်ႈ ၵွင်းၶဵဝ် (2) လုၵ်ႈ ၊ မၢၵ်ႇဢၼ်တူၵ်းၺႃးၼႂ်း ဝၢၼ်ႈ ၵွင်းၶဵဝ် ၼၼ်ႉ တူၵ်းတႅၵ်ႇတိူဝ်ႉၺႃးႁိူၼ်းၵူၼ်းဝၢၼ်ႈ လင်ၼိုင်ႈ ၸၢၵ်ႇမၢၵ်ႇသဵၼ်တိူဝ်ႉၺႃးပႃး ၵေႃႉ ပဵၼ် ၸဝ်ႈႁိူၼ်း ၼၢင်းသႅင် ဢႃႇယူႉ (30) ပၢႆ ဢၼ်ပဵၼ်မႄႈပႃးတွင်ႉဝႆႉ ၼၼ်ႉလႆႈတၢင်းမၢတ်ႇၸဵပ်းၸွမ်း တီႈၵွင်းလင် ၼႆယူႇယဝ်ႉ။

ၼၢင်းသႅင်ၵေႃႉဢၼ် ၸၢၵ်ႇမၢၵ်ႇသဵၼ်တိူဝ်ႉၺႃးမၢတ်ႇၸဵပ်းတီႈၵွင်းလင် ၼႆႉ လႆႈဢဝ်သူင်ႇယူတ်းယႃတူဝ်ဝႆႉ တီႈႁူင်းယႃ ဢိူင်ႇၼမ်ႉၸလၢပ်ႈသေ ယွၼ်ႉလႆႈမႆႈၸႂ် ၵူဝ်မီးလွင်ႈတုမ်ႉတိူဝ်ႉပႃး လုၵ်ႈဢွၼ်ႇၼႂ်းတွင်ႉၼႆလႄႈ တေၶိုၼ်း သိုပ်ႇသူင်ႇၵႂႃႇယူတ်းယႃ တီႈႁူင်းယႃလူင် ဝဵင်းလႃသဵဝ်ႈ ၼႆယူႇယဝ်ႉ။

မိူဝ်ႈပူၼ်ႉမႃး ဝၼ်းထီႉ 07/10/2023 ၼၼ်ႉၵေႃႈ ၶွင်ႇသီႇသိုၵ်းမၢၼ်ႈတင်း တပ်ႉသိုၵ်းလွတ်ႈလႅဝ်းသဝ်းၶေႃၶၢင် KIA ၸႂ်ႉမၢၵ်ႇလူင်တိုၵ်းယိုဝ်းၵၼ် ၼႂ်းဢိူင်ႇၵုၼ်ၵွၵ်ႇ ၊ ဢိူင်ႇၸေႈဢူ ၸေႈဝဵင်းသႅၼ်ဝီ ၼႆႉသေ မၢၵ်ႇလူင် တူၵ်း တႅၵ်ႇတိူဝ်ႉ ၺႃး ႁိူၼ်းၵူၼ်းဝၢၼ်ႈ ၼႂ်းဢိူင်ႇၵုၼ်ၵွၵ်ႇ လႄႈ တိူဝ်ႉၺႃး ဝတ်ႉၵျွင်းမုၼ်ၸဝ်ႈ လႆႈလူႉၵွႆၸွမ်းသေ ဢမ်ႇၵႃး ၵူၼ်းမိူင်းပိုၼ်ႉတီႈ ၼႂ်းဢိူင်ႇၵုၼ်ၵွၵ်ႇ (200) ၵေႃႉပၢႆ လႆႈဢွၼ်ၵၼ် ပၢႆႈၽေးပၢင်တိုၵ်း ၵႂႃႇသွၼ်ႈ သဝ်းဝႆႉတီႈ ဝတ်ႉၵျွင်းႁူဝ်မိူင်း ဢိူင်ႇႁူဝ်မိူင်းၸေႈဝဵင်းသႅၼ်ဝီ ၊ တေႃႇထိုင်ယၢမ်းၼႆႉၵေႃႈ ပႆႇၸင်ႈပွၵ်ႈၶိုၼ်း ႁိူၼ်း ၼႆယူႇယဝ်ႉ။#shanstateprogressparty

#shanstatearmy

#SSPP #SSA

#ပႃႇတီႇမႂ်ႇသုင်ၸိုင်ႈတႆး

#တပ်ႉသိုၵ်းၸိုင်ႈတႆး

#ၶွင်ႇသီႇသိုၵ်းမၢၼ်ႈ#KIA