SSPPInfo
08/10/2023

ယွၼ်ႉၾၢႆႇၶွင်ႇသီႇသိုၵ်းမၢၼ်ႈ တင်း တပ်ႉသိုၵ်းလွတ်ႈလႅဝ်းသဝ်းၶေႃၶၢင် KIA ပွႆႇမၢၵ်ႇလူင်ပိုတ်းယိုဝ်းသႂ်ႇၵၼ် ၼႂ်းဢိူင်ႇ ၵုၼ်ၵွၵ်ႇ ၊ ဢိူင်ႇၸေႈဢူ ၸေႈဝဵင်းသႅၼ်ဝီသေ ႁဵတ်းႁႂ်ႈမၢၵ်ႇလူင်တူၵ်းတိူဝ်ႉၺႃး ႁိမ်းႁိူၼ်း ၵူၼ်းဝၢၼ်ႈ ၊ ဝတ်ႉၵျွင်းမုၼ်ၸဝ်ႈ ၸဵမ်ၸိူဝ်းၼႆႉလႄႈ ၵူၼ်းမိူင်းပိုၼ်ႉတီႈ (200) ၵေႃႉပၢႆ လႆႈဢွၼ်ၵၼ် ပၢႆၽေးပၢင်တိုၵ်း ၵႂႃႇသွၼ်ႇယူႇဝႆႉ တီႈဝတ်ႉၵျွင်းႁူဝ်မိူင်း ဢိူင်ႇႁူဝ်မိူင်း ၸေႈဝဵင်းသႅၼ်ဝီ ၸိုင်ႈတႆးပွတ်းႁွင်ႇၼၼ်ႉ ယူႇယဝ်ႉ။

မိူဝ်ႈဝၼ်းထီႉ 07/10/2023 ၶၢဝ်းယၢမ်း ၵၢင်ၼႂ် 10:20 မူင်း ၼၼ်ႉ ၾၢႆႇတပ်ႉသိုၵ်းလွတ်ႈလႅဝ်း သဝ်းၶေႃၶၢင် KIA ၸႂ်ႉၶိူင်ႈဝိၼ် တရူၼ်း(Drone) သေ ပွႆႇမၢၵ်ႇသႂ်ႇ သၢႆသိုၵ်း ၶွင်ႇသီႇသိုၵ်းမၢၼ်ႈ ဢၼ်ပၵ်းသဝ်းဝႆႉတီႈ ႁူင်းႁဵၼ်းသွၼ်လိၵ်ႈ ဝၢၼ်ႈပၢင်ၼႃး ဢိူင်ႇၸေႈဢူ ၸေႈဝဵင်းသႅၼ်ဝီၼၼ်ႉ လႄႈ ၾၢႆႇၶွင်ႇသီႇသိုၵ်းမၢၼ်ႈ လႆႈမၢတ်ႇၸဵပ်း (2) ၵေႃႉ ၊ လူႉတၢႆ(1) ၵေႃႉ ၼႆယူႇယဝ်ႉ။

ထိုင်မႃး မိူဝ်ႈၶၢဝ်းယၢမ်း 10:50 မူင်းၼၼ်ႉ ၾၢႆႇၶွင်ႇသီႇသိုၵ်းမၢၼ်ႈ တပ်ႉၶလယ (16) ဢၼ်ပဵၼ်တပ်ႉပၵ်းသဝ်း ဝဵင်း သႅၼ်ဝီ လုၵ်ႉတီႈ ႁူင်းႁဵၼ်း သွၼ်လိၵ်ႈ ဝၢၼ်ႈပၢင်ၼႃး ဢိူင်ႇၸေႈဢူ ယိုဝ်းၵွင်ႈလူင် သႅၼ်းမၢၵ်ႇ (60) mm ၵႂႃႇတၢင်း ဢိူင်ႇၵုၼ်ၵွၵ်ႇ ၸိူဝ်းၼႆႉ လႄႈ ႁဵတ်းႁႂ်ႈ မၢၵ်ႇလူင် တူၵ်းတႅၵ်ႇတိူဝ်ႉၺႃး တီႈၵျွင်းမုၼ်ၸဝ်ႈ ဝၢၼ်ႈၵုၼ်ၵွၵ်ႇ ၊ တူၵ်းတိူဝ်ႉ ၺႃး ႁိမ်းႁိူၼ်း ၵူၼ်းဝၢၼ်ႈ ဝၢၼ်ႈၽၢႆၶမ်း ဢိူင်ႇၵုၼ်ၵွၵ်ႇၸဵမ်ၸိူဝ်းၼႆႉ သေ ၵူၼ်းမိူင်းပိုၼ်ႉတီႈ ၼႂ်းဢိူင်ႇၵုၼ်ၵွၵ်ႇ မိူၼ်ၼင်ႇ ၵူၼ်းဝၢၼ်ႈၵုၼ်ၵွၵ်ႇ (180) ၵေႃႉ ၊ ၵူၼ်းဝၢၼ်ႈပဵင်းႁုင်း (12) ၵေႃႉ ၊ ၵူၼ်း ဝၢၼ်ႈႁေႈ (35) ၵေႃႉ တၢင်းမူတ်ႈႁူမ်ႈသဵင်ႈ (227) ၵေႃႉ လႆႈဢွၼ်ၵၼ်ပၢႆႈၽေးပၢင်တိုၵ်း ၵႂႃႇသွၼ်ႈသဝ်း ယူႇဝႆႉတီႈ ဝတ်ႉၵျွင်းမုၼ်ၸဝ်ႈႁူဝ်မိူင်း ဢိူင်ႇႁူဝ်မိူင်း ၸေႈဝဵင်းသႅၼ်ဝီ ၼၼ်ႉယူႇယဝ်ႉ။

တေႃႇထိုင် မိူဝ်ႈၼႆႉ ဝၼ်းထီႉ 08/10/2023 ၶၢဝ်းယၢမ်း 12 မူင်း ၼႆႉၵေႃႈ သွင်ၾၢႆႇတိုၵ်ႉထႅမ်ႁႅင်း ၶဵင်ႈၶႅင်ၼႃႈသိုၵ်းတေႃႇၵၼ် ဝႆႉ ၼႂ်းဢိူင်ႇ ၵုၼ်ၵွၵ်ႇ ၊ ဢိူင်ႇၸေႈဢူ ၸိူဝ်းၼႆႉသေ ၵူၼ်းမိူင်းၸိူဝ်းလႆႈ ပၢႆႈၽေးပၢင်တိုၵ်း ပႆႇႁတ်းပွၵ်ႈၶိုၼ်းႁိူၼ်း ၊ ထူပ်းတၢင်းယၢပ်ႇၽိုတ်ႇဝႆႉ လွင်ႈၵိၼ်ယမ်ႉ ၊ လွင်ႈပၢႆးယူႇလီ သေ ဢမ်ႇၵႃး မၢၵ်ႇၶဝ်ႈတဝ်ႈ ၼမ်ႉဢၼ်လႆႈၽုၵ်ႇသွမ်ႈဝႆႉၼႂ်းႁႆႈ/သူၼ် ၵေႃႈ ဢမ်ႇၸင်ႈပွၵ်ႈမိူဝ်းသိမ်း မိူဝ်းဢဝ် လႄႈ မီးလွင်ႈမႆႈၸႂ် ၵူဝ်တုမ်ႉတိူဝ်ႉပႃးလွင်ႈ ၵၢၼ်ႁႃၵိၼ်လဵင်ႉတွင်ႉ မိူဝ်းၼႃႈထႅင်ႈတၢင်းၼမ် ယူႇၼႆယဝ်ႉ။