SSPPInfo
18/09/2023
ၸုမ်းၾၢႆႇပၢႆးယူႇလီ တီႈငဝ်ႈငုၼ်း ပႃႇတီႇမႂ်ႇသုင်ၸိုင်ႈတႆးတပ်ႉသိုၵ်းၸိုင်ႈတႆး SSPP/SSA လူင်းပိုၼ်ႉတီႈ တူၺ်းထိုင်ပၼ် လွင်ႈပၢႆးယူႇလီ ပေႃႈမႄႈၵူၼ်းမိူင်း ၸိူဝ်းဢၼ် ပၢႆႈၽေးသေပွၵ်ႈၶိုၼ်းႁိူၼ်း တီႈဝၢၼ်ႈမွၵ်ႇငႃး ၸၢင်ႉ ဢိူင်ႇလွႆၵူင် ၸေႈဝဵင်းၵျွၵ်ႉမႄး ၸိုင်ႈတႆးပွတ်းႁွင်ႇၼၼ်ႉ ၼႆယူႇယဝ်ႉ။
မိူဝ်ႈဝၼ်းထီႉ 17/09/2023 ၶၢဝ်းယၢမ်း 14:30 မူင်း တေႃႇထိုင် 15:30 မူင်းၼၼ်ႉ ၸုမ်းၾၢႆႇပၢႆးယူႇလီ မေႃယႃ ငဝ်ႈငုၼ်း ပႃႇတီႇမႂ်ႇသုင်ၸိုင်ႈတႆးတပ်ႉသိုၵ်းၸိုင်ႈတႆး SSPP/SSA လႆႈလူင်းပိုၼ်ႉတီႈ ႁူပ်ႉထူပ်း ပေႃႈမႄႈ ၵူၼ်းမိူင်း ၸိူဝ်းဢၼ်ပၢႆႈၽေးသေပွၵ်ႈၶိုၼ်းႁိူၼ်း တီႈဝၢၼ်ႈမွၵ်ႇငႃးၸၢင်ႉ ဢိူင်ႇလွႆၵူင် ၸေႈဝဵင်းၵျွၵ်ႉမႄး ၼၼ်ႉသေ လႆႈသပ်းလႅင်း ပၼ်ပိုၼ်ႉႁူႉ ၵဵဝ်ႇလူၺ်ႈလွင်ႈပၢႆးယူႇလီႈ လႄႈ တူၺ်းထိုင်ပၼ်ပႃး ပၢႆးယူႇလီႈ ၵူၼ်း ဝၢၼ်ႈ တႃႇမုင်ႉႁေႃ ႁိူၼ်း (41) လင် ႁူဝ်ၵူၼ်း ၸၢႆး (40) ၵေႃႉ ၊ ယိင်း (46) ၵေႃႉ တၢင်းမူတ်းႁူမ်ႈၵၼ် မီး (86) ၵေႃႉ ၼႆယူႇယဝ်ႉ။
ယွၼ်ႉပၢင်တိုၵ်း ၸၢဝ်းၶိူဝ်းၼင်ႇၵၼ် တိုၵ်းယိုဝ်းၵၼ် မိူဝ်ႈၼႂ်း ပီႊ 2021/2022 ၼၼ်ႉလႄႈသင် ယွၼ်ႉၵူၼ်း ၵမ်ႈၽွင်ႈ သေႃႇသူၼ်း လွၵ်ႇငိူတ်ႈလႄႈသင် ပေႃႈမႄႈၵူၼ်းမိူင်း ၼႂ်းပိုၼ်ႉတီႈ ဢိူင်ႇၶိုမ်း ၊ ဢိူင်ႇႁူးသူၼ် ၊ ဢိူင်ႇ ပုင်းလူင် ၊ ဢိူင်ႇလွႆၵူင် ၸေႈဝဵင်းၵျွၵ်ႉမႄး ၸိူဝ်းၼႆႉ လႆႈဢွၼ်ၵၼ် ၸုၼ်ႉပွႆႇပႅတ်ႈ ႁိူၼ်းယေး တိူၵ်ႇႁႆႊ လွၵ်း ၼႃးသေ ပၢႆႈဢွၵ်ႇဝၢၼ်ႈ ၵႂႃႇသွၼ်ႈသဝ်း ထူပ်းတၢင်းယၢပ်ႇၽိုတ်ႇဝႆႉယူႇ လၢႆတီႈလၢႆတၢင်း လႄႈ ၼင်ႇႁိုဝ်ပေႃး တေလႆႈပွၵ်ႈမႃးယူႇသဝ်းၶိုၼ်း ႁိူၼ်းယေးၽႂ်မၼ်းလႆႈလီငၢမ်းၼၼ်ႉ ယူႇတီႈပႃႇတီႇမႂ်ႇသုင်ၸိုင်ႈတႆးတပ်ႉသိုၵ်း ၸိုင်ႈတႆး SSPP/SSA ၸွင်ႇလႆႈၶတ်းၸႂ် ၸွႆႈထႅမ်ပၼ်ၵႂႃႇ လၢႆလွင်ႈလၢႆးတၢင်း ၵႃႈၼင်ႇပွင်ပဵၼ်လႆႈၼၼ်ႉ ယူႇ ယဝ်ႉ။
