SSPPInfo
27/09/2023

ၸုမ်းၵူၼ်းၼုမ်ႇ ၵေႃႊပူၵ်းပွင်ၸိုင်ႈတႆး SSYCBC လူင်းပိုၼ်ႉတီႈ ၸွႆႈထႅမ်ၶူဝ်းၸႂ်ႉတိုဝ်းလႄႈ ငိုၼ်း တႃႇၵူၼ်း ပၢႆႈၽေး ပွၵ်ႈၶိုၼ်းႁိူၼ်း ၼႂ်းၸေႈဝဵင်းၵျွၵ်ႉမႄးၼၼ်ႉယူႇယဝ်ႉ။

မိူဝ်ႈဝၼ်းထီႉ 23/09/2023 ၼၼ်ႉ ၸုမ်းၵူၼ်းၼုမ်ႇ ၵေႃႊပူၵ်းပွင်ၸိုင်ႈတႆး SSYCBC လႆႈဢွၼ် ၵၼ်လူင်း ပိုၼ်ႉတီႈ ၼႂ်းၸေႈဝဵင်းၵျွၵ်ႉမႄးသေ ၸွႆႈထႅမ်ၶူဝ်းၸႂ်ႉတိုဝ်း လႄႈ ငိုၼ်းၸႂ်ႉၸၢႆႇ တီႈပေႃႈမႄႈၵူၼ်းမိူင်း ဢၼ် ပၢႆႈၽေးသေပွၵ်ႈ ၶိုၼ်းႁိူၼ်း ၼႂ်းဢိူင်ႇ ပုင်းလူင် ၊ ဢိူင်ႇႁူးသူၼ် မိူၼ်ၼင်ႇဝၢၼ်ႈတူၼ်ႈႁိူၵ်ႈ လင်ႁိူၼ်း(14) လင် ၸွႆႈထႅမ် ၽွင်လွႆးၶူဝ်း (ၽူႇၸီႇ) သႅၼ်းၵွၵ်းယႂ်ႇ (14) ၵွၵ်း ငိုၼ်း(730,000) ၸဵတ်းသႅၼ်သၢမ်မိုၼ်ႇၵျၢပ်ႈ ၊ ဝၢၼ်ႈႁူးသူၼ် တႃႇလင်ႁိူၼ်း(20) လင် ၸွႆႈထႅမ်ၽွင်လွႆးၶူဝ်း (ၽူႇၸီႇ) ၵွၵ်းယႂ်ႇ (20) ၵွၵ်း  ငိုၼ်း (1,000,000) သိပ်းသႅၼ်ၵျၢပ်ႈ ၊ ဝၢၼ်ႈၼႅမ်းသၢႆး လင် ႁိူၼ်း(8) လင် ၸွႆႈထႅမ် ၽွင်လွႆးၶူဝ်း(ၽူႇၸီႇ) ၵွၵ်းယႂ်ႇ (8) ၵွၵ်း  ငိုၼ်း (400,000) သီႇသႅၼ်ၵျၢပ်ႈ ၊ ဝၢၼ်ႈပၢင်ႁုင်း တႃႇလင်ႁိူၼ်း (14) လင် ၸွႆႈထႅမ် ၽွင်လွႆးၶူဝ်း(ၽူႇၸီႇ) ၵွၵ်းယႂ်ႇ (14) ၵွၵ်း ငိုၼ်း (730,000) ၸဵတ်းသႅၼ် သၢမ်မိုၼ်ႇၵျၢပ်ႈ ၼႆယူႇယဝ်ႉ။

ၵူၼ်းၼုမ်ႇ ၼႂ်းၵေႃႊပူၵ်းပွင်ၸိုင်ႈတႆး SSYCBC ၵေႃႉၼိုင်ႈလၢတ်ႈၼႄဝႃႈ- လွင်ႈလႆႈၸွႆႈထႅမ် ၵူၼ်းပၢႆႈၽေး ၸိူဝ်းဢၼ် ပွၵ်ႈၶိုၼ်းႁိူၼ်း ၼႆႉ ယိူင်းဢၢၼ်း ႁႂ်ႈပေႃႈမႄႈၵူၼ်းမိူင်း ၸိူဝ်းဢၼ်ပွၵ်ႈၶိုၼ်းႁိူၼ်းတေၸဵဝ်း ပူၵ်း ပွင်လႆႈ ၽဝ တူဝ်ၵဝ်ႇ ၶိုၼ်း ႁႂ်ႈပေႃးၶိုၼ်ႈယႂ်ႇမႃးၼၼ်ႉသေ ၵႃႈၼင်ႇပွင်ပဵၼ်လႆႈ ၸွင်ႇလႆႈၶတ်းၸႂ် ႁႃတိုဝ်ႉ တၢင်းမႃးၸွႆႈထႅမ်ပၼ်ယူႇ ဝႃႈၼႆ။

မိူဝ်ႈပူၼ်ႉမႃး ၼႂ်းပီႊ 2021/2022 မိူဝ်ႈၽွင်း ၸုမ်းၸၢဝ်းၶိူဝ်းယိပ်းၵွင်ႈၵၢင်ႇ လုၵ်ႉၽိုၼ်ႉ ၼင်ႇၵၼ် ပိုတ်းယိုဝ်း ၵၼ် ၼႂ်းမိူင်းတႆးပွတ်းႁွင်ႇၼၼ်ႉ ၵူၼ်းမိူင်းပိုၼ်ႉတီႈ ၼႂ်းၸေႈဝဵင်း ၵျွၵ်ႉမႄး လႆႈဢွၼ်ၵၼ် ၸုၼ်ႉပွႆႇပႅတ်ႈ ႁိူၼ်းယေး ၊ ၶူဝ်းၶွင် ၊ တိူၵ်ႇ ႁႆႈ လွၵ်းၼႃး ဢွၼ်ၵၼ်ပၢႆႈၵႂႃႇ သွၼ်ႈသဝ်း ယူႇဝႆႉ လၢႆတီႈလၢႆတၢင်း လႄႈ ထိုင်မႃး ၼႂ်းပီႊ 2023 ၼႆႉ ယူႇတီႈပႃႇတီႇမႂ်ႇသုင် ၸိုင်ႈတႆးတပ်ႉသိုၵ်းၸိုင်ႈတႆး SSPP/SSA ၸွင်ႇလႆႈၶတ်းၸႂ် ႁႃတိုဝ်ႉ တၢင်း ၸွႆႈထႅမ်ပၼ် ႁႂ်ႈၵူၼ်းၸိူဝ်းပၢႆႈၽေး ပေႃးလႆႈပွၵ်ႈၶိုၼ်းႁိူၼ်းၽႂ်မၼ်းၶိုၼ်းသေဢမ်ႇၵႃး ၸွႆႈထႅမ်ပၼ်ပႃး လွင်ႈၵိၼ်ယမ်ႉ ၵိူဝ် ၊ ၽွင်ဝၢၼ်ႈ ၊ ၼမ်ႉမၼ်း ၊ ၶဝ်ႈသၢၼ် ၸဵမ်ၸိူဝ်းၼႆႉ ယူႇယဝ်ႉ။