SSPPInfo
24/09/2023
ယိူင်းဢၢၼ်း ပိူဝ်ႈတႃႇ ႁႂ်ႈၵူၼ်းၼုမ်ႇၼႂ်းမိူင်းၸိုင်ႈတႆး ပေႃးတေၸမ်ၸႂ်မိုတ်ႈၵိုဝ်းၵၼ်လႄႈ ႁႂ်ႈၵၢင်း ယၢၼ်ၽေးယႃႈမဝ်းၵမ် ၼႆသေ ယူႇတီႈၸုမ်းၵူၼ်းၼုမ်ႇ ငဝ်ႈငုၼ်း ပႃႇတီႇမႂ်ႇသုင်ၸိုင်ႈတႆးတပ်ႉသိုၵ်း ၸိုင်ႈတႆး SSPP/SSA ၸွင်ႇလႆႈဢွၼ်ႁူဝ် ၸတ်းႁဵတ်းပၢင်ၵႅဝ်ႈပိုတ်ႇၽုၺ်ႇ ပၢင်ၶေႉၶဵင်ႇလဵၼ်ႈႁႅင်း ပိတ်ႉမၢၵ်ႇၼင်လွမ်ႈ ၼႂ်းပီႊ 2023 ၼႆႉယူႇယဝ်ႉ။
မိူဝ်ႈၼႆႉ ဝၼ်းထီႉ 24/09/2023 ၶၢဝ်းယၢမ်း 12:30 မူင်း ၼၼ်ႉ ယူႇတီႈၸုမ်းၵူၼ်းၼုမ်ႇ ငဝ်ႈငုၼ်း ပႃႇ တီႇမႂ်ႇသုင်ၸိုင်ႈတႆးတပ်ႉသိုၵ်းၸိုင်ႈတႆး SSPP/SSA ဢွၼ်ႁူဝ်သေ လႆႈၸတ်းႁဵတ်းပၢင်ၵႅဝ်ႈ ပိုတ်ႇ ၽုၺ်ႇ ပၢင်ၶေႉၶဵင်ႇ လဵၼ်ႈႁႅင်းပိတ်ႉမၢၵ်ႇၼင်လွမ်ႈ ဢွင်ႈတီႈဝၢင်းမၢၵ်ႇၼင်လူင် ဝၢၼ်ႈႁႆး ၼၼ်ႉလႄႈ မီးၽူႈယႂ်ႇၵူၼ်းလူင် ၵေႃႇမတီႇငဝ်ႈငုၼ်း ၊ ၽူႈဢွၼ်ႁူဝ် ၵုမ်းထိင်း ၸုမ်းၵူၼ်းၼုမ်ႇပိတ်ႉမၢၵ်ႇၼင် ၊ ၸုမ်းၵူၼ်းၼုမ်ႇ ပိတ်ႉမၢၵ်ႇၼင် ၊ ၸုမ်းၵူၼ်းၼုမ်ႇႁွင်ႈၵၢၼ်ၽႄ ၾၢႆႇပၢႆးမွၼ်း ၊ သၢႆသိုၵ်းၸုမ်းတွႆႇၵွင် သိူင်းသိုၵ်း (ပိင်ႇၶယႃႇ) ဢိၵ်ႇပႃးၵူႈတပ်ႉၵူႈႁွင်ႈၵၢၼ် ၸိူဝ်းၶဝ်ႈႁူမ်ႈပၼ်ႁႅင်း ႁူမ်ႈသဵင်ႈၽူႈၶိုၼ်ႈႁွတ်ႈမီး (839) ၵေႃႉ ၼႆယူႇယဝ်ႉ။
တီႈၼႂ်းပၢင်ၵႅဝ်ႈၼၼ်ႉ ၸဝ်ႈသိုၵ်းလူင် သိူဝ်ႇပိူင်ႇၾႃႉ ၵႅမ်ႁူဝ်ပဝ်ႈ ထီႉ(3) ပႃႇတီႇမႂ်ႇသုင်ၸိုင်ႈတႆးတပ်ႉ သိုၵ်းၸိုင်ႈတႆး SSPP/SSA မွၵ်ႇလၢတ်ႈၶေႃႈၵႂၢမ်းပိုတ်ႇပၢင် ၊ ၽူႈဢွၼ်ႁူဝ်ၸုမ်းၵူၼ်းၼုမ်ႇငဝ်ႈငုၼ်း ၸဝ်ႈသိုၵ်း သႅင်ႁၢၼ် မွၵ်ႇလၢတ်ႈ ၶေႃႈၵႂၢမ်း သပ်းလႅင်းၼႄ ၶေႃႈယိူင်းဢၢၼ်း ပၢင်ၶေႉၶဵင်ႇလဵၼ်ႈႁႅင်း ပိတ်ႉမၢၵ်ႇၼင် ဢုပ်းၵႅဝ်ႈၶမ်း ၊ ၽူႈဢွၼ်ႁူဝ် ႁွင်ႈၵၢၼ် ၽႄ ၾၢႆႇလဵၼ်ႈႁႅင်း ၶုၼ်သိုၵ်းလူင် ၸၢႆးဢွင်ႇမျႃႉ လၢႆးငၢၼ်းတၢင်ႇၼႄ သဵၼ်ႈမၢႆၸုမ်းပိတ်ႉမၢၵ်ႇၼင် လႄႈ မွၵ်ႇလၢတ်ႈ ၶေႃႈၵႂၢမ်း လူပ်းလင်ပၢင်ၵႅဝ်ႈ ၊ ၽူႈၶပ်ႉပၢင် ပိုၼ်ၽၢဝ်ႇပၢင်ၵႅဝ်ႈ ဢွင်ႇမၢၼ်ယဝ်ႉတူဝ်ႈၵႂႃႇ မိူဝ်ႈၶၢဝ်းယၢမ်း 14:25 မူင်း ၼၼ်ႉယူႇ ယဝ်ႉ။
ၸုမ်းၵူၼ်းၼုမ်ႇ ဢၼ်တေၶဝ်ႈႁူမ်ႈ လဵၼ်ႈႁႅင်းၶေႉၶဵင်ႇ ပိတ်ႉမၢၵ်ႇၼင် ဢုပ်းၵႅဝ်ႈၶမ်း ပွၵ်ႈၼႆႉ တၢင်းသဵင်ႈမီးယူႇ (29) ၸုမ်း လႄႈ ဝၢႆးပၢင်ၵႅဝ်ႈဢွင်ႇမၢၼ်ယဝ်ႉတူဝ်ၵႂႃႇယဝ်ႉ မိူဝ်ႈၶၢဝ်းယၢမ်း 15:00 မူင်းၼၼ်ႉ ၸုမ်းၵူၼ်းၼုမ်ႇပိတ်ႉမၢၵ်ႇၼင် ဝၢၼ်ႈႁႆး(ၵ) တင်း ၸုမ်းဝၢၼ်ႈၵိဝ်ႇ တေႇႁူဝ်ႁႅၵ်ႈ ၶေႉၶဵင်ႇ ပိတ်ႉမၢၵ်ႇၼင်ၸွမ်းၵၼ် ၵႂႃႇယူႇယဝ်ႉ။
