SSPPInfo
26/09/2023
ၶွင်ႇသီႇသိုၵ်းမၢၼ်ႈ ၸႂ်ႉႁိူဝ်းမိၼ်တိုၵ်း ပွႆႇမၢၵ်ႇ တိုၵ်းယိုဝ်းသႂ်ႇ တပ်ႉသိုၵ်းတဢၢင်း TNLA တီႈၼႂ်းဢိူင်ႇ ၼမ်ႉဢုမ် ၊ ဢိူင်ႇ ၸေႈလၢၼ်ႉ ၸေႈဝဵင်းမူႇၸေႈ ၸိုင်ႈတႆးပွတ်းႁွင်ႇ ၼႆယူႇယဝ်ႉ။

မိူဝ်ႈဝၼ်းထီႉ 25/09/2023 တေႇဢဝ်ၶၢဝ်းယၢမ်း 22:15 မူင်းၼၼ်ႉ ၶွင်ႇသီႇသိုၵ်းမၢၼ်ႈ ၸႂ်ႉႁိူဝ်းမိၼ်တိုၵ်း(Jet) (2) လမ်း ၶိုၼ်ႈယိုဝ်း ပွႆႇမၢၵ်ႇသႂ်ႇ တပ်ႉသိုၵ်းတဢၢင်း TNLA (3) လုၵ်ႈ တီႈသၼ်လွႆၼမ်ႉႁႃႉ ဢၼ်မီးၾၢႆႇၸၢၼ်းလွႆမွၵ်ႇ ၼႂ်း ဢိူင်ႇၼမ်ႉဢုမ် လႄႈ ပွႆႇသႂ်ႇတီႈ သၼ်လွႆၼမ်ႉၵတ်း ၵွင်းမၢၵ်ႇၵွၵ်ႇ ၼႂ်းဢိူင်ႇၸေႊလၢၼ်ႉ သေ မိူဝ်ႈၶၢဝ်းယၢမ်း 22:43 မူင်း ၼၼ်ႉၵေႃႈ ၾၢႆႇၶွင်ႇသီႇသိုၵ်းမၢၼ်ႈ လုၵ်ႉတီႈ လွႆၵိဝ်ႇလွၵ်ႇ (105) လၵ်း ယိုဝ်းၵွင်ႈလူင် 60MM သႂ်ႇ တပ်ႉသိုၵ်းတဢၢင်း TNLA တီႈပၢင်ႇလိၼ်လႅင် ဢၼ်မီးၾၢႆႇဢွၵ်ႇ လွႆတေးမိူင်း တေႃႇထိုင်ၶၢဝ်းယၢမ်း 23:40 မူင်း သဵင်မၢၵ်ႇ ၸွင်ႇယဵၼ်ၵႂႃႇ ၼႆယူႇယဝ်ႉ။

ၵဵဝ်ႇလူၺ်ႈလွင်ႈ ဢၼ်ၾၢႆႇသိုၵ်းမၢၼ်ႈ ၸႂ်ႉႁိူဝ်းမိၼ်တိုၵ်း ပွႆႇမၢၵ်ႇသႂ်ႇ တပ်ႉသိုၵ်းတဢၢင်း TNLA ၼၼ်ႉ လႆႈႁူႉဝႃႈ တိူဝ်ႉ ၺႃး တပ်ႉပၢင်သဝ်း တပ်ႉသိုၵ်းတဢၢင်း TNLA သွင်ဢွင်ႈတီႈ လႆႈလူႉၵွႆၵႂႃႇၵမ်ႈၽွင်ႈသေ လွင်ႈလူႉတၢႆမၢတ်ႇၸဵပ်း မီးဢမ်ႇမီးတေႉ ဢမ်ႇလႆႈႁူႉၸွမ်း ၼႆယူႇယဝ်ႉ။

တေႃႇထိုင် မိူဝ်ႈၼႆႉၵေႃႈ သွင်ၾၢႆႇတိုၵ်ႉၶဵင်ႈၶႅင်ၼႃႈသိုၵ်းတေႃႇၵၼ်ဝႆႉ ၼႂ်းဢိူင်ႇၸေႈလၢၼ်ႉ ဢိူင်ႇၼမ်ႉဢုမ် ၸိူဝ်းတီႈဢၼ် ၵႆႉပဵၼ်ပၢင်တိုၵ်းၵၼ်ၼၼ်ႉသေ မိူဝ်ႈၶၢဝ်းယၢမ်း ၵၢင်ၼႂ် 10 :02 မူင်းတေႃႇထိုင် ၶၢဝ်းယၢမ်း 11:00 မူင်းၼႆႉ ၾၢႆႇသိုၵ်းမၢၼ်ႈ လုၵ်ႉဢဝ်တီႈတပ်ႉ ၼမ်ႉၽၵ်းၵႃ ၸႂ်ႉၵွင်ႈလူင် ပိုတ်းယိုဝ်းၸူး တပ်ႉသိုၵ်းတဢၢင်း TNLA ယူႇပဵၼ်ၵမ်း ၼႆယဝ်ႉ။