SSPPInfo
20/09/2023

ၶွင်ႇသီႇသိုၵ်းမၢၼ်ႈတင်း တပ်ႉသိုၵ်းပူတ်းပွႆႇၸိူဝ်ႉၸၢတ်ႈတဢၢင်း TNLA သိုပ်ႇပဵၼ်ပၢင်တိုၵ်းၵၼ်ထႅင်ႈ ၼႂ်း ဢိူင်ႇပၢင်ႇၶမ်း ၸေႈဝဵင်းမူႇၸေႈ ၸိုင်ႈတႆးပွတ်းႁွင်ႇ ၼႆယူႇယဝ်ႉ။

မိူဝ်ႈဝၼ်းထီႉ 20/09/2023 ၶၢဝ်းယၢမ်း ၵၢင်ၼႂ် 10:55 မူင်း ၼၼ်ႉ ၶွင်ႇသီႇသိုၵ်းမၢၼ်ႈ ႁႅင်းသိုၵ်း မွၵ်ႈ (100) ၵေႃႉ တင်း တပ်ႉသိုၵ်းပူတ်းပွႆႇၸိူဝ်ႉၸၢတ်ႈတဢၢင်း TNLA လႆႈၽႃႇၺႃး ပဵၼ်ပၢင်တိုၵ်းၵၼ်ထႅင်ႈ တီႈၵွင်းလွႆ ပၢင်ႇလိၼ်လႅင် ဢၼ်မီးၾၢႆႇဢွၵ်ႇ လွႆတေးမိူင်း ယၢၼ်ၵႆလွႆတေးမိူင်း မွၵ်ႈ (1000 ) မီႇတိူဝ်ႊ ၼႂ်းဢိူင်ႇပၢင်ႇၶမ်း ၸေႈဝဵင်းမူႇၸေႈ ၸေႈတွၼ်ႈမူႇၸေႈ ၸိုင်ႈတႆးပွတ်းႁွင်ႇ တေႃႇထိုင်ၶၢဝ်းယၢမ်း ၵၢင်ဝၼ်း 12 :00 မူင်း ၼႆႉ ၵေႃႈ တိုၵ်ႉပဵၼ်ပၢင်တိုၵ်းၵၼ်ဝႆႉယူႇ လႄႈ လွင်ႈမၢတ်ႇၸဵပ်းလူႉတၢႆ တီႈၼႂ်းပၢင်တိုၵ်းတေႉ ပႆႇလႆႈႁူႉၸွမ်း ၼႆ ယူႇယဝ်ႉ။

မိူဝ်ႈၽွင်းတိုၵ်ႉပဵၼ်ပၢင်တိုၵ်းၼၼ်ႉ ၾၢႆႇၶွင်ႇသီႇသိုၵ်းမၢၼ်ႈ လုၵ်ႉတီႈတပ်ႉၵွင်ႈလူင် 105 လၵ်း သေ ယိုဝ်းၵွင်ႈ လူင် ထႅမ်ၸွႆႈ တီႈၼႂ်းပၢင်တိုၵ်းၼၼ်ႉယူႇ ၼႆယဝ်ႉ။

ၶွင်ႇသီႇသိုၵ်းမၢၼ်ႈ တင်း တပ်ႉသိုၵ်းပူတ်းပွႆႇၸိူဝ်ႉၸၢတ်ႈတဢၢင်း TNLA ၶိုၼ်းတေႇ ပဵၼ်ပၢင်တိုၵ်းၵၼ်မႃး ၼႂ်းဢိူင်ႇ ပၢင်ႇ ၶမ်း ၊ ဢိူင်ႇၸေႈလၢၼ်ႉ ၸေႈဝဵင်းမူႇၸေႈၼႆႉ တေႇဢဝ်ဝၼ်းထီႉ 17/09/2023 တေႃႇထိုင်မိူဝ်ႈ ၼႆႉ ဝၼ်းထီႉ 20/09/2023 ၼႂ်းၶၢဝ်းတၢင်းသီႇဝၼ်းထပ်းၵၼ်ၼၼ်ႉ ယွၼ်ႉပၢင်တိုၵ်းသေ ၸၢၵ်ႇမၢၵ်ႇ လႆႈတူၵ်း တိူဝ်ႉၺႃး ႁိူၼ်း ၊ သူၼ် ၵူၼ်းမိူင်းၼႂ်းပိုၼ်ႉတီႈ လႆႈလူႉၵွႆသေဢမ်ႇၵႃး ၵူၼ်းမိူင်း လႆႈဢွၼ်ၵၼ်ပၢႆႈၽေးပၢင် တိုၵ်း ထႅင်ႈတၢင်းၼမ် ယူႇယဝ်ႉ။