SSPPInfo
19/09/2023

ၶွင်ႇသီႇသိုၵ်းမၢၼ်ႈ တင်း တပ်ႉသိုၵ်းပူတ်းပွႆႇၸိူဝ်ႉၸၢတ်ႈတဢၢင်း TNLA တိုၵ်ႉသိုပ်ႇပဵၼ်ပၢင်တိုၵ်းၵၼ်ထႅင်ႈ ၼႂ်းဢိူင်ႇ ၸေႊလၢၼ်ႉ ၸေႈဝဵင်းမူႇၸေႈ ၸိုင်ႈတႆးပွတ်းႁွင်ႇ။

မိူဝ်ႈၼႆႉ ဝၼ်းထီႉ 19/09/2023 မိူဝ်ႈၶၢဝ်းယၢမ်း ၵၢင်ၼႂ် 8:57 မူင်း ၼၼ်ႉ ၶွင်ႇသီႇသိုၵ်းမၢၼ်ႈ လုၵ်ႉတီႈတပ်ႉလွႆ ၸၢၼ်းသႃႇ ၼႂ်းဢိူင်ႇၸေႈလၢၼ်ႉၼၼ်ႉ သေ ယိုဝ်းမၢၵ်ႇလူင်(60 mm) ၵႂႃႇတၢင်း လွႆဝဵင်းၼၢင်း ဢၼ်မီးၾၢႆႇ ၸၢၼ်း ဝၢၼ်ႈဝဵင်း ၼၢင်း ၼႂ်းဢိူင်ႇပၢင်ႇၶမ်း ဢမ်ႇယွမ်းမွၵ်ႈ 20 ၵမ်း ၊ မိူဝ်ႈၶၢဝ်းယၢမ်း ၵၢင်ၼႂ် 10 : 55 မူင်း ၼၼ်ႉ သွင် ၾၢႆႇၶိုၼ်းသိုပ်ႇပဵၼ်ပၢင်တိုၵ်းၵၼ်ထႅင်ႈ ႁိမ်းတိၼ်လွႆတေးမိူင်း ဢၼ်မီးၾၢႆႇဢွၵ်ႇလွႆတေးမိူင်း ဢိူင်ႇၸေႈ လၢၼ်ႉ ၸေႈဝဵင်းမူႇၸေႈ ၼၼ်ႉ လႄႈ တေႃႇထိုင်ၶၢဝ်းယၢမ်း ၵၢင်ဝၼ်း 12:20 မူင်းၼႆႉၵေႃႈ သဵင် မၢၵ်ႇလူင် တိုၵ်ႉပၼ်းဝႆႉယူႇ ၼႆယဝ်ႉ။

တေႇၸဵမ်မိူဝ်ႈ ဝၼ်းထီႉ 17/09/2023 မႃး တေႃႇထိုင်မိူဝ်ႈၼႆႉ ၼႂ်းၶၢဝ်းတၢင်းသၢမ်ဝၼ်းထပ်းၵၼ် ၶွင်ႇသီႇသိုၵ်း မၢၼ်ႈ တင်း တပ်ႉသိုၵ်းပူတ်းပွႆႇၸိူဝ်ႉၸၢတ်ႈတဢၢင်း TNLA ၶိုၼ်းတေႇပဵၼ်ပၢင်တိုၵ်းၵၼ်မႃးၼႂ်းဢိူင်ႇ ပၢင်ႇ ၶမ်း ၊ ဢိူင်ႇၸေႈလၢၼ်ႉ ၸေႈဝဵင်းမူႇၸေႈ ၼၼ်ႉသေ ၵူၼ်းမိူင်းပိုၼ်ႉတီႈ လႆႈဢွၼ်ၵၼ် ပၢႆႈၽၢတ်ႇ ယၢၼ် ႁိူၼ်းယေး ၵႂႃႇသွၼ်ႈယူႇဝႆႉဢွင်ႈတီႈလွတ်ႈၽေး လၢႆတီႈ လၢႆတၢင်း ၊ ဢၼ်တိုၵ်ႉပၢႆႈၵေႃႈသိုပ်ႇပၢႆႈထႅင်ႈ ယူႇ လႄႈ သဵၼ်ႈမၢႆႁူဝ်ယွႆႈၵူၼ်းပၢႆႈၽေးပၢင်တိုၵ်းတေႉ ပႆႇလႆႈႁူႉၸွမ်း ၼႆယူႇယဝ်ႉ။