SSPPInfo
18/09/2023
ၶွင်ႇသီႇသိုၵ်းမၢၼ်ႈ တင်း တပ်ႉသိုၵ်းပူတ်းပွႆႇၸိူဝ်ႉၸၢတ်ႈတဢၢင်း TNLA ပဵၼ်ပၢင်တိုၵ်းၵၼ်ႁၢဝ်ႈႁႅင်း ႁိမ်းဝၢၼ်ႈဝဵင်းၼၢင်း ဢိူင်ႇပၢင်ႇၶမ်း ၸေႈဝဵင်းမူႇၸေႈ ၸေႈတွၼ်ႈမူႇၸေႈ ၸိုင်ႈတႆးပွတ်းႁွင်ႇ ။
မိူဝ်ႈၼႆႉဝၼ်းထီႉ 18/09/2023 တေႇဢဝ်ၶၢဝ်းယၢမ်း 15:00 မူင်း ၼၼ်ႉ ၶွင်ႇသီႇသိုၵ်းမၢၼ်ႈတင်း တပ်ႉသိုၵ်း ပူတ်းပွႆႇၸိူဝ်ႉၸၢတ်ႈတဢၢင်း TNLA လႆႈပဵၼ်ပၢင်တိုၵ်း ၵၼ်ႁၢဝ်ႈႁႅင်း တီႈၾၢႆႇၸၢၼ်း ဝၢၼ်ႈဝဵင်းၼၢင်း ယၢၼ် ၵႆဝၢၼ် မွၵ်ႈ (150 meter) ၼႂ်းဢိူင်ႇဝဵင်းၼၢင်း ၸေႈဝဵင်း မူႇၸေႈ တေႃႇထိုင်ယၢမ်း 16:30 မူင်း ၼႆႉၵေႃႈ တိုၵ်ႉပဵၼ် ပၢင်တိုၵ်းၵၼ်ယူႇလႄႈ လွင်ႈမၢတ်ႇၸဵပ်းလူႉတၢႆ ၼႂ်းပၢင်တိုၵ်းတေႉ ပႆႇလႆႈႁူႉၸွမ်း။
ယွၼ်ႉပၢင်တိုၵ်းသေ ႁဵတ်းႁႂ်ႈၸၢၵ်ႇမၢၵ်ႇ သဵၼ်တိူဝ်ႉ ၺႃး ႁိူၼ်းယေးၵူၼ်းဝၢၼ်ႈ လႄႈ ၵူၼ်းမိူင်းပိုၼ်ႉတီႈ ၼႂ်းဝၢၼ်ႈဝဵင်းၼၢင်းၵေႃႈ လႆႈဢွၼ်ၵၼ် ပၢႆႈၵႂႃႇ တၢင်းဝၢၼ်ႈပၢင်ႇၶမ်း ၊ဝဵင်းမူႇၸေႈ ၸဵမ်ၸိူဝ်းၼႆႉယူႇယဝ်ႉ။
ယွၼ်ႉသွင်ၾၢႆႇ တိုၵ်ႉပဵၼ်ပၢင်တိုၵ်ႉၵၼ်သေ တိုၵ်ႉမႅၼ်ႈ ၽွင်း ၵူၼ်းမိူင်းပိုၼ်ႉတီႈတိုၵ်ႉဢွၼ်ၵၼ်ပၢႆႈယူႇလႄႈ သဵၼ်ႈမၢႆၵူၼ်းပၢႆႈၽေး ႁူဝ်ယွႆႈတေႉ ပႆႇလႆႈႁူႉၸွမ်း။
