ၶွင်ႇသီႇသိုၵ်းမၢၼ်ႈ တင်း တပ်ႉသိုၵ်းပူတ်းပွႆႇၸိူဝ်ႉၸၢတ်ႈတဢၢင်း TNLA သိုပ်ႇပဵၼ်ပၢင်တိုၵ်းထပ်းၵၼ်ထႅင်ႈ ၼႂ်းဢိူင်ႇၼမ်ႉဢုမ် ၊ ဢိူင်ႇၸေႈလၢၼ်ႉ ၸေႈဝဵင်းမူႇၸေႈ ၸိုင်ႈတႆးပွတ်းႁွင်ႇ ။

မိူဝ်ႈၼႆႉဝၼ်းထီႉ 29/08/2023 ၶၢဝ်းယၢမ်းၵၢင်ၼႂ် 08:00 မူင်းၼၼ်ႉ ၾၢႆႇၶွင်ႇသီႇသိုၵ်းမၢၼ်ႈ ယူႇတီႈသၼ်လွႆ ၸၢၼ်းသႃႇဢၼ်မီး ၾၢႆႇဢွၵ်ႇ ဝၢၼ်ႈၸေႈလၢၼ်ႉၼၼ်ႉ သေ ယိုဝ်းၵွင်ႈလူင်သႂ်ႇ ၸွမ်းလွႆတေးမိူင်း တီႈဢၼ် တပ်ႉသိုၵ်းပူတ်းပွႆႇၸိူဝ်ႉၸၢတ်ႈတဢၢင်း TNLA ယူႇသဝ်းတူင်ႉၼိုင်ဝႆႉၼၼ်ႉ တီႈၼိုင်ႈ လႄႈ မိူဝ်ႈၶၢဝ်းယၢမ်း ၵၢင်ၼႂ် 09:00 ၼၼ်ႉ သွင်ၾၢႆႇၶိုၼ်းပဵၼ်ပၢင်တိုၵ်းၵၼ် တီႈႁိမ်းလွႆသူးတွင်း ၼႂ်းဢိူင်ႇ ၸေႈလၢၼ်ႉ ၸေႈဝဵင်း မူႇ ၸေႈ ၼၼ်ႉ ယူႇယဝ်ႉ။

မိူဝ်ႈၶၢဝ်းယၢမ်း ၵၢင်ၼႂ် 10:27 မူင်းၼၼ်ႉၵေႃႈ ၶွင်ႇသီႇသိုၵ်းမၢၼ်ႈတင်း တပ်ႉသိုၵ်းပူတ်းပွႆႇၸိူဝ်ႉၸၢတ်ႈတ ဢၢင်း TNLA ၶိုၼ်းပဵၼ်ပၢင်တိုၵ်းၵၼ်ထႅင်ႈ ၸွမ်းသၼ်လွႆ ၾၢႆႇတူၵ်း ဝၢၼ်ႈၼမ်ႉဢုမ် ဢၼ်ယၢၼ် ၵႆဝၢၼ်ႈ ၼမ်ႉဢုမ် မွၵ်ႈ (2) လၵ်း ၼႂ်းဢိူင်ႇၼမ်ႉဢုမ် ၸေႈဝဵင်းမူႇၸေႈ ၼၼ်ႉသေ တေႃႇထိုင်ၶၢဝ်းယၢမ်း ၵၢင်ၼႂ် 11:00 ၵေႃႈသဵင်ၵွင်ႈသဵင်မၢၵ်ႇပႆႇယဵၼ် ၊ လွင်ႈလူႉတၢႆမၢတ်ႇၸဵပ်းၼႂ်းပၢင်တိုၵ်းၵေႃႈ ပႆႇလႆႈႁူႉၸွမ်း။

မိူဝ်ႈဝႃးဝၼ်းထီႉ 28/08/2023 တင်ႈတေႇဢဝ်ၶၢဝ်းယၢမ်းၵၢင်ၼႂ် 10:30 မူင်း တေႃႇပေႃးထိုင် ၶၢဝ်းယၢမ်း 16:00 မူင်း ၼၼ်ႉၵေႃႈ ၶွင်ႇသီႇသိုၵ်းမၢၼ်ႈတင်း တပ်ႉသိုၵ်းပူတ်းပွႆႇၸိူဝ်ႉၸၢတ်ႈတဢၢင်း TNLA လႆႈပဵၼ် ပၢင်တိုၵ်း ၵၼ် ၼႂ်းဢိူင်ႇ ၼမ်ႉဢုမ် ၊ ဢိူင်ႇၸေႈလၢၼ်ႉ ၸေႈဝဵင်းမူႇၸေႈၼၼ်ႉလၢႆလၢႆတီႈသေ ယွၼ်ႉပၢင်တိုၵ်းလႄႈ ႁူင်း ႁဵၼ်းသွၼ်လိၵ်ႈ ဝၢၼ်ႈၵွင်းဝဵင်း ၼႂ်းဢိူင်ႇၼမ်ႉဢုမ်ၼၼ်ႉ လႆႈပိၵ်ႉဢိုတ်းဝႆႉၸူဝ်ႈၶၢဝ်းသေဢမ်ႇၵႃး မိူဝ်ႈၶွင်ႇ သီႇသိုၵ်း မၢၼ်ႈ ၸႂ်ႉမၢၵ်ႇလူင်သေ ပိုတ်းယိုဝ်းၸူး တပ်ႉသိုၵ်းပူတ်းပွႆႇၸိူဝ်ႉၸၢတ်ႈတဢၢင်း TNLA တီႈၼိူဝ် သၼ်လွႆတေး မိူင်းၼၼ်ႉ မၢၵ်ႇလူင်တူၵ်းတႅၵ်ႇတိူဝ်ႉၺႃး ဝတ်ႉၵျွင်းမုၼ်ၸဝ်ႈ လွႆတေးမိူင်း လႆႈလူႉၵွႆၵႂႃႇၸွမ်းထႅင်ႈ ၼႆယူႇယဝ်ႉ။

#shanstateprogressparty

#shanstatearmy

#ၶွင်ႇသီႇသိုၵ်းမၢၼ်ႈ

#TNLA#ပၢင်တိုၵ်း

#ၸေႈဝဵင်းမူႇၸေႈ