SSPPInfo
23/09/2023

ယွၼ်ႉၶွင်ႇသီႇသိုၵ်းမၢၼ်ႈ တင်း တပ်ႉသိုၵ်းပူတ်းပွႆႇၸိူဝ်ႉၸၢတ်ႈတဢၢင်း TNLA ပဵၼ်ပၢင်တိုၵ်း (6) ဝၼ်းထပ်း ၵၼ် ၼႂ်း ၸေႈဝဵင်းမူႇၸေႈ သေ မၢၵ်ႇလူင်တူၵ်းတိူဝ်ႉၺႃး ႁိူၼ်းၵူၼ်းမိူင်း ၊ ဝတ်ႉၵျွင်း လႄႈ ၵူၼ်းမိူင်းၼႂ်းပိုၼ်ႉ တီႈ (200) ၵေႃႉပၢႆ လႆႈဢွၼ်ၵၼ် ပၢႆႈၽေးပၢင်တိုၵ်း ၼႆယူႇယဝ်ႉ။

တင်ႈတေႇဢဝ် ဝၼ်းထီႉ 17-22/09/2023 ၼႂ်းၶၢဝ်းတၢင်း (6) ဝၼ်းထပ်းၵၼ်ၼႆႉ ၶွင်ႇသီႇသိုၵ်းမၢၼ်ႈ တင်း တပ်ႉသိုၵ်းပူတ်းပွႆႇၸိူဝ်ႉၸၢတ်ႈ တဢၢင်း TNLA လႆႈပဵၼ်ပၢင်တိုၵ်းၵၼ် ၼႂ်းဢိူင်ႇပၢင်ႇၶမ်း ၊ ဢိူင်ႇၸေႈလၢၼ်ႉ ၸေႈဝဵင်းမူႇၸေႈ သေ ႁဵတ်းႁႂ်ႈမၢၵ်ႇလူင် တူၵ်းတိူဝ်ႉၺႃး ႁိူၼ်းၵူၼ်းမိူင်းပိုၼ်ႉတီႈ ဝၢၼ်ႈၸၢၼ်းသႃႇ ဢိူင်ႇ ပၢင်ႇၶမ်း လႆႈလူႉၵွႆၸွမ်း (2) လင် ၊ တိူဝ်ႉၺႃး ဝတ်ႉၵျွင်း တီႈလွႆသူးတွင်း လႆႈလူႉၵွႆၸွမ်း သေဢမ်ႇၵႃး ၸၢၵ်ႇ မၢၵ်ႇသဵၼ်တိူဝ်ႉၺႃး ၸဝ်ႈသြႃႇ ဢေႃးၸေႇယ လႆႈမၢတ်ႇၸဵပ်း ၸွမ်းႁူဝ် ၊ ၸွမ်းတိၼ် ၊ ၸွမ်းၶႃ ၊ ၸွမ်းၶႅၼ် ၸဵမ်ၸိူဝ်းၼႆႉ လႄႈ လႆႈဢဝ်သူင်ႇယူတ်းယႃတူဝ်ဝႆႉ တီႈႁူင်းယႃလူင် ဝဵင်းမူႇၸေႈယူႇယဝ်ႉ။

လိူဝ်သေၼၼ်ႉ မိူၼ်ၼင်ႇၵူၼ်းမိူင်းပိုၼ်ႉတီႈ ဝၢၼ်ႈၵၢင် ၊ ဝၢၼ်ႈၼမ်ႉၵတ်း ၊ ဝၢၼ်ႈထမ်ႈ ၊ ဝၢၼ်ႈၸေႈလၢၼ်ႉ ၼႂ်းဢိူင်ႇၸေႈလၢၼ်ႉ ႁူဝ်ၵူၼ်း (253) ၵေႃႉ ၊ ဝၢၼ်ႈဝဵင်းၼၢင်း ၊ ဝၢၼ်ႈ ၸၢၼ်းသႃႇ ၊ ဝၢၼ်ႈႁူဝ်ပေႃႈ ၼႂ်းဢိူင်ႇ ပၢင်ႇၶမ်း ႁူဝ်ၵူၼ်း (45) ၵေႃႉ တၢင်းမူတ်းႁူမ်ႈသဵင်ႈ (298) ၵေႃႉ လႆႈဢွၼ်ၵၼ် ပၢႆႈၽေးပၢင်တိုၵ်း ၵႂႃႇသွၼ်ႈ ယူႇဝႆႉတီႈ ႁူင်းၵူၼ်းၼုမ်ႇ ဝၢၼ်ႈၼိမ် ၊ ၵျွင်းမုၼ်ၸဝ်ႈ ဝၢၼ်ႈၼွင်လွင်း ၊ ၵျွင်းမုၼ်ၸဝ်ႈဝၢၼ်ႈပၢင်ႇၶမ်း လႄႈ ၸွမ်းႁိူၼ်းပီႈၼွင်ႉ ၼႂ်းဝၢၼ်ႈတိုင်းလူင် ဢိူင်ႇပၢင်ႇၶမ်း ၸေႈဝဵင်းမူႇၸေႈ ၸဵမ်ၸိူဝ်းၼႆႉယူႇယဝ်ႉ။

တေႃႇထိုင်ယၢမ်းလဵဝ်ၵေႃႈ သွင်ၾၢႆႇ တိုၵ်ႉသိုပ်ႇၽိူမ်ႉထႅမ်ႁႅင်း ၶဵင်ႈၶႅင်ၼႃႈသိုၵ်းတေႃႇၵၼ်ဝႆႉယူႇ ၼႂ်းပိုၼ်ႉတီႈ ဢိူင်ႇၸေႈလၢၼ်ႉ ၊ ဢိူင်ႇပၢင်ႇၶမ်း ၸဵမ်ၸိူဝ်းၼႆႉလႄႈ ၵူၼ်းမိူင်းပိုၼ်ႉတီႈ ဢၼ်ပၢႆႈၽေး ပႆႇႁတ်းပွၵ်ႈၶိုၼ်း ႁိူၼ်း သေ လူဝ်ႇတၢင်းၸွႆႈထႅမ်ဝႆႉ လွင်ႈၵိၼ်ယမ်ႉ ၊ လွင်ႈၵၢၼ်ၸွႆႈတူၺ်းထိုင် ပၢႆးယူႇလီ ၸဵမ်ၸိူဝ်းၼႆႉ ယူႇ ယဝ်ႉ။