ၽူႈမီးပုၼ်ႈၽွၼ်းၾၢႆႇတပ်ႉၾၢႆႇဢုပ်ႉပိူင်ႇ SSPP/SSA ဢၼ်ပၵ်းသဝ်းတူင်ႉၼိုင် ၼႂ်းၸေႈဝဵင်းသႅၼ်ဝီၼၼ်ႉ ႁူမ်ႈမိုဝ်းပေႃႈမႄႈၵူၼ်းမိူင်းသေ ဢွၼ်ဢဝ်လုၵ်ႈၼွင်ႉ ၵေႃႉသိုၵ်းၵေႃႉႁၢၼ် ၶဝ်ႈၵူတ်ႇထတ်း တီႉၺွပ်းၵူၼ်း သူႇသမ်း ၵိၼ် ယႃႈမဝ်းၵမ် ၼႂ်းၸေႈဝဵင်းသႅၼ်ဝီ ၸိုင်ႈတႆးပွတ်းႁွင်ႇ ။
ယူႇတီႈပေႃႈမႄႈၵူၼ်းမိူင်း ယွၼ်းတၢင်းႁူမ်ႈမိုဝ်းၸူးတီႈ ၽူႈမီးပုၼ်ႈၽွၼ်း SSPP/SSA ဢၼ်တူင်ႉၼိုင်ပၵ်းသဝ်း ၼႂ်းပိုၼ်ႉတီႈ ၼၼ်ႉ သေ မိူဝ်ႈဝၼ်းထီႉ 26-08-2023 ၵၢင်ဝၼ်း 12:00 မူင်း တေႃႇထိုင် 15: 00 မူင်းၼၼ်ႉ ၽူႈမီးပုၼ်ႈၽွၼ်း ၾၢႆႇတပ်ႉၾၢႆႇဢုပ်ႉပိူင်ႇ SSPP/SSA ႁႅင်း ၵူၼ်း (11 ) ၵေႃႉ လႆႈၶဝ်ႈၵူတ်ႇလၢင်ႉတိၺွပ်း ပၢင်ၶၢႆယႃႈ ၼႂ်းပိုၼ်ႉတီႈ ဢိူင်ႇပၢင်ႇလေႃႉ ၸေႈဝဵင်းသႅၼ်ဝီ လႄႈ တီႉ ၺွပ်းလႆႈ ၵူၼ်းၵဵဝ်ႇၶွင်ႈယႃႈမဝ်းၵမ် (9) ၵေႃႉ၊ ႁူမ်ႈပႃးၶိူင်ႈၵဵဝ်ႇၶွင်ႈၵၢၼ်သူႇ၊ သမ်း၊ ၵိၼ်၊ ၶၢႆ ယႃႈမဝ်းၵမ်ၸဵမ်ၸိူဝ်းၼႆႉ ယူႇယဝ်ႉ။
ၵူၼ်းဢၼ်ၵဵဝ်ႇၶွင်ႈယႃႈမဝ်းၵမ် (9) ၵေႃႉၼၼ်ႉ ဢၢႆႈထုၼ်း ဢႃႇယု (25) ၶူပ်ႇ တီႈယူႇၸေႈဝဵင်းၵျွၵ်ႉမႄး ၊ လုင်းသူၺ်ႇၶမ်း ဢႃႇယု (50) ၶူပ်ႇ တီႈယူႇဝၢၼ်ႈၵျွင်းၶမ်း ဢိူင်ႇပၢင်ႇလေႃႉ ၸေႈဝဵင်းသႅၼ်ဝီ ၊ ၸၢႆးၼၼ်ႇတႃႇ ဢႃႇယု (39) ၶူပ်ႇ ဢိူင်ႇပၢင်လေႃႉၸေႈဝဵင်းသႅၼ်ဝီ ၊ လႃႉဢၢႆႈ ဢႃႇယု (35) ၶူပ်ႇ တီႈယူႇဝၢၼ်ႈပဵင်းႁုင်း ဢိူင်ႇၼမ်ႉၸလၢပ်ႈ ၸေႈဝဵင်းသႅၼ်ဝီ ၊ ၸၢႆးလႅင်း ဢႃႇယု (30) ၶူပ်ႇ ယူႇဝၢၼ်ႈၸၢၵ်ႈ ၸေႈဝဵင်းၵူတ်ႉၶၢႆ ၊ လႃႉဢၢႆႈ ဢႃႇယု (29) ၶူပ်ႇ ယူႇဝၢၼ်ႈပၢင်ၸူင် ဢိူင်ႇပၢင်လေႃႉ ၸေႈဝဵင်းသႅၼ်ဝီ ၊ၽူဝ်ဝူၺ်ႇ ဢႃႇယု (33) ၶူပ်ႇ ဢိူင်ႇပၢင်ႇလေႃႉ ၸေႈဝဵင်းသႅၼ်ဝီ ၊ လုင်းမျႅတ်ႈ ဢႃႇယု(33) ၶူပ်ႇ ယူႇဝၢၼ်ႈလွၵ်ႉၸွၵ်ႇ ဢိူင်ႇပၢင်လေႃႉ ၸေႈဝဵင်းသႅၼ်ဝီ၊ လုင်းမွၵ်ႇၶမ်း ဢႃႇယု (53) ၶူပ်ႇ ယူႇဝၢၼ်ႈတႅင်ႇယဵတ်ႉ ဢိူင်ႇပၢင်လေႃႉ ၸေႈဝဵင်းသႅၼ်ဝီ ၸဵမ်ၸိူဝ်း ၼႆႉယူႇယဝ်ႉ။
ၼင်ႇႁိုဝ်ပေႃႈမႄႈၵူၼ်းမိူင်းႁဝ်း ပေႃႈတေလွတ်ႈၽေး ၵၢင်းၵႆ ယႃႈမဝ်းၵမ်ၼႆႉ တေသိုပ်ႇႁူမ်ႈမိုဝ်းၸွမ်း ပေႃႈမႄႈ ၵူၼ်းမိူင်းလႄႈ တေၶတ်းၸႂ်ၽဵဝ်ႈမူၺ်ႉ ယႃႈမဝ်းၵမ်ၵႂႃႇ ၸွမ်းၼင်ႇမူႇပိူင် ပႃႇတီႇမႂ်ႇသုင်ၸိုင်ႈတႆး တပ်ႉသိုၵ်းၸိုင်ႈတႆး SSPP/SSA မီးဝႆႉၼၼ်ႉ ယူႇယဝ်ႉ။
