ၵူၼ်းမိူင်းလႆႈပၢႆႈၽေး ယွၼ်ႉၶွင်ႇသီႇသိုၵ်းမၢၼ်ႈတင်း PDF ပဵၼ်ပၢင်တိုၵ်းၵၼ် ၼႂ်းၸေႈဝဵင်းၼွင်ၶဵဝ်
ၶွင်ႇသီႇသိုၵ်းမၢၼ်ႈတင်း ၸုမ်းၵႅတ်ႇၶႄၵူၼ်းမိူင်း MDY PDF ပိုတ်းယိုဝ်းပဵၼ်ပၢင်တိုၵ်းၵၼ် ၼႂ်းၸေႈဝဵင်း ၼွင်ၶဵဝ် ၼႂ်းၼႃႈတီႈဢုပ်ႉပိူင်ႇ ပႃႇတီႇမႂ်ႇသုင်ၸိုင်ႈတႆးတပ်ႉသိုၵ်းၸိုင်ႈတႆး SSPP/SSA ၸေႈဝဵင်းမၢႆ(22) ၼၼ်ႉ လႄႈ ၵူၼ်းမိူင်း ပိုၼ်ႉတီႈ (100) ၵေႃႉပၢႆ လႆႈဢွၼ်ၵၼ်ပၢႆႈၽေးပၢင်တိုၵ်း သေပႆႇႁတ်းပွၵ်ႈၶိုၼ်းႁိူၼ်း ၼႆ ယူႇယဝ်ႉ။
မိူဝ်ႈဝၼ်းထီႉ 26/08/2023 တေႇၶၢဝ်းယၢမ်း ၵၢင်ၼႂ် 10:45 မူင်း ၼၼ်ႉ ၸုမ်းၵႅတ်ႇၶႄၵူၼ်းမိူင်း MDY PDF ၶဝ် ယူႇၾၢႆႇဢွၵ်ႇ ဝၢၼ်ႈႁူဝ်ၶူဝ် ဢိူင်ႇႁူဝ်ၶူဝ် ၸေႈဝဵင်းၼွင်ၶဵဝ် ၼၼ်ႉသေ ယိုဝ်းမၢၵ်ႇလူင်ၸူး ၶွင်ႇသီႇသိုၵ်း မၢၼ်ႈ မၢႆတပ်ႉ (252/257) ဢၼ်တိုၵ်ႉမီးဝႆႉ တီႈၾၢႆႇ ၸၢၼ်းဝၢၼ်ႈ ႁူဝ်ၶူဝ် ၼၼ်ႉလႄႈ သွင်ၾၢႆႇ လႆႈပဵၼ်ပၢင်တိုၵ်း ၵၼ် တေႃႇထိုင်ၶၢဝ်းယၢမ်း ၵၢင်ၼႂ် 11:05 မူင်း ပွၵ်ႈၼိုင်ႈ ၊ ထိုင်မႃးၶၢဝ်းယၢမ်း 15:30 မူင်းၼၼ်ႉ သၢႆသိုၵ်း ၶွင်ႇသီႇ သိုၵ်းမၢၼ်ႈ မၢႆတပ်ႉ (252/257) ႁူမ်ႈၵၼ် ႁႅင်းသိုၵ်း မွၵ်ႈ (100) ၵေႃႉ ၶိုၼ်းတူင်ႉၼိုင်ၶဝ်ႈၸူး ၼႂ်းဝၢၼ်ႈ ႁူဝ် ၶူဝ်ၼၼ်ႉသေ သွင်ၾၢႆႇၶိုၼ်းသိုပ်ႇ ပဵၼ်ပၢင်တိုၵ်းၵၼ် ႁိမ်းဝၢၼ်ႈႁူဝ်ၶူဝ်ထႅင်ႈ ၶၢဝ်းတၢင်းႁိုင် 15 ပႅၵ်ႉ လွင်ႈလူႉတၢႆမၢတ်ႇၸဵပ်း တၢင်းသွင်ၾၢႆႇ တေႉ ဢမ်ႇလႆႈ ႁူႉၸွမ်း ။
ယွၼ်ႉၶွင်ႇသီႇသိုၵ်းမၢၼ်ႈ တင်း ၸုမ်းၵႅတ်ႇၶႄၵူၼ်းမိူင်း MDY PDF ပိုတ်းယိုဝ်းၵၼ် ႁိမ်းဝၢၼ်ႈ/ၼႂ်းဝၢၼ်ႈ ႁူဝ်ၶူဝ် ၼၼ်ႉလႄႈ ၵူၼ်းမိူင်းပိုၼ်ႉတီႈ ဝၢၼ်ႈႁူဝ်ၶူဝ် လႆႈဢွၼ် ၵၼ်ပၢႆႈၽေးသိုၵ်း ၵႂႃႇသွၼ်ႈ ယူႇဝႆႉတီႈ ဝတ်ႉၵျွင်း မုၼ် ၸဝ်ႈ ဝၢၼ်ႈၵိဝ်ႇဢၢင်း ၸၢႆး (51) ၵေႃႉ ၊ ယိင်း (62) ၵေႃႉ ႁူမ်ႈၵၼ်တၢင်းမူတ်း (113) ၵေႃႉ ၼႆယူႇယဝ်ႉ။
တေႃႇထိုင်မိူဝ်ႈၼႆႉ ဝၼ်းထီႉ 27/08/2023 ၼႆႉၵေႃႈ သွင်ၾၢႆႇတိုၵ်ႉထႅမ်ႁႅင်းသိုၵ်း ၶဵင်ႈၶႅင်ၼႃႈသိုၵ်း တေႃႇ ၵၼ်ဝႆႉလႄႈ ၵူၼ်းမိူင်းပိုၼ်ႉတီႈ ၸိူဝ်းဢၼ်ပၢႆႈၽေးၼၼ်ႉယွၼ်ႉမႆႈၸႂ် ၵူဝ်ပဵၼ်ပၢင်တိုၵ်း ထႅင်ႈသေ ပႆႇႁတ်းပွၵ်ႈ ၶိုၼ်းႁိူၼ်း ၼႆယူႇယဝ်ႉ။
Photo – Credit
