ၶွင်ႇသီႇသိုၵ်းမၢၼ်ႈ တေႇပိုတ်ႇပၢင်တိုၵ်း ယိုဝ်းၵွင်ႈလူင်သႂ်ႇ ပႃႇတီႇမႂ်ႇသုင်ၸိုင်ႈတႆး တပ်ႉသိုၵ်းၸိုင်ႈတႆး SSPP/SSA ၼႂ်းၸေႈဝဵင်းလၢႆးၶႃႈ ၸိုင်ႈတႆးပွတ်း ၸၢၼ်း။
မိူဝ်ႈၼႆႉ ဝၼ်းထီႉ 05/08/2023 ၶၢဝ်းယၢမ်း ဝၢႆးဝၼ်း 17:25 မူင်းၼၼ်ႉ ၶွင်ႇသီႇသိုၵ်းမၢၼ်ႈ လုၵ်ႉဢဝ်တီႈၵွင်းၸဝ်ႈမိူင်းဝၢၼ်ႈၵုင်းယၢင်းတီႈၼိုင်ႈ ၵွင်းၸဝ်းမိူင်း ဝၢၼ်ႈပၢင်ႇလႅင်းတီႈၼိုင်ႈ သေ ယိုဝ်းၵွင်ႈလူင် (81MM) ၸူး ႁိမ်းႁွမ်းၸိူဝ်း သၢႆသိုၵ်းပႃႇတီႇမႂ်ႇသုင်ၸိုင်ႈတႆးတပ်ႉသိုၵ်းၸိုင်ႈတႆး SSPP/SSA တူင်ႉၼိုင် ၸိူဝ်းၼႂ်းဢိူင်ႇ ႁၢႆးသႅင် လႄႈ ၸိူဝ်းၸဵင်ႇ ၸၢၼ်းဝၼ်းတူၵ်း ၸေႈဝဵင်းလၢႆးၶႃႈၼၼ်ႉ တေႃႇထိုင်ယၢမ်းလဵဝ် ၶၢဝ်းယၢမ်း 18:40 ၼႆႉ မီးထိုင်ဢမ်ႇယွမ်း(10) လုၵ်ႈ ၼႆယူႇယဝ်ႉ။
ယူႇတီႈၾၢႆႇပႃႇတီႇမႂ်ႇသုင်ၸိုင်ႈတႆးတပ်ႉသိုၵ်းၸိုင်ႈတႆး SSPP/SSA ၵေႃႈ ႁၢင်ႈႁႅၼ်း ဢဝ်တီႈယူႇပေႉပုၼ်ႈဝႆႉသေ သင်ၸိူဝ်ႉဝႃႈ ၾၢႆႇၶွင်ႇသီႇသိုၵ်းမၢၼ်ႈ ဢမ်ႇၵိုတ်း သေ တေသိုပ်ႇယိုဝ်းယူႇၼႆၸိုင် သွင်ၾၢႆႇၸၢင်ႈပဵၼ် ပၢင်တိုၵ်းၵၼ်မႃး ႁၢဝ်ႈႁၢဝ်ႈႁႅင်းႁႅင်းယူႇယဝ်ႉ။
ၼႂ်းၸေႈဝဵင်းလၢႆးၶႃႈ ဢွင်ႈတီႈၸိူဝ်းဢၼ် ပႃႇတီႇမႂ်ႇသုင်ၸိုင်ႈတႆးတပ်ႉသိုၵ်းၸိုင်ႈတႆး SSPP/SSA တူင်ႉၼိုင်ပၵ်းသဝ်း တႃႇ 10 ဢွင်ႈတီႈၼၼ်ႉ ယူႇတီႈၶွင်ႇသီႇသိုၵ်းမၢၼ်ႈ သင်ႇႁႂ်ႈ ထွႆပၼ်လၢႆပွၵ်ႈလၢႆၵမ်းၵေႃႈ ၾၢႆႇပႃႇတီႇမႂ်ႇသုင် ၸိုင်ႈတႆးတပ်ႉသိုၵ်းၸိုင်ႈတႆး SSPP/SSA တိုၼ်းဢမ်ႇထွႆပၼ်လႆႈလႄႈ သွင်ၾၢႆႇလႆႈၶဵင်ႈၶႅင်ၼႃႈသိုၵ်း တေႃႇ ၵၼ်မႃး တၢင်းႁိုင်ယူႇယဝ်ႉ။
