မိူဝ်ႈၼႆႉ ဝၼ်းထီႉ 16 လိူၼ်ဢေႃးၵၢသ်ႉ 2023 ၶၢဝ်းယၢမ်း ၵၢင်ၼႂ် 8:16 မူင်း တေႃႇထိုင်ၵၢင်ၼႂ် 9 : 56 မူင်း ၼၼ်ႉ ယူႇတီႈ ငဝ်ႈငုၼ်း ပႃႇတီႇမႂ်ႇသုင်ၸိုင်ႈတႆး တပ်ႉသိုၵ်းၸိုင်ႈတႆး SSPP/SSA ဢွၼ်ႁူဝ်ၸတ်းႁဵတ်းပၢင် ၵႅဝ်ႈ ပႃႇတီႇမႂ်ႇသုင်ၸိုင်ႈတႆး SSPP ၶွပ်ႈတဵမ် (52) ပီႊ ဢွင်ႈတီႈလၵ်းသဝ်ႁိၼ် ဢိူင်ႇၶုမ်ႇပၢင် ၸေႈဝဵင်းၵေးသီး ၸိုင်ႈတႆးပွတ်းၸၢၼ်း။
ၼႂ်းပၢင်ၵႅဝ်ႈၼၼ်ႉ တေမီးလွင်ႈတူင်ႉၼိုင် မိူၼ်ၼင်ႇ သၢႆသိုၵ်း လႄႈ ၵူၼ်းမိူင်း ဢဝ်တီႈယူႇ တၵ်ႉယမ် ၸွမ် ပိဝ်ၸိုင်ႈမိူင်း ၊ ၸွမ်ပိဝ်ပႃႇတီႇမႂ်ႇသုင်ၸိုင်ႈတႆး ၊ ၸွမ်ပိဝ်တပ်ႉသိုၵ်းၸိုင်ႈတႆး ၊ တၵ်ႉယမ်ၽူႈႁတ်းႁၢၼ်လုၵ်ႉ ၽိုၼ်ႉ ဢၼ်လႆႈလူႇၼိူဝ်ႉလိူတ်ႈသၢႆၸႂ်ၵႂႃႇ ပုၼ်ႈတႃႇၸိူဝ်ႉၸၢတ်ႈ ဝၢၼ်ႈမိူင်း ၊ ႁူမ်ႈတိူင်ႇၵၢဝ်ႇၵတိသႅတ်ႉၸႃႇ (4) ၶေႃႈ လႄႈ ၸွမ်သိုၵ်းလူင် သိူဝ်ထႅၼ်ႈ ၽူႈၼမ်းၼႃႈ ထီႉ-1 မွၵ်ႇလၢတ်ႈၶေႃႈၵႂၢမ်း ပိုတ်ႇပၢင်ၵႅဝ်ႈ ၊သပ်းလႅင်း ၼႄ ပိုၼ်းပဵၼ်မႃး ငဝ်းလၢႆးမိူဝ်ႈပူၼ်ႉ ၊ ငဝ်းလၢႆးမိူဝ်ႈလဵဝ် ပႅၵ်ႇပိူင်ႈ ၵၼ်ၸိူင်ႉႁိုဝ် ၸဵမ်ၸိူဝ်းၼႆႉ ယူႇယဝ်ႉ။
ဝၢႆးၸွမ်သိုၵ်းလူင်သိူဝ်ထႅၼ်ႈ မွၵ်ႇလၢတ်ႈၶေႃႈၵႂၢမ်းၵႂႃႇ ယဝ်ႉၼၼ်ႉ ၸဝ်ႈသိုၵ်းသႅင်ႁၢၼ် လူဢၢၼ်ႇၼႄ ပိုၼ်း ၵႅပ်ႈ ပႃႇတီႇမႂ်ႇသုင်ၸိုင်ႈတႆး ၸဵမ်ၸိူဝ်းၼႆႉသေ ၸဝ်ႈႁၢၼ် ၽုင်းႁၢၼ် ၶိုၼ်းသိုပ်ႇလူဢၢၼ်ႇၼႄ ၽိုၼ်လိၵ်ႈ ငဝ်ႈငုၼ်း တီႇမူဝ်ႇၶရေႇၸီႇ ၸိူဝ်ႉၶိူဝ်းတႆး ယိုၼ်ႈထိုင်ၸူးဝၼ်းၵိူတ်ႇ ပႃႇတီႇမႂ်ႇသုင်ၸိုင်ႈတႆး ၶွပ်ႈထူၼ်ႈ (52) ပီႊ ၼၼ်ႉယူႇယဝ်ႉ။
တီႈၼႂ်းပၢင်ၵႅဝ်ႈၼၼ်ႉ မီးၽူႈယႂ်ႇၵူၼ်းလူင်ၼႂ်းၵေႃႇမတီငဝ်ႈငုၼ်း ၶိုၼ်ႈႁွတ်ႈ (16) ၸဝ်ႈ ၊ ၵူႈတပ်ႉၵူႈႁွင်ႈ ၵၢၼ် (193) ၵေႃႉ ၊ ႁူင်းႁဵၼ်းသိုၵ်း ငဝ်ႈငုၼ်း သၢႆသိုၵ်း (560) ၵေႃႉ ၊ ႁူင်းႁဵၼ်းၾၢႆႇဢုပ်ႉပိူင်ႇ (471) ၵေႃႉ ၊ ႁူင်း ႁဵၼ်း ၼေႃႇတႅၼ်းၶိူဝ်း (70) ၵေႃႉ ၊ ၸုမ်းၼၢင်းယိင်း (20) ၵေႃႉ ၊ ႁူင်းႁဵၼ်းၽူႈမီးၸၼ်ႉ (80) ၵေႃႉ ၊ ႁွင်ႈၵၢၼ် (2) (80) ၵေႃႉ ၊ ပေႃႈမႄႈၵူၼ်းမိူင်းတီႈၸမ် (669) ၵေႃႉ သေ တၢင်းမူတ်းႁူမ်ႈသဵင်ႈ ၽူႈၶိုၼ်ႈႁွတ်ႈမီး (2159) ၵေႃႉယူႇယဝ်ႉ။
shanstateprogressparty
#shanstatearmy
