ပႃႇတီႇမႂ်ႇသုင်ၸိုင်ႈတႆး တပ်ႉသိုၵ်းၸိုင်ႈတႆႈ ၸတ်းပၢင်လူင်းလိုဝ်ႈပၢင်သွၼ် Computer ဢၼ်ပိုတ်ႇၽုၺ်ႇဝႆႉ တီႈႁူင်းသွၼ် Computer ငဝ်ႈငုၼ်း ၼႂ်းၶၢဝ်းတၢင်း ႁိူင်( 2 ) လိူၼ် ၼၼ်ႉယူႇယဝ်ႉ။
မိူဝ်ႈၼႆႉ ဝၼ်းထီႉ 21 / လိူၼ် August /2023 ၶၢဝ်းယၢမ်း 8 မူင်းၵၢင်ၼႂ် ယူႇတီႈၽူႈယႂ်ႇၵူၼ်းလူင်း ငဝ်ႈငုၼ်း SSPP/SSA ဢွၼ်ႁူဝ်သေ ၸတ်းႁဵတ်းပၢင်လူင်းလိုဝ်ႈပၢင်သွၼ် ဢၼ်တႄႇပိုတ်ႇၽုၺ်ႇမႃး မိူဝ်ႈလိူၼ် June (21) ဝၼ်း တေႃႇထိုင် လိူၼ် August (21) ဝၼ်း ၶၢဝ်းတၢင်းႁိူင် 2 လိူၼ် လႄႈ မီးၽူႈယႂ်ႇၵူၼ်းလူင် ၽူႈၼမ်း ၼႂ်း(1) ၸဝ်ႈသိုၵ်းလူင်ၵျေႃႇလႃႉ ၊ ၽူႈၼမ်းၼႂ်း(2) ၸဝ်ႈသိုၵ်းလူင်ၸၢႆးသူႉ ၊ ၸဝ်ႈသိုၵ်းလူင်ထိူၼ်ႇမိူင်း ၵႅမ် ၽူႈၸတ်းၵၢၼ် ၾၢႆႇဢုပ်ႉပိူင်ႇငဝ်ႈငုၼ်း လႄႈ ၽူႈယႂ်ႇၵူၼ်းလူင်း ၼႂ်းၵေႃႇမတီႇငဝ်ႈငုၼ်းလၢႆလၢႆၸဝ်ႈ ဢိၵ်ႇလုၵ်ႈႁဵၼ်း ၸၢႆး/ယိင်း ၶိုၼ်ႈႁွတ်ႈ ႁူမ်ႈသဵင်ႈ (69) ၸဝ်ႈ/ၵေႃႉ ယူႇယဝ်ႉ။
ၸွမ်းၼင်ႇၶၢဝ်းတၢင်း 2 လိူၼ်ဢၼ်လႆႈပူင်သွၼ်ပၼ်ၽူႈလဵပ်ႈႁဵၼ်း မိူၼ်ၼင်ႇၽႃႇသႃႇပူင်သွၼ် မီးဝႆႉ- ပိုၼ်ႉထၢၼ်လွၵ်းမိုဝ်း ၊ Microsoft Word ၊ Microsoft Publisher ၊ Power Point ၊ Excel ၊ Application Installation And Printing ၊ Photoshop ၊ လၢႆးၸႂ်ႉတိုဝ်း Internet ၸဵမ်ၸိူဝ်းၼႆႉယူႇယဝ်ႉ။
ၼႂ်းပၢင်ၵႅဝ်ႈၼၼ်ႉ မီးၽူႈၼမ်းၼႂ်း(2) မွၵ်ႇလၢတ်ႈၶေႃႈ ၵႂၢမ်းပိုတ်ႇပၢင် ၊ ၶူးပူင်သွၼ် လႄႈ လုၵ်ႈႁဵၼ်း မွၵ်ႇလၢတ်ႈၶေႃႈၵႂၢမ်းၶွပ်ႈၸႂ် ၊ ၽူႈၵွၼ်းႁွင်ႈၵၢၼ် Computer မွၵ်ႇလၢတ်ႈၶေႃႈၵႂၢမ်းသူင်ႇသၢင်ႇ လုၵ်ႈႁဵၼ်း ၸဵမ်ၸိူဝ်း ၼႆႉယူႇယဝ်ႉ။
ၼႂ်းဝၼ်းလူင်းလိုဝ်ႈပၢင်သွၼ် Computer ၼႆႉၽူႈယႂ်ႇ ၵူၼ်းလူင်လႆႈယိုၼ်ႈဢၢပ်ႈ ပၼ်ၶႅပ်းဝႂ်သူးလုၵ်ႈ ႁဵၼ်းၵတ်ႉၶႅၼ်ႇ သူးထီႉ (1) ၊ ထီႉ(2) ၊ ထီႉ(3) လုၵ်ႈႁဵၼ်း လႄႈ ယိုၼ်ႈဢၢပ်ႈပၼ်ၶႅပ်းဝႂ်ယွင်ႈယေႃး လုၵ်းႁဵၼ်း ၸဵမ်ၸိူဝ်းၼႆႉ ယူႇယဝ်ႉ ။
ၵၢၼ်ယုၵ်ႉမုၼ်းၼမ်ႉၵတ်ႉၵူၼ်းၼုမ်ႇ ၽၢႆႇ Computer ၼႆႉ ယူႇတီႈငဝ်ႈငုၼ်း ပႃႇတီႇမႂ်ႇသုင်ႇၸိုင်ႈတႆး တပ်ႉသိုၵ်းၸိုင်ႈတႆး SSPP/SSA ၶတ်းၸႂ်ပူၵ်းပွင်ပိုတ်ႇၽုၺ်ႇ ၶိုၼ်ႈမႃးထိုင် ၸုပ်ႈထီႉ (6) ယဝ်ႉလႄႈ ၊ မိူဝ်းၼႃႈမႃးၵေႃႈ ၼင်ႇႁိုဝ်ၵူၼ်းၼုမ်ႇႁဝ်းပေႃးတေမီးၼမ်ႉၵတ်ႉၶိုၼ်ႈသုင်မႃးၼၼ်ႉ ဢိင်ၼိူဝ်ငဝ်းလၢႆးသေ တိုၼ်းမီးၽႅၼ်ၵၢၼ်တႃႇတေသိုပ်ႇပိုတ်ႇၽုၺ်ႇၵႂႃႇထႅင်ႈယူႇယဝ်ႉ။
