ယူႇတီႈငဝ်ႈငုၼ်းပႃႇတီႇမႂ်ႇသုင်ၸိုင်ႈတႆးတပ်ႉသိုၵ်းၸိုင်ႈတႆး SSPP/SSA သေ လႆႈၸတ်းႁဵတ်းပၢင်ၵႅဝ်ႈ ၵိုတ်း လိုဝ်ႈ ပၢင်သွၼ် ၾၢႆႇဢုပ်ႉပိူင်ႇ ၸုပ်ႈထီႉ (18) ဢွင်ႈတီႈ ႁူင်း ႁဵၼ်း ၾၢႆႇဢုပ်ႉပိူင်ႇ တိုင်းလဵင်း ဢိူင်ႇၶုမ်ႇပၢင် ၸေႈဝဵင်းဝၢၼ်ႈႁႆး။
မိူဝ်ႈၼႆႉ ဝၼ်းထီႉ 22/08/2023 တေႇဢဝ်ၶၢဝ်းယၢမ်း ၵၢင်ၼႂ် 9:00 မူင်းၼၼ်ႉ ယူႇတီႈ ငဝ်ႈငုၼ်း ပႃႇတီႇမႂ်ႇသုင်ၸိုင်ႈတႆးတပ်ႉသိုၵ်းၸိုင်ႈတႆး SSPP/SSA လႆႈဢွၼ် ႁူဝ်ၸတ်းႁဵတ်း ပၢင်ၵႅဝ်ႈ ၵိုတ်းလိုဝ်ႈပၢင်သွၼ် ၾၢႆႇဢုပ်ႉပိူင်ႇ ဢွင်ႈတီႈ ႁူင်းႁဵၼ်း ၾၢႆႇဢုပ်ႉပိူင်ႇ တိုင်းလဵင်း တီႈငဝ်ႈငုၼ်း သေ ၼႂ်းၼၼ်ႉ မီးၽူႈယႂ်ႇ ၵူၼ်းလူင် ၸွမ်သိုၵ်းလူင်သိူဝ်ထႅၼ်ႈ ၊ ၽူႈၸတ်းၵၢၼ် ဢုပ်ႉပိူင်ႇငဝ်ႈငုၼ်း ၸွမ်ႁၢၼ်သၢႆၾႃႉ ၊ ၵႅမ်ၽူႈပွင် ၵၢၼ်သိုၵ်း ထီႉ(2) ၸွမ်ႁၢၼ်ပိုၼ်းမိူင်း ၊ ၵႅမ်ႁူဝ်ပဝ်ႈထီႉ (3) ၸဝ်ႈသိုၵ်းလူင်သိူဝ်ပိူင်ႇၾႃႉ ၊ ၽူႈၼမ်းၼႂ်းထီႉ (2) ၸဝ်ႈသိုၵ်းလူင် ၸၢႆးသူႉ ၊ ၸဝ်ႈသိုၵ်းလူင်မိူင်းလီ လႄႈ ၽူႈယႂ်ႇၵူၼ်းလူင် ၼႂ်းၵေႃႇမတီႇငဝ်ႈငုၼ်း လၢႆလၢႆၸဝ်ႈ ဢိၵ်ႇလုၵ်ႈ ႁဵၼ်း ၸၢႆး/ယိင်း ႁူမ်ႈသဵင်ႈ ၽူႈၶိုၼ်ႈႁွတ်ႈ မီး (602) ၵေႃႉ ယူႇယဝ်ႉ။
ၼႂ်းပၢင်ၵႅဝ်ႈၼၼ်ႉ မီးၸွမ်သိုၵ်းလူင် သိူဝ်ထႅၼ်ႈ မွၵ်ႇလၢတ်ႈၶေႃႈၵႂၢမ်း ပိုတ်ႇပၢင် သပ်းလႅင်း ပၼ်ပိုၼ်းႁူႉ လွင်ႈၶွတ်ႇလိူတ်ႈၽွမ်ႉႁူမ်ႈၼႂ်းၵႄႈ တပ်ႉသိုၵ်း လႄႈ ၵူၼ်းမိူင်း ၊ ၸရေး ၸၢႆးဢွၼ်ႇၶိူဝ်းသႅင် တၢင်တူဝ်လုၵ်ႈ ႁဵၼ်း မွၵ်ႇလၢတ်ႈၶေႃႈၵႂၢမ်းငိၼ်းၸူမ်း ၊ ၸဝ်ႈသိုၵ်းလူင်သိူဝ်ပိူင်ႇၾႃႉ မွၵ်ႇလၢတ်ႈၶေႃႈၵႂၢမ်း သူင်ႇသၢင်ႇ လူပ်းလင်သေ ထိုင်မႃး ၶၢဝ်းယၢမ်းၵၢင်ၼႂ် 10:04 မူင်း ၼၼ်ႉ ယူႇတီႈၽူႈၶပ်ႉပၢင် လႆႈပိုၼ်ၽၢဝ်ႇ ပၢင်ၵႅဝ်ႈ ဢွင်ႇမၢၼ်ယဝ်ႉတူဝ်ႈ ၵႂႃႇယူႇယဝ်ႉ။
ပၢင်သွၼ်ၾၢႆႇဢုပ်ႉပိူင်ႇၼႆႉ ယူႇတီႈငဝ်ႈငုၼ်းပႃႇတီႇမႂ်ႇသုင်ၸိုင်ႈတႆးတပ်ႉသိုၵ်းၸိုင်ႈတႆး SSPP/SSA လႆႈ ဢွၼ်ႁူဝ်ၸတ်းႁဵတ်းမႃးတေႃႇထိုင် ၸုပ်ႈထီႉ (18) ယဝ်ႉသေ ဢိင်ၼိူဝ်ငဝ်းလၢႆးပၼ်သေ မိူဝ်းၼႃႈမႃးၵေႃႈ တေသိုပ်ႇပိုတ်ႇ ၽုၺ်ႇ ပူင်သွၼ်ၵႂႃႇယူႇယဝ်ႉ။
