ပႃႇတီႇမႂ်ႇသုင်ၸိုင်ႈတႆးတပ်ႉသိုၵ်းၸိုင်ႈတႆး SSPP/SSA ၸွႆႈႁပ်ႉသူင်ႇ လႄႈ ၸွႆႈၶွင်ၵိၼ်ယမ်ႉ တီႈပေႃႈမႄႈၵူၼ်းမိူင်း ၸိူဝ်းပၢႆႈၽေး သေ ပွၵ်ႈၶိုၼ်းႁိူၼ်း ၼႂ်းၸေႈဝဵင်း ၵျွၵ်ႉမႄး ၸိုင်ႈတႆးပွတ်းႁွင်ႇ ၼႆယူႇယဝ်ႉ။
ပေႃႈမႄႈၵူၼ်းမိူင်း ဢၼ်ပဵၼ်ၵူၼ်းပၢႆႈၽေးသေ ပွၵ်ႈ ၶိုၼ်းႁိူၼ်း ၼႂ်းဢိူင်ႇ ၶိုမ်း ၊ ဢိူင်ႇပုင်းလူင် ၊ ဢိူင်ႇႁူးသူၼ် ၊ ဢိူင်ႇပၢင်ႁူး ၊ ဢိူင်ႇလွႆၵူင် ၸေႈဝဵင်းၵျွၵ်ႉမႄး ၼၼ်ႉ ယူႇတီႈပႃႇတီႇမႂ်ႇသုင်ၸိုင်ႈတႆးတပ်ႉသိုၵ်းၸိုင်ႈတႆး ၸွႆႈႁပ်ႉသူင်ႇပၼ်သေဢမ်ႇၵႃး ၸွႆႈထႅမ်ပႃး ၶွင်ၵိၼ်ယမ်ႉ မုင်ႉႁေႃႁိူၼ်း 1 ႁိူၼ်းလႂ် ၶဝ်ႈသၢၼ်ၼိုင်ႈထူင် ၊ ၵိူဝ် (1) ထူင် ၊ ၽွင်ဝၢၼ်(1) ထူင် ၊ ၼမ်ႉမၼ်း ၵိၼ်(1)တဝ်ႈ ၸဵမ် ၸိူဝ်းၼႆႉယူႇယဝ်ႉ။
သၢႆမၢႆၵူၼ်းပၢႆႈၽေး ၸိူဝ်းဢၼ်ပွၵ်ႈၶိုၼ်းႁိူၼ်း တေႃႇ ထိုင်မိူဝ်ႈၼႆႉ ဝၼ်းထီႉ 05/07/2023 ၼၼ်ႉ ဝၢၼ်ႈ ၶိုမ်း ၵဝ်ႇ (15) ႁိူၼ်း ၊ ဝၢၼ်ႈၶိုမ်းမႂ်ႇ (16) ႁိူၼ်း ၊ ဝၢၼ်ႈၼမ်ႉ ၽဵတ်ႇ (5) ႁိူၼ်း ၊ ဝၢၼ်ႈႁိူၼ်းဝူဝ်း (1) ႁိူၼ်း ၊ ဝၢၼ်ႈ ႁူးသူၼ် (12) ႁိူၼ်း ၊ ဝၢၼ်ႈၵဵင်ၵႆႇ (17)ႁိူၼ်း ၊ ဝၢၼ်ႈ ၼႅမ်းသႆး (7)ႁိူၼ်း ၊ ဝၢၼ်ႈတူၼ်ႈႁိူၵ်ႈ (18)ႁိူၼ်း ၊ ဝၢၼ်ႈပွၵ်ႈ (42) ႁိူၼ်း ႁူမ်ႈသဵင်ႈ (133) ႁိူၼ်း ႁူဝ် ၵူၼ်း ၸၢႆး/ယိင်း (245) ၵေႃႉ ၼႆယူႇယဝ်ႉ။
လိူဝ်သေၼၼ်ႉ ၵူၼ်းဝၢၼ်ႈၸိူဝ်းပၼ်သၢႆမၢႆဝႆႉ တႃႇတေပွၵ်ႈၶိုၼ်းၵေႃႈ တိုၵ်ႉၵိုတ်းထႅင်ႈတၢင်းၼမ် ၼင်ႇႁိုဝ် ၵူၼ်း ၸိူဝ်းၵိုတ်းဝႆႉ တေလႆႈပွၵ်ႈၶိုၼ်းႁိူၼ်းၽႂ်မၼ်း ၼၼ်ႉ ၵေႃႈ ယူႇတီႈပႃႇတီႇမႂ်ႇသုင်ၸိုင်ႈတႆးတပ်ႉသိုၵ်း ၸိုင်ႈတႆး SSPP/SSA တေႁႃလၢႆးၶတ်းၸႂ် ၸွႆႈထႅမ်ၵႂႃႇ ယူႇယဝ်ႉ။
