ၶွင်ႇသီႇသိုၵ်းမၢၼ်ႈ ၸႂ်ႉႁိူဝ်းမိၼ်တိုၵ်းၼိုင်ႈလမ်း ၶိုၼ်ႈတိုၵ်းပွႆႇမၢၵ်ႇသႂ်ႇ တပ်ႉသိုၵ်းပူတ်းပွႆႇၸိူဝ်ႉၸၢတ်ႈတ ဢၢင်း TNLA တီႈဝၢၼ်ႈသၢႆးၶၢဝ် ဢိူင်ႇၼမ်ႉဢုမ် ၸေႈဝဵင်းမူႇၸေႈ ၸိုင်ႈတႆးပွတ်းႁွင်ႇ မၢၵ်ႇတူၵ်းတိူဝ်ႉၺႃး ႁိူၼ်း ၵူၼ်းဝၢၼ်ႈ ၸဝ်ႈႁိူၼ်းလူႉတၢႆၸွမ်း ၼိုင်ႈၵေႃႉၼႆယဝ်ႉ။
မိူဝ်ႈၼႆႉ ဝၼ်းထီႉ 25-07-2023 ၶၢဝ်းယၢမ်း ၵၢင်ဝၼ်း 11:00 မူင်း တေႃႇထိုင် 11:40 မူင်း ၼၼ်ႉ ႁိူဝ်းမိၼ် ၶွင်ႇသီႇသိုၵ်းမၢၼ်ႈ ၼိုင်ႈလမ်း ၶိုၼ်ႈတိုၵ်း ပွႆႇမၢၵ်ႇသႂ်ႇ တပ်ႉသိုၵ်းတဢၢင်း TNLA တီႈၼႂ်းဝၢၼ်ႈသၢႆးၶၢဝ် ဢိူင်ႇ ၼမ်ႉ ဢုမ် ၸေႈဝဵင်းမူႇၸေႈ ၊ မၢၵ်ႇတူၵ်းတိူဝ်ႉၺႃး ႁိူၼ်း ၸၢႆး ဢၢႆႈလႃႉ ဝၢၼ်ႈသၢႆးၶၢဝ် လႆႈလူႉလႅဝ်ၵႂႃႇသေ တူဝ် ၸဝ်ႈ ႁိူၼ်းၵေႃႉပဵၼ် ၸၢႆးဢၢႆႈလႃႉၵေႃႈ ၸၢၵ်ႇမၢၵ်ႇသဵၼ်တိူဝ်ႉၺႃးလႄႈ လႆႈလူႉသဵင်ႈသၢႆၸႂ်ၸွမ်းၼႆယဝ်ႉ။
မိူဝ်ႈဝၼ်းထီႉ 24-07-2023 မိူဝ်ႈၶၢဝ်းယၢမ်းၵၢင်ၶိုၼ်း 11:30 မူင်း ၼၼ်ႉၵေႃႈ ၾၢႆႇၶွင်ႇသီႇသိုၵ်းမၢၼ်ႈ ၸႂ်ႉၵွင်ႈ လူင် ပိုတ်းယိုဝ်းၵႂႃႇ လၢႆတီႈလၢႆတၢင်း ၼႂ်းဢိူင်ႇ ၼမ်ႉဢုမ်လႄႈ မၢၵ်ႇလူင်တူၵ်းတႅၵ်ႇတီႈၼႂ်းၵၢတ်ႇၼမ်ႉဢုမ် လႆႈမီးလွင်ႈလူႉၵွႆၵႂႃႇတၢင်းၼမ်ယူႇယဝ်ႉ။
