ၶွင်ႇသီႇသိုၵ်းမၢၼ်ႈ တင်း တပ်ႉသိုၵ်းလွတ်ႈလႅဝ်းသဝ်း ၶေႃၶၢင် KIA ပဵၼ်ပၢင်တိုၵ်းၵၼ် ၼႂ်းဢိူင်ႇၼမ်ႉဢုမ် ၸေႈဝဵင်းမူႇၸေႈ ၸိုင်ႈတႆးပွတ်းႁွင်ႇ ။
မိူဝ်ႈဝၼ်းထီႉ 18-07-2023 ၶၢဝ်းယၢမ်း ဝၢႆးဝၼ်း 16:00 မူင်း ၼၼ်ႉ တပ်ႉသိုၵ်းလွတ်ႈလႅဝ်းသဝ်းၶေႃၶၢင် KIA ႁႅင်းသိုၵ်း 100 ၵေႃႉႁိမ်းႁွမ်း ၶဝ်ႈလူမ်ႇတိုၵ်းတပ်ႉသိုၵ်းမၢၼ်ႈ တပ်ႉၵွင်လႃ ဢၼ်မီးၼႂ်း ဢိူင်ႇၼမ်ႉဢုမ် ၸေႈဝဵင်းမူႇ ၸေႈ သေ သွင်ၾၢႆႇ လႆႈပဵၼ်ပၢင်တိုၵ်းၵၼ် တေႃႇထိုင်ၶၢဝ်းယၢမ်း 18:30 မူင်း လွင်ႈလူႉတၢႆ မၢတ်ႇၸဵပ်း တၢင်းသွင်ၾၢႆႇတေႉ ပႆႇ လႆႈႁူႉၸွမ်း ၼႆယူႇယဝ်ႉ။
မိူဝ်ႈၽွင်းတိုၵ်ႉပဵၼ်ပၢင်တိုၵ်းၵၼ်ၼၼ်ႉ သိုၵ်းမၢၼ်ႈ တပ်ႉၶလယ (123) ဢၼ်ပဵၼ်တပ်ႉပၵ်းသဝ်း ၸေႈ ဝဵင်းၵူတ်ႉၶၢႆၼၼ်ႉ ၸႂ်ႉၵွင်ႈလူင်ပိုတ်းယိုဝ်းၸူး ႁိမ်းႁွမ်း တီႈပဵၼ်ပၢင်တိုၵ်းၼၼ်ႉ ဢမ်ႇယွမ်း 10 ၵမ်း မၢၵ်ႇလူင် လႆႈတူၵ်းတႅၵ်ႇတိူဝ်ႉၺႃး ႁိူၼ်းၵူၼ်းဝၢၼ်ႈ ၸၢဝ်းၶၢင် တီႈဝၢၼ်ႈၸုပ်ႇလႃ လင်ၼိုင်ႈ လႄႈ ႁိူၼ်းယေး လႆႈၺႃးၾႆးမႆႈ လူႉၵွႆၵႂႃႇၸွမ်း ၊ ၵူၼ်းပိုၼ်ႉတီႈ ႁိမ်းႁွမ်းပဵၼ်ပၢင်တိုၵ်း မိူၼ်ၼင်ႇၵူၼ်းမိူင်း ဝၢၼ်ႈႁၢင်ၵႆႇ ၊ ဝၢၼ်ႈၸုပ်ႇလႃ ၊ ဝၢၼ်ႈၵွင်လႃ ၼႂ်းဢိူင်ႇၼမ်ႉဢုမ်ႇၼႆႉ လႆႈဢွၼ်ၵၼ် ပၢႆႈၵႂႃႇမူၵ်းသဝ်းဝႆႉ တၢင်းဝၢၼ်ႈၶူဝ်းမုင်း ၸူဝ်ႈၶၢဝ်းယူႇ ၼႆယဝ်ႉ။
တေႃႇထိုင်မိူဝ်ႈၼႆႉ ဝၼ်းထီႉ 19-07-2023 ၵေႃႈ သွင်ၾၢႆႇတိုၵ်ႉၶဵင်ႈၶႅင်ၼႃႈသိုၵ်းတေႃႇၵၼ်သေ ၵူၼ်းပၢႆႈၽေး ၵမ်ႈ ၼမ်ပွၵ်ႈၶိုၼ်းႁိူၼ်းယဝ်ႉသေတႃႉ ၵမ်ႈၽွင်ႈတေႉ ယွၼ်ႉတိုၵ်ႉၵူဝ်ပဵၼ်ပၢင်တိုၵ်းလႄႈ ပႆႇႁတ်းပွၵ်ႈၶိုၼ်း ၵေႃႈမီး ၼႆယူႇယဝ်ႉ။
Photo- Credit
