သိုၵ်းမၢၼ်ႈယိုဝ်းၵွင်ႈလူင် လွၵ်ႇငိူတ်ႈၸုမ်းတပ်ႉသိုၵ်းပူတ်းပွႆႇၸိူဝ်ႉၸၢတ်ႈ တဢၢင်း TNLA လႄႈ မၢၵ်ႇလူင် တူၵ်းတႅၵ်ႇၼႂ်းၵၢတ်ႇ ဝၢၼ်ႈၼမ်ႉဢုမ် ဢိူင်ႇၼမ်ႉဢုမ် ၸေႈဝဵင်းမူႇၸေႈ လႄႈ ၵၢတ်ႇၼမ်ႉဢုမ် လႆႈလူႉလႅဝ်ၵႂႃႇ တၢင်း ၼမ် ၼႆယူႇယဝ်ႉ။
မိူဝ်ႈဝၼ်းထီႉ 24-07-2023 ၶၢဝ်းယၢမ်းၵၢင်ၶိုၼ်း 11:30 မူင်း တေႃႇထိုင်မိူဝ်ႈဝၼ်းထီႉ 26-07-2023 ၶၢဝ်းယၢမ်း ၵၢင်ၼႂ် 05:00 မူင်း ၼၼ်ႉ တပ်ႉ ၵွင်ႈလူင်ၶွင်ႇသီႇသိုၵ်းမၢၼ်ႈ တီႈတပ်ႉ (105) လၵ်း မႃးတင်ႈၵွင်ႈလူင် တီႈ ၼိူဝ်လွႆ ၾၢႆႇၸၢၼ်းဝၢၼ်ႈႁွင်း ဢိူင်ႇ ၼမ်ႉဢုမ် ၸေႈဝဵင်းမူႇ ၸေႈ သေ ယိုဝ်း ၵွင်ႈလူင်လွၵ်ႇငိူတ်ႈ သၢႆသိုၵ်း တ ဢၢင်း TNLA ဢၼ်မီးဝႆႉၼႂ်းဝၢၼ်ႈ သၢႆးၶၢဝ် ၼၼ်ႉလႄႈ မၢၵ်ႇလူင်တူၵ်းတႅၵ်ႇ တိူဝ်ႉၺႃးၼႂ်းၵၢတ်ႇၼမ်ႉဢုမ် လႆႈလူႉ ၵွႆၵႂႃႇတၢင်းၼမ်ယူႇယဝ်ႉ။
ၵဵဝ်ႇလူၺ်ႈလွင်ႈၼႆႉသေ ၵူၼ်းမိူင်းပိုၼ်ႉတီႈလၢတ်ႈၼႄဝႃႈ -“ၸႂ်ႈၶႃႈဢေႃႈ သိုၵ်းမၢၼ်ႈယိုဝ်းၵွင်ႈလူင်တၢင်း ၶိုၼ်း ယူႇယူႇယိုဝ်း တေႃႇထိုင်ၼႂ်ၼႆႉၶႃႈဢေႃႈ။ သိုၵ်းလွႆသမ်ႉ မႃးမီးၼႂ်းဝၢၼ်ႈသၢႆးၶၢဝ်ၶႃႈဢေႃႈ မၢၵ်ႇလူင် ဢၼ်သိုၵ်း မၢၼ်ႈယိုဝ်းၼၼ်ႉ တေမီးယူႇ မွၵ်ႈ 30 ၵမ်း ၶႃႈၼႆႉ တမ်ႉ ဢမ်ႇငိၼ်းဝႃႈတူၵ်းၺႃးတီႈသိုၵ်းလွႆၶဝ်ယူႇၶႃႈ။ ၵူၺ်းတူၵ်းတၢင်းလႂ်လၢႆလၢႆတေႉဢမ်ႇႁူႉ တူၵ်းၺႃး ၼႂ်းၵၢတ်ႇ ၼမ်ႉဢုမ်ၼႆႉသေ သုမ်ႉၵၢတ်ႇလူႉၵွႆၵႂႃႇတၢင်းၼမ် ဢေႃႈ” ဝႃႈၼႆ။
တေႃႇထိုင်မိူဝ်ႈၼႆႉယၢမ်းၵၢင်ၼႂ် 09:00 မူင်း ၾၢႆႇတပ်ႉသိုၵ်းတဢၢင်း TNLA ၵေႃႈ ဢမ်ႇယွမ်းထွႆဢွၵ်ႇၼႂ်းဝၢၼ်ႈသၢႆးၶၢဝ်ၼၼ်ႉသေ ၾၢႆႇၶွင်ႇသီႇသိုၵ်းမၢၼ်ႈၵေႃႈ ထႅမ်ႁႅင်းသိုၵ်းၽိုတ်ႉၶဝ်ႈ ၶဵင်ႈၶႅင်ၼႃႈသိုၵ်းတေႃႇၵၼ်ဝႆႉလႄႈ ၵူၼ်းမိူင်းပိုၼ်ႉတီႈ ဢွၼ်ၵၼ်မႆႈၸႂ်ၵူဝ်ပဵၼ်ပၢင်တိုၵ်း ၼႂ်းဝၢၼ်ႈၼႂ်းသူၼ် ၼႆယူႇယဝ်ႉ။
