ၸိုင်ႈတႆးပွတ်းႁွင်ႇ ၼႂ်းၸေႈဝဵင်းသီႇပေႃႉၼၼ်ႉ ၾႆးမႆႈဝတ်ႉၵျွင်းလင်ၼိုင်ႈ မီးလွင်ႈလူႉသုမ်း ဢမ်ႇလိူဝ်သင် ၸဝ်ႈသၢင်ႇဢွၼ်ႇပႃးၼိုင်ႈ လႆႈလူႉလွၼ်ႇၸွမ်းၼႂ်းၾႆးၼႆယဝ်ႉ ။
ဝၼ်းထီႉ 13-02-2023 ၶၢဝ်းယၢမ်းၵၢင်ၶမ်ႈ (9:30) မူင်း ၼၼ်ႉ လုၵ်ႉတီႈၾႆးတဵၼ်းဢၼ်ၸပ်းတႆႈ ၼႃႈၶဵင်ႇၽြႃး သေ ႁဵတ်းႁႂ်ႈ ၾႆးလၢမ်းမႆႈ ၵျွင်းမုၼ်ၸဝ်ႈ တီႈၵျွင်းၸၢမ် ၽိူၵ်ႇ ဢိူင်ႇဢုမ်မူႉ ၸေႈဝဵင်းသီႇပေႃႉ ၸေႈတွၼ်ႈၵျွၵ်ႉမႄး ၶူဝ်းၶွင်ၼႂ်းၵျွင်း ၺႃးၾႆးမႆႈၵႂႃႇတၢင်းသဵင်ႈ ၊ မႆႈပႃးၸဝ်ႈသၢင်ႇဢွၼ်ႇ သႅၼ်းဢႃႇယု (10) ၶူပ်ႇ လႆႈလူႉလွၼ်ႇၸွမ်းၼႂ်းၾႆး ၼႆယူႇယဝ်ႉ ။
ၸိုဝ်ႈၸဝ်ႈသၢင်ႇဢွၼ်ႇ ဢၼ်လႆႈလူႉလွၼ်ႇၵႂႃႇၸွမ်း မိူဝ်ႈၽွင်းၾႆးမႆႈ ၼၼ်ႉ ၸိုဝ်ႈႁွင်ႉဝႃႈ ၸၢႆးလႅင်း ပဵၼ်လုၵ်ႈၸၢႆး လုင်းၸၢႆးပိုၼ်ၶမ်း + ပႃႈၼၢင်းလိုၼ်း ယူႇဝၢၼ်ႈၼႃးမူၼ်း ဢိူင်ႇဢုမ်မူႉ ၸေႈဝဵင်းသီႇပေႃႉ ။
ဝတ်ႉၵျွင်းၸၢမ်ၽိူၵ်ႇၼႆႉ မီးၼႂ်းဝၢၼ်ႈၸၢမ်ၽိူၵ်ႇ ဢိူင်ႇဢုမ်မူႉ ၸေႈဝဵင်းသီႇပေႃႉ ၸေႈတွၼ်ႈၵျွၵ်ႉမႄး ပဵၼ်ဝတ်ႉၵျွင်းဢၼ်ၵူၼ်းဝၢၼ်ႈ ၼႂ်းဢိူင်ႇဢုမ်မူႉတင်းသဵင်ႈ မႃးလူႇဝႆႈ ၼႆယဝ်ႉ။#ShanStateprogressparty
#ShanStatearmy
#ၾႆးမႆႈၵျွင်း
