ၸုမ်းၽူႈႁၢပ်ႇၵၢၼ်ၼႂ်းလုမ်း ၽၢႆႇမၢၼ်ႈၶဝ် ဢွၵ်ႇတူင်ႉၼိုင် ၵဵပ်းသဵၼ်ႈမၢႆ ႁူဝ်ႁိူၼ်းၸႅၼ်ႇ ပိူဝ်ႈတႃႇတေႁူႉႁူဝ်ၵူၼ်း တႃႇတွတ်ႈၶႅပ်းၵၢင်ၸႂ် ဢၼ်တေၸတ်း ႁဵတ်းၼႂ်းပီႊ 2023 ၼႆႉ ဝႃႈၼႆ ။
ပူၼ်ႉမႃ မိူဝ်ႈဝၼ်းထီႉ 07-လိူၼ်ၵျူၼ်ႇၼႃႇဝႃႇရီႇ ပီႊ 2023 ၼၼ်ႉ ယူႇတီႈၸုမ်း ၽူႈႁၢပ်ႇၵၢၼ်လုမ်းၼႂ်းဝဵင်းမိူင်းၵိုင် ႁူမ်ႈၵၼ်လူင်းၵဵပ်းသဵၼ်ႈမၢႆႁူဝ်ႁိူၼ်းၸႅၼ်ႇ တႃႇၼပ်ႉႁူဝ်ၵူၼ်း ပၢင်လိူၵ်ႈတင်ႈ ဢၼ်တေၸတ်းႁဵတ်းၼႂ်း ပီႊ 2023 ၼႆႉဝႃႈၼႆ ။
ၵူၼ်းမိူင်းၵိုင်ၵေႃႉၼိုင်ႈ လၢတ်ႈၼႄဝႃႈ – “ ၸႂ်ႈၶႃႈဢေႃႈ မိူဝ်ႈၼႆႉ ယူႇတီႈၸုမ်း ၽၢႆႇၽူႈမီးပုၼ်ႈၽွၼ်း ၼႂ်းလုမ်းၶဝ် မႃးပႂ်ႉတီႈၵျွင်းၵၢင်ဝဵင်း ထမ်ႇမႃႇယူင်ႇၼႆႉသေ ပႂ်ႉၵဵပ်းသဵၼ်ႈမၢႆႁူဝ်ႁိူၼ်းၸႅၼ် ၵူၼ်းမိူင်းၵိုင်ၼႆႉဢေႃႈ ပိူင်လူင်မၼ်းတႄႉ တႃႇတေႁူႉႁူဝ်ၼပ်ႉၵူၼ်း ဢၼ်တေတွၼ်ႈၶႅပ်းၵၢင်ၸႂ် ၼႂ်းပၢင်လိူၵ်ႈတင်ႈ ဢၼ်တေၸတ်းႁဵတ်းၼႆႉၶႃႈယူဝ်ႉ ႁဝ်းၶႃႈၵေႃႈလႆႈဢွၼ်ၵၼ်ၵႂႃႇသႂ်ႇဢေႃႈ ” ဝႃႈၼႆ ။
ၵွၼ်ႇပႆႇထိုင် ပၢင်လိူၵ်ႈတင်ႈ ၼႂ်းပီႊ 2023 ၼႆႉ ယူႇတီႈၶွင်ႇသီႇသိုၵ်းမၢၼ်ႈၵေႃႈ ၸွမ်းတီႉၺွပ်း ၵူၼ်းႁဵတ်းၵၢၼ်မိူင်းဢၼ်သၢၼ်ၶတ်းတေႃႇၸုမ်းၶဝ် ၊ ၸုမ်းဢၼ်ၵႆႉ ၶဝ်ႈတိုၵ်းၼႂ်းဝဵင်း ၊ ၸုမ်းလုၵ်ႉၽိုၼ်ႉ ဢၼ်ၸၢင်ႈပၼ်လွင်ႈသုၵ်ႉယုင်ႈ ၼႂ်းၵၢၼ် လိူၵ်ႈတင်ႈၼၼ်ႉ ယူႇတီႈၶွင်ႇသီႇသိုၵ်းမၢၼ်ႈ မီးလွင်ႈမႆႈၸႂ် လႄႈ တီႉၺွပ်း ၵူၼ်းၵၢၼ်မိူင်းႁၢဝ်ႈႁႅင်း ဝႃႈၼႆ။ ၼင်ႇႁိုဝ်ၵၢၼ်မိူင်း ၵၢၼ်လိူၵ်ႈတင်ႈ ၼႂ်းပီႊ 2023 တေဢွင်ႇမၢၼ်ၵႂႃႇလီငၢမ်းၼၼ်ႉ ယၢမ်းလဵဝ် မႅၼ်ႈၽွင်းၶွင်ႇသီႇသိုၵ်းမၢၼ်ႈ ၶတ်းၸႂ်ဢုပ်ႇဢူဝ်းငူပ်ႉငီႉ ၸုမ်းယိပ်း ၵွင်ႈၵၢင်ႇၸၢဝ်းၶိူဝ်း လၢႆလၢႆၸုမ်း ပိူဝ်ႈတႃႇတေမီးသုၼ်ႇၸတ်းလႆႈ ပၢင်လိူၵ်ႈတင်ႈ လီလီ ၸိူဝ်းၼၼ်ႉ ဢမ်ႇၵႃး တုၵ်းယွၼ်း ႁႂ်ႈၸုမ်းယိပ်းၵွင်ႈၵၢင်ႇ ၶဝ်ႈၸွႆႈထႅမ်ပႃး ႁႂ်ႈပၢင်လိူၵ်ႈတင်ႈပီႊ 2023 ၼႆႉ ပေႃးတေယဝ်ႉတူဝ်ႈဢွင်မၢၼ်ၵႂႃႇလႆႈ ဝႃႈၼႆ။
