မိူဝ်ႈဝၼ်းထီႉ 17-06-2023 မိူဝ်ႈယၢမ်းၵၢင်ဝၼ်း မီးၵူၼ်းပိုၼ်ႉတီႈ ထူပ်းႁၼ်တူဝ်တၢႆ ၽူႈၸၢႆး 5 ၵေႃႉ ဢၼ်တၢႆဝႆႉ တီႈၼႂ်းဝၢၼ်ႈ ၵိၼ်းပျႃး ဝဵင်းသူၺ်ႇပူဝ်ႇ တိူင်းၸၵႅင်း ၼၼ်ႉယူႇယဝ်ႉ ။
ၵူၼ်းပိုၼ်ႉတီႈ ၵေႃႉၼိုင်ႈလၢတ်ႈၼႄဝႃႈ-“မိူဝ်ႈပူၼ်ႉမႃး ဝၼ်းထီႉ 16-06-2023 ၼၼ်ႉ သၢႆသိုၵ်းၶွင်ႇသီႇသိုၵ်းမၢၼ်ႈၶဝ် မႃးၵူတ်ႇပႅတ်ႈ မၢၵ်ႇဢၼ် ၸုမ်း PDF ၶဝ်ႁၢင်ႈဝႆႉ ၾၢႆႇဝၼ်းတူၵ်း မူႇဝၢၼ်ႈ ၵိၼ်းပျႃးၼၼ်ႉဢေႃႈ။ ယွၼ်ႉၵူတ်ႇမၢၵ်ႇသေ မၢၵ်ႇတႅၵ်ႇၺႃး ၵူၼ်းသိုၵ်းၶဝ် လႆႈလူႉတၢႆ ၵေႃႉၼိုင်ႈဢေႃႈ။ ၊ ဝၢႆးၶဝ်ၵူတ်ႇယဝ်ႉသေ ဢွၵ်ႇ ၵႂႃႇၼၼ်ႉ ၸုမ်းၵႅတ်ႇၶႄၵူၼ်းမိူင်း PDF ၶဝ် ၶိုၼ်းမႃးၵူတ်ႇတူၺ်း လႆႈႁၼ် တူဝ်တၢႆ ၽူႈၸၢႆး ၵူၼ်းဝၢၼ်ႈ 5 ၵေႃႉ ဢၼ်ၶွင်ႇသီႇသိုၵ်းမၢၼ်ႈၶဝ် ၸႂ်ႉမၢၵ်ႇတႅၵ်ႇသေ ၶႃႈတၢႆဝႆႉၼၼ်ႉဢေႃႈ။ ၵူၼ်းဢၼ် ၺႃးၶႃႈတၢႆ 5 ၵေႃႉ ၼႆႉဢမ်ႇ ၵဵဝ်ႇၶွင်ႈၸုမ်း PDF တေႉတေႉဢေႃႈ။ ၶဝ်ပဵၼ်ၵူၼ်းဝၢၼ်ႈ ၵိၼ်းပျႃးၼႆႉၵူၺ်း” ဝႃႈ ၼႆ။
ၼႂ်းဝၼ်းထီႉ 16/06/2023 ယၢမ်းတၢမ်းၶမ်ႈၼၼ်ႉၵူၺ်း ၶွင်ႇသီႇသိုၵ်းမၢၼ်ႈၶဝ် ၶိုၼ်းၶဝ်ႈၵႂႃႇ ၼႂ်းမူႇဝၢၼ်ႈၵိၼ်းပျႃး ၊ ၵႂႃႇၸုတ်ႇၽၢဝ်ပႅတ်ႈႁိူၼ်း ၵူၼ်းဝၢၼ်ႈၵမ်ႈၽွင်ႈသေ ထိုင်ယၢမ်းၵၢင်ၼႂ်ထႅင်ႈဝၼ်း ၼိုင်ႈၼၼ်ႉ လႆႈႁၼ်ၶဝ်လဵပ်ႈယၢမ်း ၸိူဝ်းၼႂ်းဝၢၼ်ႈ ၵိၼ်းပျႃး ၼၼ်ႉ တၢင််းၼမ်ယူႇ သိုပ်ႇလၢတ်ႈၼႄ ၼင်ႇ ၼႆ။
ၼႂ်းဝၼ်းၼၼ်ႉၵူၺ်းၼင်ႇၵဝ်ႇ မိူဝ်ႈယၢမ်းၵၢင်ၼႂ်ၼၼ်ႉ သၢႆသိုၵ်း ၶွင်ႇသီႇသိုၵ်းမၢၼ်ႈ ဢၼ်တူင်ႉၼိုင်ၵႂႃႇမႃး ၼိူဝ်သဵၼ်ႈတၢင်း သူၺ်ႇပူဝ်ႇ-ၵျွၵ်ႉမျွင်းၼၼ်ႉ ထုၵ်ႇၺႃးၸုမ်း ၵႅတ်ႇၶႄၵူၼ်းမိူင်း Black Wolf Army ၶဝ် ႁၢင်ႈမၢၵ်ႇမူၵ်းတိုၵ်းလႄႈ ၾၢႆႇၶွင်ႇသီႇသိုၵ်းမၢၼ်ႈ လႆႈတိူဝ်ႉၺႃးမၢတ်ႇ ၸဵပ်း တၢင်းၼမ်ယူႇ ၼႆယဝ်ႉ။
Photo -Credit
