ၵူၼ်းဝၢၼ်ႈ ၼႂ်းဢိူင်ႇၶုမ်ႇၸူင် ထုင်ႉၼမ်ႉပွင်ႈ ၸေႈဝဵင်းလႃႈသဵဝ်ႈ ထူပ်းတၢင်းယၢပ်ႇၽိုတ်ႇ ယွၼ်ႉလႆႈတဵၵ်း ၼမ်ႉတေႃႉသူင်ႇပၼ်သိုၵ်းမၢၼ်ႈ ဢၼ်တူင်ႉၼိုင် ၼႂ်း ဢိူင်ႇၶုမ်ႇၸူင်ၼၼ်ႉၵူႈဝၼ်း ၼႆယူႇယဝ်ႉ။

သၢႆသိုၵ်းၶွင်ႇသီႇသိုၵ်းမၢၼ်ႈ တပ်ႉမ (33) ႁႅင်းၵူၼ်း (70) ၵေႃႉ ဢၼ်မႃးတူင်ႉၼိုင် ပၵ်းသဝ်းဝႆႉ တီႈၼႂ်းထိူၼ်ႇ ၼိူဝ်လွႆ ၾၢႆႇၸၢၼ်းဝၢၼ်ႈၼွင်မူဝ် ၼႂ်းဢိူင်ႇၶုမ်ႇၸူင် ထုင်ႉၼမ်ႉပွင်ႈ ၸေႈဝဵင်းလႃႈသဵဝ်ႈ တေႇၸဵမ်မိူဝ်ႈဝၼ်းထီႉ 10/06/2023 တေႃႇထိုင်ယၢမ်းလဵဝ် ၼႆႉ ၊ တဵၵ်းၸႂ်ႉၵူၼ်းဝၢၼ်ႈ ၼႂ်းဢိူင်ႇၶုမ်ႇၸူင် တေႃႉသူင်ႇပၼ် ၼမ်ႉတႃႇၸႂ်ႉတိုဝ်းၶဝ်ၵူႈဝၼ်းလႄႈ ၵူၼ်းဝၢၼ်ႈပွင်ႉၶၢင်း ၽွင်းၶၢဝ်းတိုၵ်ႉလူဝ်ႇၼႅတ်ႈႁဵတ်းၵၢၼ်ၽုၵ်ႇသွမ်ႈ ယွၼ်ႉဢမ်ႇလႆႈႁဵတ်း ၵၢၼ်ႁႆႈ ၵၢၼ်သူၼ်လီလီ ၼႆယူႇယဝ်။

ၵူၼ်းမိူင်းပိုၼ်ႉတီႈၵေႃႉၼိုင်ႈ လၢတ်ႈၼႄဝႃႈ – “ၸႂ်ႈၶႃႈ ဢေႃႈ ၶဝ်ၶၢၼ်းၵူၼ်းဝၢၼ်ႈ ၼႂ်းၼိုင်ႈဝၼ်းၼႆႉ တႃႇလူတ်ႉၶိူင်ႈ ၼိုင်ႈလမ်း တေလႆႈတေႃႉတေႃႉတၢင်ႇတၢင်ႇပၼ် ၼမ်ႉၸႂ်ႉၶဝ်တၢင်းဝၼ်းဢေႃႈ ။ ၵူႈဝၼ်းယဝ်ႉၶႃႈ ၵူၼ်းတေႉလႆႈပုတ်ႈၵၼ်ၶႃႈဢေႃႈ ။ ယၢပ်ႇၸႂ်ၶႃႈဢေႃႈ ၶၢဝ်း ၼႆႉသမ်ႉပဵၼ်ၶၢဝ်းလူဝ်ႇၼႅတ်ႈၽုၵ်ႇၼႅတ်ႈသွမ်ႈ ၽွင်းတိုၵ်ႉလူဝ်ႇႁႅင်းၵူၼ်း ႁဵတ်းႁႆႈႁဵတ်းသူၼ် ၊ ၵူၼ်း ၼႆႉ မီးငိုၼ်းသေႁႃၵူၼ်းၸၢင်ႈမႃးၸွႆႈႁဵတ်းၵေႃႈ ဢမ်ႇမီးၵူၼ်းၸၢင်ႈ ၶႃႈမိူဝ်ႈလဵဝ် ပဵၼ်ၶၢဝ်းၽႂ်ၵေႃႈ ၼႅတ်ႈႁဵတ်းႁႆႈႁဵတ်းသူၼ် ၽႂ်မၼ်း လိူဝ်သေၼၼ်ႉ ၼႂ်းထုင်ႉႁဝ်း ၶႃႈၼႆႉ သမ်ႉမီးသိုၵ်းလၢႆမူႇလၢႆၸုမ်း သမ်ႉမႆႈၸႂ် ၵူဝ်ၶဝ် ယိုဝ်းၵၼ် မိူဝ်ႈ ႁဝ်းပႆႇၽုၵ်ႇပႆႇသွမ်ႈယဝ်ႉသေဢေႃႈ ” ဝႃႈၼႆ။

မိူဝ်ႈပူၼ်ႉမႃး ဝၼ်းထီႉ 02/06/2023 ၼၼ်ႉၵေႃႈ တပ်ႉသိုၵ်းၵဝ်ႈၵၢင်ႉ (MNDAA) တင်း ၶွင်ႇသီႇသိုၵ်းမၢၼ်ႈ ပဵၼ်ပၢင်တိုၵ်းၵၼ် ႁိမ်းဝၢၼ်ႈၼႃးမူင်ႈ ဢိူင်ႇၼႃးၼၢင်း ထုင်ႉ ၼမ်ႉပွင်ႈ ၸေႈဝဵင်းလႃႈသဵဝ်ႈသေ ဝၢႆးပဵၼ်ပၢင်တိုၵ်းယဝ်ႉ ၵေႃႈ ၶွင်ႇသီႇသိုၵ်းမၢၼ်ႈၶဝ်ၵႆႉယိုဝ်းၵွင်ႈလူင်/ဢွၼ်ႇ ၾၢႆႇလဵဝ် ႁဵတ်းႁႂ်ႈၵူၼ်းဝၢၼ်ႈ ၵမ်းၵမ်းလႆႈပၢႆႈ လုတ်ႈႁၢမ်း ၶၢဝ်းယၢမ်း တႃႇတေႁဵတ်းၵၢၼ်ႁႆႈ ၵၢၼ်သူၼ် ၽွင်းၶၢဝ်းတိုၵ်ႉလူဝ်ႇၼႅတ်ႈ ၽုၵ်ႇၼႅတ်ႈသွမ်ႈၼႆႉ ၼႆယဝ်ႉ။#shanstateprogressparty

#shanstatearmy

#ထုင်ႉၼမ်ႉပွင်

ႈ#ၸေႈဝဵင်းလႃႈသဵဝ်ႈ

#ၶွင်ႇသီႇသိုၵ်းမၢၼ်ႈ