ဝၢႆးသေသိုၵ်းမၢၼ်ႈ ယွၼ်းႁႂ်ႈတပ်ႉသိုၵ်းၸိုင်ႈတႆး SSPP/SSA သုတ်ႉထွႆဢွၵ်ႇပၼ် ၽၢႆႇၸၢၼ်း တၢင်းၵႃး ပၢင်လူင် လၢႆးၶႃႈ မိူင်းၼွင်ယဝ်ႉ ၽၢႆႇတပ်ႉသိုၵ်းၸိုင်ႈတႆး ဢမ်ႇယွမ်းထွႆထွၼ်ဢွၵ်ႇ ပၼ်လႆႈၼႆ လႄႈ ယူႇတီႈသိုၵ်းမၢၼ်ႈ ႁႅင်းတမ်းတပ်ႉၵွင်ႈလူင်ယူႇယဝ်ႉ။

တီႈၼႃႈလိၼ်သိုၵ်းပွတ်းၸၢၼ်း ဢၼ်ၽၢႆႇတပ်ႉသိုၵ်းၸိုင်ႈတႆး SSPP/SSA ၵုမ်းၵမ်ဝႆႉမိူဝ်ႈလဵဝ် ပဵၼ်သဵၼ်ႈတၢင်းလူင် 3 သဵၼ်ႈ ၶွင်ႇသီႇသိုၵ်းမၢၼ်ႈ ထႅမ်ႁႅင်းသိုၵ်းမိူင်းတႆးၵွၼ်ၵၢင် ဢၼ်ယၢမ်ႈ ႁႅၼ်းသိုၵ်းလေႃႇတိုၵ်း တပ်ႉႁူမ်ႇလူမ်ႈငဝ်ႈငုၼ်း SSPP/SSA ပီႊ 2015 တႃႈသၢမ်ပူး ၊ ႁၢႆးပႃ ၊ ဝၢၼ်ႈလူၺ်ႇ ၊ မိူင်းဢၢၵ်ႇ ၊ ဝၢၼ်ႈသေႃႉ ၊ တေႃႇထိုင်မူၺ်ႇတေႃႇဝဵင်းၵဝ်ႇ မိူင်းၼွင်ၸိူဝ်းၼႆႉမႃးယူႇ၊ ယၢမ်းလဵဝ် တပ်ႉသိုၵ်းၸိုင်ႈတႆး ယၼ်မၼ်ႈပၵ်းၼႃႈသိုၵ်းၵုမ်းၵမ်ဝႆႉ သဵၼ်ႈတၢင်းလူင် 3 သဵၼ်ႈ လႄႈ သၢႆသိုၵ်းSSPP/SSA ႁွတ်ႈၽႅဝ်ထိုင်ဝႆႉ ၽၢႆႇတူၵ်း ၊ ၽၢႆႇဢွၵ်ႇ တိူင်းၶူဝ်လမ်ဝႆႉယူႇ။

ၽူႈမီးၸၼ်ႉဢၼ်မီးဝႆႉၼႃႈလိၼ်သိုၵ်းၸဝ်ႈၼိုင်ႈလၢတ်ႈဝႃႈ – “ လႆႈဝႃႈသိုၵ်းႁဝ်းၶႃႈ ႁွတ်ႈၽႅဝ် ထိုင်ဝႆႉ တီႈပွတ်းၸၢၼ်းၼႆႉ တွၼ်ႈတႃႇလွင်ႈႁူမ်ႇလူမ်ႈတိူင်းၶူဝ်လမ်ၵေႃႈ ၽၢႆႇသိုၵ်းမၢၼ်ႈၶဝ် လႆႈၵူဝ်ဝႆႉပိူင်ၼိုင်ႈ ယွၼ်ႉၼၼ်ၸင်ႇႁႂ်ႈသိုၵ်းႁဝ်းထွႆဢွၵ်ႇပၼ် ၵူၺ်းၵႃႈႁဝ်းၶႃႈၵေႃႈ တိုၼ်းဢမ်ႇ ၸၢင်ႈထွႆ သင်မီးၵၢၼ်ႁႅၼ်းသိုၵ်းတေႃႇၵၼ်ၵေႃႈႁဝ်းၶႃႈတေႁႅၼ်းသိုၵ်း တေႃႇသူႈၶိုၼ်းၵူၺ်း ” ဝႃႈၼႆ။

ၶွင်ႇသီႇသိုၵ်းမၢၼ်ႈ ဢဝ်ႁႅင်းၵူၼ်းဢိူမ်ႈၸမ် တပ်ႉသိုၵ်းၸိုင်ႈတႆး မွၵ်ႈ 300 ၵေႃႉ တင်ႈပႃး ၵွင်ႈလူင် 81mm ဝႆႉ တီႈႁိမ်းလွႆၼမ်ႉတုၼ် ၽၢႆႇၸၢၼ်းဝဵင်းလၢႆးၶႃႈ ႁိမ်းတိၼ်လွႆၶႄႇ ၼႂ်းၵႄႈဝူင်ႈၵၢၼ် ပၢင်လူင် လၢႆးၶႃႈဝႆႉယူႇ လႄႈ ဝၢႆႇၼႃႈၸူးတပ်ႉသိုၵ်းၸိုင်ႈတႆး ဢၼ်ပၵ်းဝႆႉယူႇ ၸိူဝ်းၵွင်းသၢင်း ဢိူင်ႇၼႃးမင်း ၸေႈဝဵင်းလၢႆးၶႃႈ၊ ၽၢႆႇတပ်ႉသိုၵ်းၸိုင်ႈတႆးၵေႃႈ ႁၢင်ႈႁႅၼ်းဢဝ် တီႈယူႇၼႃႈလိၼ်ပေႉပုၼ်ႈ ဝႆႉယူႇယဝ်ႉ။

သိုပ်ႇလၢတ်ႈထႅင်ႈဝႃႈ “ၵၢၼ်ဢၼ်ႁႂ်ႈႁဝ်းၶႃႈထွႆၼႆႉ မၼ်းပဵၼ်ၽႅၼ်သွၼ်ႉၽႅၼ်ၵူၺ်း မၼ်းမီး ၸုမ်းဢၼ်ၶႂ်ႈၶဝ်ႈယူႇၶိုၼ်းတီႈယူႇၵဝ်ႇၶဝ်ၶိုၼ်းဢေႃႈ ပေႃးတေဢဝ်ႁႅင်းသိုၵ်းမႃးတိုၵ်း ႁႅင်းသိုၵ်း ဢမ်ႇပေႉလႆႈယဝ်ႉၶႃႈၼႃႇႁႅင်းမၢၵ်ႇၵွင်ႈၵေႃႈ ဢမ်ႇၵုမ်ႇထူၼ်ႈယဝ်ႉ၊ ယၢမ်းလဵဝ်လိူဝ်သေ ၸႂ်ႉႁၢင်ႈမၢၵ်ႇ ၵၢင်မၢၵ်ႇ ဢမ်ႇၸၢင်ႈႁဵတ်းသင်ယဝ်ႉ သိုၵ်းၵေႃႈလၵ်ႉပၢႆႈၼမ် ၊ ႁႅင်းသိုၵ်းဢၼ် မႃးမီးယူႇၸိူဝ်းႁိမ်းႁဝ်းၸိူဝ်းၼႆႉ ဢမ်ႇၵိုတ်းသင် ၽၢႆႇတၢင်းၼိူဝ်ၶဝ်လႅၼ်ၶဝ်သေၸႂ်ႉမႃးယိုဝ်းဝႃႇ ထၢင်ႇဝႃႈႁႅင်းသိုၵ်းယႂ်ႇၼမ်တႄႉတႄႉၽိူဝ်ႇမႃးၵေႃႈ ႁႅင်းသိုၵ်းဢမ်ႇမီးသင် လႄႈ ဢွၼ်ၵၼ်ၽူင်ႉပၢႆႈ တင်းၼမ်ၵေႃႈမီး ဢၼ်ပၢႆႈမႃးမီးၼႂ်းၸုမ်း ႁဝ်းၵေႃႈမီး ၊ ႁႅင်းၵူဝ်ႇမၢၼ်ႇတူဝ်ႇ လုၵ်ႉၼိူဝ်လွႆတႆးလႅင်းမႃး မီး 60 ၵေႃႉ ၶဝ်သင်ႇၵၼ်မႃးဝႃႈ တေလႆႈၸႅၵ်ႇၽေၵၼ်သေ ႁဵတ်းၵၢၼ်ဝႃႇ ႁႅင်းသိုၵ်းဢၼ်တေထႅမ်သူ မီး 600 ၵေႃႉၼႆသေ ၸႂ်ႉၶဝ်ႈမႃးႁႃ လၵ်ႉယိုဝ်း လၵ်ႉပွႆႇမၢၵ်ႇယူႇ ၵမ်ႈၽွင်ႈဢမ်ႇၸၢင်ႈဢွၵ်ႇၶိုၼ်း လႄႈ ၵႃႈလႆႈယွမ်းတူဝ် ပၢႆႈၶဝ်ႈယူႇဝႆႉ ၼႂ်းၸုမ်းႁဝ်းၵေႃႈ မီးတင်းၼမ်” ဝႃႈၼႆ။

ၵဵဝ်ႇလူၺ်ႈဢၼ်ၶွင်ႇသီႇသိုၵ်းမၢၼ်ႈ ႁႂ်ႈထွႆထွၼ်ဢွၵ်ႇၼႃႈလိၼ်ပွတ်းၸၢၼ်းၼႆႉ ၽၢႆႇတပ်ႉသိုၵ်း ၸိုင်ႈတႆး SSPP/SSA တိုၼ်းဢမ်ႇၸၢင်ႈထွႆသင်ဝႃႈ ၽၢႆႇၶွင်ႇသီႇသိုၵ်းမၢၼ်ႈယိုဝ်းၵေႃႈ ၽၢႆႇ SSPP/SSA တိုၼ်းတေတႃႇသူႈၶိုၼ်းယူႇယဝ်ႉ။

#shanstateprogressparty #shanstatearmy

#ဝဵင်းလၢႆးၶႃႈ

#ၶဵင်ႈၶႅင်ၵၢၼ်သိုၵ်း