ၶွင်ႇသီႇသိုၵ်းမၢၼ်ႈ ဢၼ်တူင်ႉၼိုင်ၼႂ်းထုင်ႉၼမ်ႉပွင်ႈ ၸေႈဝဵင်းလႃႈသဵဝ်ႈ ၸိုင်ႈတႆးပွတ်းႁွင်ႇၼၼ်ႉ ယိုဝ်းၵွင်ႈလူင်/ဢွၼ်ႇ ၸွမ်းလွႆ လႄႈ ၵူၼ်းဝၢၼ်ႈၼႂ်းပိုၼ်ႉတီႈ ဢၼ်တိုၵ်ႉႁဵတ်းၵၢၼ်ၽုၵ်ႇသွမ်ႈ ဢွၼ်ၵၼ်တူၵ်းၸႂ် ထၢင်ႇပဵၼ်ပၢင်တိုၵ်းၼႆသေ ဢွၼ်ၵၼ်လႅၼ်ႈပၢႆ ႁႃတီႈလွတ်ႈၽေး ယူႇယဝ်ႉ။
မိူဝ်ႈဝၼ်းထီႉ 07/06/2023 ၶၢဝ်းယၢမ်းဝၢႆးဝၼ်း 2:00 မူင်းပၢႆ သၢႆသိုၵ်း ၶွင်ႇသီႇသိုၵ်းမၢၼ်ႈ ႁႅင်းသိုၵ်း မွၵ်ႈ 100 ၵေႃႉ ၸႂ်ႉၵွင်ႈလူင်သေ ပိုတ်းယိုဝ်းၸွမ်း လွႆၽၢႆး ဢၼ်မီးၾၢႆႇၸၢၼ်း ဝၢၼ်ႈၼႃးၵႃႈၸၢၼ်း ဢိူင်ႇၼႃးၼၢင်း ထုင်ႉၼမ်ႉပွင်ႈ ၸေႈဝဵင်းလႃႈသဵဝ်ႈ ၼၼ်ႉ (7) ၵမ်း သမ်ႉယိုဝ်းပႃးၵွင်ႈဢွၼ်ႇထႅင်ႈလႄႈ ၵူၼ်းဝၢၼ်ႈ ဢိူင်ႇၼႃးၼၢင်း ဢၼ်တိုၵ်ႉႁဵတ်းၵၢၼ် ႁႆႊ ၊သူၼ် ၊ ၼႃး ၸိူဝ်းၼၼ်ႉ တူၵ်းၸႂ် ထၢင်ႇပဵၼ် ပၢင်တိုၵ်း လႄႈ ဢွၼ်ၵၼ်လႅၼ်ႈပၢႆႈ ပႅပ်ႉၸွမ်းၼႂ်းထိူၼ်ႇ ထဵင်ႁႆႊ/ၼႃး ၸိူဝ်းပဵၼ်တီႈလွတ်ႈၽေး ၼၼ်ႉယူႇယဝ်ႉ။
ၵူၼ်းပိုၼ်ႉတီႈ ဢိူင်ႇၼႃးၼၢင်း ၵေႃႉၼိုင်ႈ လၢတ်ႈၼႄဝႃႈ – “ၸႂ်ႈၶႃႈဢေႃႈ ၶဝ်ယိုဝ်းမၢၵ်ႇလူင် 7 ၵမ်းၼႆႉယဝ်ႉ ဢၼ်ယူႇႁိမ်းလွႆၽၢႆးၼၼ်ႉသေ ယိုဝ်းသႂ်ႇၼိူဝ်လွႆၽၢႆးတေႉ တေမီးမွၵ်ႈ 5 ၵမ်း ယိုဝ်းပႃးၵွင်ႈဢွၼ်ၽွင်ႈ ၊ သမ်ႉလုၵ်ႉတီႈတပ်ႉသိုၵ်းမၢၼ်ႈ ၼမ်ႉပွင်ႈၼၼ်ႉသေယိုဝ်းၵႂႃႇ 2 ၵမ်း ႁဝ်းၶႃႈတေႉထၢင်ႇပဵၼ်ပၢင်တိုၵ်းၶဢေႃႈ ၵူၼ်းဢၼ်ၵႂႃႇႁႆႈ ၵႂႃႇၼႃးၵေႃႈ ဢွၼ်ၵၼ်လႅၼ်ႈပၢႆႈ ႁၢမ်းၶၢဝ်းယၢမ်းႁဵတ်းၵၢၼ် ၼၼ်ႉၶႃႈဢေႃႈ။ လိူဝ်ၼၼ်ႉၵေႃႈ မၼ်းတုမ်ႉတိူဝ်ႉပၢႆးၸႂ်ၵူၼ်းၶၼႃႇၼေႃႈ” ဝႃႈၼႆ။
မိူဝ်ႈပူၼ်ႉမႃး ဝၼ်းထီႉ 02/06/2023 ၼၼ်ႉၵေႃႈ တပ်ႉသိုၵ်းၵဝ်ႈၵၢင်ႉ MNDAA တင်းၶွင်ႇသီႇသိုၵ်းမၢၼ်ႈ လႆႈပဵၼ်ပၢင်တိုၵ်းၵၼ် ၼႂ်းၵႄႈဝၢၼ်ႈၼႃးမူင်ႈ – ဝၢၼ်ႈပဵင်းၺွင်ႇ ဢိူင်ႇၼႃးၼၢင်း ထုင်ႉၼမ်ႉပွင်ႈ ၸေႈဝဵင်းလႃႈသဵဝ်ႈသေ တေႃႇထိုင်ယၢမ်းလဵဝ်ၵေႃႈ တိုၵ်ႉမီးလွင်ႈၶဵင်ႈၶႅင် ၼႃႈသိုၵ်းတေႃႇၵၼ်ဝႆႉယူႇၼႂ်းပိုၼ်ႉတီႈ လႄႈ ၵူၼ်းမိူင်းၼႂ်းပိုၼ်ႉတီႈ ဢွၼ်ၵၼ်မႆႈၸႂ် ၵူဝ်ပဵၼ်ပၢင်တိုၵ်း ၽွင်းတိုၵ်ႉလူဝ်ႇၼႅတ်ႈႁဵတ်းၵၢၼ် ၽုၵ်ႇသွမ်ႈယူႇ ဝႃႈၼႆ။
photo .credit
