မိူဝ်ႈဝၼ်းထီႉ 28.06.2023 ယၢမ်းဝၢႆးဝၼ်း မွၵ်ႈ 1:00 မူင်းၼၼ်ႉ မီးၸုမ်းၵူၼ်းၸူၼ် ၶဝ်ႈၸူၼ် လၢၼ်ႉၶမ်း တမႃႇတီႉ ဢၼ်မီးၼႂ်းပွၵ်ႉ ၼႃးၶႃႇႁွင်ႇ ၸေႈဝဵင်းမိူင်းယွင်း ၸိုင်ႈမိူင်းၶၢင် ၸူၼ်လႆႈၵႂႃႇ ၶမ်းၵူႈသႅၼ်းသႅၼ်း ၼမ်ႉၼၵ်းတေမီးမွၵ်ႈ 50 ၵျႃပ်ႈ ပေႃးသွၼ်ႇသၢင်ႉငိုၼ်း တေတူၵ်းမႅၼ်ႈ 1500 သႅၼ် ယူႇၼႆယဝ်ႉ။
ၵူၼ်းမိူင်းပိုၼ်ႉတီႈၵေႃႈၼိုင်ႈလၢတ်ႈၼႄ ၸုမ်းၶၢဝ်ႇ DVB ဝႃႈ – “ မိူဝ်ႈၼႆႉ မွၵ်ႈယၢမ်း ဝၢႆးဝၼ်း 1 :00 မူင်း ၼၼ်ႉ မီးၽူႈၸၢႆး (6) ၵေႃႉ ၶီႈလူတ်ႉၶိူင်ႈ မႃး (3)လမ်း ဢွၼ်ၵၼ်ၵိုတ်းလူတ်ႉသေ ၶဝ်ႈမႃးၼႂ်းလၢၼ်ႉၶမ်း ဢဝ် ၵွင်ႈမႃးငႃၵူၼ်းႁဵတ်းၵၢၼ် ၼႂ်းလၢၼ်ႉသေ ဢဝ်ၶမ်းၵႂႃႇ ဢေႃႈ။ မိူဝ်ႈၼၼ်ႉ ၸဝ်ႈလၢၼ်ႉၵေႃႈ မီးဝႆႉယူႇၶႃႈ။လွင်ႈပိုတ်းယိုဝ်း ၵၼ်တႄႉ ဢမ်ႇမီးၶႃႈ။ ၶဝ်ပူတ်းဢဝ်ၶမ်း ၼႂ်းလၢၼ်ႉၼႆႉ သေ ဢွၵ်ႇၵႂႃႇပႅတ်ႈဢေႃႈ” လၢတ်ႈ ၼင်ႇၼႆ။
ဝၢႆးသေ ၽူႈၸၢႆး (6) ၵေႃႉ ၸူၼ်လႆႈၶူဝ်းၶမ်းတီႈလၢၼ်ႉၼၼ်ႉယဝ်ႉ ဢွၼ်ၵၼ်ၶီႇလူတ်ႉၶိူင်ႈ ပၢႆႈ ဢွၵ်ႇၵႂႃႇတၢင်း ပွၵ်ႉ (ၼၢင်းမႃး) ၼႆလႄႈ ၶွင်ႇသီႇသိုၵ်း မၢၼ်ႈတင်းၾၢႆႇပလိၵ်ႈၶဝ် တိုၵ်ႉဢွၼ်ၵၼ်လမ်းၵႂႃႇသေ မိူၼ်ၼင်ႇတီႈၵိၵ်ႉလၢၼ်ႇ (ၼင်ႉသီးဢွင်ႇ) လႄႈ တီႈ ၵိၵ်ႉလၢၼ်ႇ ဢၼ်လုၵ်ႉ ၼၢင်းမႃး ၵႂႃႇတၢင်း ႁူဝ်ပၢင်ႇ ၸိူဝ်းၼၼ်ႉၵေႃႈ ၽူႈမီးပုၼ်ႈၽွၼ်း ၼႂ်းၶွင်ႇသီႇမၢၼ်ႈၶဝ် ဢွၼ်ၵၼ်ပႂ်ႉၵူတ်ႇထတ်း ၸႅတ်ႈထၢမ် ၵူၼ်း ၵႂႃႇမႃးယူႇ ဝႃႈၼႆ။
Photo -Credit
#shanstateprogressparty
#shanstatearmy
#ၸူၼ်
#ၸေႈဝဵင်းမိူင်းယွင်း
