မိူဝ်ႈဝၼ်းထီႉ 18 .06. 2023 ၼၼ်ႉ ယွၼ်ႉ ၾူၼ်လူင်တူၵ်းႁႅင်း ၼႂ်းမိူင်းၼီႇပေႃးပွတ်းဢွၵ်ႇသေ ႁဵတ်းႁႂ်ႈ ၵူၼ်းမိူင်းလႆႈလူႉတၢႆၸွမ်း (1)ၵေႃႉ ၊ ႁၢႆလၢႆဝႆႉမွၵ်ႈ 25 ၵေႃႉယူႇ ၼႆယဝ်ႉ။
ၽူႈမီးၸၼ်ႉ ၾၢႆႇလူင်ပွင်ၸိုင်ႈၵေႃႉၼိုင်ႈ လၢတ်ႈၼႄ ဝႃႈ- “ ၽူႈႁၢပ်ႇထၢမ်းၵၢၼ် ၼႂ်း ႁူင်းၵၢၼ်ၾႆးၾႃႉ ဢၼ်တိုၵ်ႉၵေႃႇသၢင်ႈဝႆႉတီႈ မႄႈၼမ်ႉဝႃႇ ဢၼ်မီးၼႂ်း ၸေႈဝဵင်း သႃႇၵူႇဝႃႇသပၢတ်ႉ မိူင်းၼီႇပေႃး ပွတ်းဢွၵ်ႇ ၼၼ်ႉ ႁၢႆဝႆႉတႃႇ 16 ၵေႃႉ ယူႇ” ဝႃႈၼႆ။
ၵူၼ်းဢၼ်ႁၢႆဝႆႉ 16 ၵေႃႉၼၼ်ႉ ယူႇတီႈၾၢႆႇၽူႈမီးပုၼ်ႈ ၽွၼ်း တပ်ႉႁၢၼ်ၶဝ် တိုၵ်ႉၸွမ်းႁႃဝႆႉယူႇလႄႈ တိုၵ်ႉလႆႈထူပ်းႁၼ် တူဝ်တၢႆတႃႇ 1 ၵေႃႉၵူၺ်း ဝႃႈၼႆ။
လိူဝ်သေၼၼ်ႉ မိူင်းႁိမ်းႁွမ်း ၼႃႈတီႈ ၸိူဝ်းလႅၼ်လိၼ်တိတ်းၸပ်း ၾၢႆႇဢွၵ်ႇ မိူင်းဢိၼ်ႇတိယ မိူၼ်ၼင်ႇ ၸေႈတွၼ်ႈ တပႄႇ(လ်) ၵျွင်း ၊ ၸေႈတွၼ်ႈ ပၼ်ႇ ၶျႃႇတႃႇၵေႃႈ ယွၼ်ႉၾူၼ်တူၵ်းႁႅင်း လိၼ်ၵူၼ်ႇ သေ ၵူၼ်းမိူင်းႁႆၢဝႆႉ (9) ၵေႃႉ ၊ လင်ႁိူၼ်းၵူၼ်းလွင်ႈၸွမ်း ၼမ်ႉ တႃႇ (20) လင် လႄႈ ၶူဝ်ဢၼ်မီးၼိူဝ် သဵၼ်ႈတၢင်းလူင် (2)ဢၼ် ၵေႃႈ လႆႈလူႉၵူၼ်ႇၵွႆ ၵႂႃႇၸွမ်းၼမ်ႉ ဝႃႈ ၼႆ။
မိူင်းၼီႇပေႃး ဢၼ်မီးၼႂ်းၵႄႈၵၢင် မိူင်းၶေႇ – မိူင်း ဢိၼ်းတီးယႃး ဢၼ်မီးလွႆသုင်ဝႆႉ တၢင်းၼမ်ၼၼ်ႉ ယွၼ်ႉလႆႈထူပ်းၽေး သၽႃႇဝ ၼမ်ႉလူၵ်ႈ ၊ ၼမ်ႉထူမ်ႈၵူႈပီႊပီႊ လႄႈ ႁဵတ်းႁႂ်ႈ လင်ႁိူၼ်း ၊ မၢၵ်ႇၶဝ်ႈ တဝ်ႈ ၼမ်ႉ လူႉသုမ်းၸွမ်းတၢင်းၼမ် သေ ၵူၼ်းၼပ်ႉႁူဝ်ပၢၵ်ႇ ၵေႃႉလႆႈလူႉတၢႆ ၊ ႁၢႆလၢႆၵႂႃႇၵေႃႈ ယၢမ်ႈမီးမႃး ယူႇယဝ်ႉ ဝႃႈၼႆ ။
Photo -Credit
