မိူဝ်ႈၼႆႉဝၼ်းထီႉ 22 /06/2023 ၶၢဝ်းယၢမ်းၵၢင်ၼႂ် 8:00 တေႃႇထိုင် 8 :30 ယူႇတီႈ ၸဝ်ႈသိုၵ်းလူင် လၢဝ်ႁိူဝ်ႈ လႄႈ ၸဝ်ႈႁၢၼ်ၽုင်းႁၢၼ် ၽူႈၵွၼ်းႁွင်ႈၵၢၼ် ဢွၼ်ႁူဝ်ပိုတ်ႇၽုၺ်ႇ ပၢင်သွၼ် ငဝ်ႈၶၢမ်ႇပိုၼ်ႉ Computer ၸုပ်ႈထီႉ ( 6 ) လႄႈ မီးၽူႈယႂ်ႇၵူၼ်းလူင် လၢႆလၢႆၸဝ်ႈ ဢိၵ်ႇပႃး ၽူႈလဵပ်ႈႁဵၼ်းၶိုၼ်ႈႁွတ်ႈ 56 ၵေႃႉသေ ပိုတ်ႇၽုၺ်ႇပၢင်သွၼ်ၵႂႃႇယူႇယဝ်ႉ။
ၸဝ်ႈသိုၵ်းလူင် လၢဝ်ႁိူဝ်ႈ မွၵ်ႇလၢတ်ႈၶေႃႈၵႂၢမ်းဝႃႈ -“ ပူၼ်ႉမႃးမိူဝ်ႈပၢၼ် 1995 ၽၢႆႇပုၼ်ႉၼၼ်ႉ ႁဝ်းဢမ်ႇႁူႉၸၵ်း Computer ဢၼ်ၶိုတ်ႈၵၢပ်ႈ လႄႈ ၸႂ်ႉၵၢၼ်လုမ်းငၢႆႈဝႆးၸိူင်ႉၼၼ် ၊ မိူဝ်ႈပၢၼ် ၼၼ်ႉ မိူင်းၶႄႇတိုၵ်ႉၸႂ်ႉ တူဝ်လိၵ်ႈၵိင်ႈဢဝ်ၵူၺ်း ၊ ဝၢႆးၼၼ်ႉၸင်ႇၵွႆႈမီးမႃး ဢၼ်ပၢၼ်ၼိုင်ႈ ယဝ်ႉ ပၢၼ်ၼိုင်ႈ တေႃႇထိုင်ၵၢပ်ႈပၢၼ်မိူဝ်ႈလဵဝ်ဢၼ်ၶိုတ်းဝႆးၸႂ်ႉၵၢၼ်လုမ်းၵေႃႈငၢႆႈ ပၢၼ်ႁဝ်းၶႃႈ ၼၼ်ႉ ၵူၺ်းၸႂ်ႉၸေႈဢဝ်ၵူၺ်း ၊ ၵွပ်ႈၼၼ် ၵၢၼ်သွၼ် Computer ႁဝ်းၶႃႈၼႆႉ မၼ်းလမ်ႇလွင်ႈ တႃႇၵၢၼ်လုမ်း မုၵ်ႉၸုမ်း SSPP/SSA ႁဝ်းၶႃႈ လႄႈ ႁႂ်ႈၶတ်းၸႂ်ႁဵၼ်းသွၼ်ဢဝ်ၵႂႃႇႁင်းၽႂ် ႁင်းမၼ်းၵူႈၵေႃႉသေ ၵမ်း ” ဝႃႈၼႆ။
ၸဝ်ႈႁၢၼ်ၽုင်းႁၢၼ် – ၶိုၼ်းသိုပ်ႇလၢတ်ႈၼႄ ပိူင်ၵၢၼ်လၢႆးၵၢၼ်ႁဵၼ်းသွၼ် လႄႈ မၢႆမီႈပၵ်းပိူင် ၵဵဝ်ႇလူၺ်ႈၵၢၼ်ယူႇသဝ်း ၶၢဝ်းယၢမ်းပၢင်သွၼ် လွင်ႈတူင်ႉၼိုင်ၼႂ်းပၢင်သွၼ်ၸိူဝ်းၼႆႉၵႂႃႇယူႇ။
ပၢင်သွၼ် Computer ၼႆႉ ဢိင်ၼိူဝ်ၵၢၼ်တၢင်းပဵၼ် ၶူဝ်ႊဝိတ်ႉၵေႃႈပိူင်ၼိုင်ႈ ဢိင်ၼိူဝ်ၵၢၼ်သိုၵ်း ၵေႃႈဢမ်ႇပႆႇၼိမ်မၼ်ႈၵေႃႈပိူင်ၼိုင်ႈ လႄႈ လႆႈၵိုတ်ႉယင်ႉၵၢၼ်ႁဵၼ်းသွၼ်မႃးလၢႆပီႊသေ ပီႊ 2023 ၼႆႉၶိုၼ်းသိုပ်ႇပိုတ်ႇပၢင်သွၼ်ၵႂႃႇယူႇယဝ်ႉ။
