မိူဝ်ႈၼႆႉဝၼ်းထီႉ 07/လိူၼ် Fabruary 2023 ၶၢဝ်းယၢမ်းၵၢင်ၼႂ် 8 မူင်း တေႃႇထိုင် 9 မူင်း ယူႇတီႈငဝ်ႈငုၼ်းပႃႇတီႇမႂ်ႇသုင်ၸိုင်ႈတႆး တပ်ႉသိုၵ်းၸိုင်ႈတႆး ဢွၼ်ႁူဝ်သေ ၸတ်းႁဵတ်းပၢင်ၵႅဝ်ႈ ဝၼ်းမၢႆတွင်း ဝၼ်းၸိူဝ်ႉၸၢတ်ႈၸိုင်ႈတႆး ၶွပ်ႈၶူပ်ႇ 76 ပီႊတဵမ် ဢွင်ႈတီႈႁူင်းႁဵၼ်းသိုၵ်းငဝ်ႈငုၼ်း SSPP/SSA မီးၵူၼ်းမိူင်းၵူၼ်းသိုၵ်း ၽူႈယႂ်ႇၵူၼ်းလူင် လၢႆလၢႆၸဝ်ႈၶိုၼ်ႈႁွတ်ႈ တင်ႈသဵင်ႈ 2800 ၵေႃႉပၢႆ။
“ ၸွမ်သိုၵ်းလူင်သိူဝ်ထႅၼ်ႈ ၽူႈၼမ်းၼႃႈ ထီႉ-1 မွၵ်ႇလၢတ်ႈၶေႃႈၵႂၢမ်း ၶူၼ်ႉၶႆႈၼႄလွင်းပိုၼ်းတႄႇပဵၼ်မႃး ဝၼ်းၸိူဝ်ႉၸၢတ်ႈၸိုင်ႈတႆး ဢမ်ႇၼၼ်တႄႇႁွင်ႉဝၼ်းၶိူဝ်းတႆး ၊ထိုင်ယၢမ်းၼႆႉလႅၵ်ႈလၢႆႈ ၶိုၼ်းႁွင်ႉဝႃႈ ဝၼ်းၸိူဝ်ႉၸၢတ်ႈၸိုင်ႈတႆးၸိူဝ်းၼႆႉ ၊ ၶူၼ်ႉၶႆႈၼႄပႃးပိုၼ်းပဵၼ်မႃး ဝၼ်းၸိူဝ်ႉၸၢတ်ႈၸိုင်ႈတႆး ဢိင်ၼိူဝ်ၶေႃႈၵိၼ်ၵႅၼ်ႇလိၵ်ႈႁူမ်ႈမၢႆပၢင်လူင် လႆႈတူၵ်းလူင်း လွင်ႈသင်ၵၼ်မႃးလၢႆၶေႃႈ ၊ ၸွမ်သိုၵ်းဢွင်ႇသၢၼ်း ဢိၵ်ႇပႃးသိုၵ်းမၢၼ်ႈ ၶဝ်သမ်ႉႁဵတ်းလွၵ်းလိင်ႉ တေႃႇၸၢဝ်းၶိူဝ်းႁိုဝ်သေ ၸၢဝ်းၶိူဝ်းလၢႆၸုမ်းသမ်ႉပေႃးလႆႈတူၵ်းလွၵ်းသိုၵ်းမၢၼ်ႈ ၊ လႆႈသုမ်းသုၼ်ႇလႆႈသုၼ်ႇပဵၼ်ၵူႈလွင်ႈ ၊ ဢိၵ်ႇပႃး လွင်သိုၵ်းမၢၼ်ႈ ပိၵ်ႉဢိုတ်းၵၢၼ်လိၵ်ႈလၢႆးတႆး ၵၢၼ်ပိုၼ်းတႆးသေ ၽူႈၵတ်ႉၶႅၼ်ႇတႆး လၢႆလၢႆၸဝ်ႈလႆႈတူၵ်းၶွၵ်ႈယွၼ်ႉၵၢၼ်မိူင်း ၊ ပႃးတူဝ်မၼ်းၸဝ်ႈၵေႃႉၼိုင်ႈ၊ လိူဝ်သေၼၼ်ႉၵေႃႈ ၸၢဝ်းၶိူဝ်းထိုင်တီႈလႆႈသုမ်းမိူင်းမႃးၸဵမ်ၸိူဝ်းၼႆႉ ” ၶူၼ်ႉၶႆႈမွၵ်ႇလၢတ်ႈၵႂႃႇယူႇယဝ်ႉ ။
ဝၢႆးသေၶူၼ်ႉၶႆႈပိုၼ်းပဵၼ်ဝၼ်းၸိူဝ်ႉၸၢတ်ႈၸိုင်ႈတႆးယဝ်ႉ၊ လူဢၢၼ် ၽိုၼ်လိၵ်ႈၸုမ်းပႃႇတီႇၵၢၼ်ပၢႆးမိူင်းႁူဝ်သိူဝ် SNLD ယိုၼ်ႈထိုင်ဝၼ်းပၢင်ၵႅဝ်ႈမၢႆတွင်း ဝၼ်းၸိူဝ်ႉၸၢတ်ႈၸိုင်ႈတႆးယဝ်ႉတူဝ်ႈသေပူတ်းလိုဝ်ႈပၢင်ၵႅဝ်ႈၵႂႃႇ ။#shanstateprogressparty
#shanstatearmy
#ssppinfo
#ဝၼ်းၸိူဝ်ႉၸၢတ်ႈၸိုင်ႈတႆး
