မိူဝ်ႈဝၼ်းထီႉ 21.06.2023 ၼၼ်ႉ တီႈငဝ်ႈငုၼ်းလႆႈၸတ်းႁဵတ်း ပၢင်ၽိုၵ်းၽွၼ်ႉ ၸုပ်ႈထီႉ (13) မေႃသွၼ် တႃႇတေပူင်သွၼ်လႆႈ ၼႂ်းႁူင်းႁဵၼ်း ဢၼ်တေပိုတ်ႇၽုၺ်ႇ ၼႂ်းပီႊ 2023 ဢွင်ႈတီႈလုမ်းၵူၼ်းၼုမ်ႇ SSYCBC ဝၢၼ်ႈႁႆး ၸေႈဝဵင်းၵေးသီး ၸိုင်ႈတႆးပွတ်းၸၢၼ်း။

ၽူႈမီးပုၼ်ႈၽွၼ်းၵေႃႉၼိုင်ႈလၢတ်ႈဝႃႈ- “ ၼႂ်းပီႊ 2023 ၼႆႉ လႆႈပိုတ်ႇၽုၺ်ႇ ပၢင်သွၼ် ယုၵ်ႉမုၼ်း ၼမ်ႉၵတ်ႉမေႃသွၼ် ယဝ်ႉၵႂႃႇ (1) ၸုပ်ႈ ယဝ်ႉဢေႃႈ၊ ဢိင်ၼိူဝ်ႁူင်းႁဵၼ်း လႆႈပိုတ်ႇၽုၺ်ႇၼႂ်းပီႊၼႆႉ သမ်ႉတိူဝ်းၼမ်မႃးထႅင်ႈ လႄႈ မေႃသွၼ် တႃႇႁူင်းႁဵၼ်းသမ်ႉဢမ်ႇၵုမ်ႇထူၼ်ႈ ၵွပ်ႈၼၼ် ႁဝ်းၶႃႈလႆႈ ၶိုၼ်းပိုတ်ႇပၢင်သွၼ် ၽိူမ်ႉထႅမ်ၼမ်ႉၵတ်ႉမေႃသွၼ် ၶၢဝ်းပွတ်းထႅင်ႈသေ ၽူႈလဵပ်ႈႁဵၼ်းမီး (24) ၵေႃႉယူႇၶႃႈ၊ ပိူင်လူင်မၼ်း တႃႇတေၶိုၼ်းၽိူမ်ႉထႅမ်မေႃသွၼ်ပၼ် တီႈႁူင်းႁဵၼ်းၸိူဝ်း လုတ်ႈႁၢမ်းဝႆႉ မေႃသွၼ်ၼၼ်ႉၶႃႈဢေႃႈ” ဝႃႈၼႆ။

ယိူင်းဢၢၼ်းတႃႇႁႂ်ႈလုၵ်ႈဢွၼ်ႇ ၸိူဝ်းဢမ်ႇလႆႈၶိုၼ်ႈႁဵၼ်း ၸိူဝ်းဢၼ်ယူႇၵႆႁူင်းႁဵၼ်း ၸိူဝ်းၼႆႉ လၢႆလၢႆတီႈ ႁႂ်ႈပေႃးၸၢင်ႈမေႃလိၵ်ႈႁူႉလိၵ်ႈ လႄႈ လႆႈၶိုၼ်ႈႁဵၼ်းသွၼ် ၵွပ်ႈမၢင်တီႈမၢင်ဝၢၼ်ႈ ဢမ်ႇမီးႁူင်းႁဵၼ်း ဢမ်ႇမီးမေႃသွၼ် လႄႈ ယူႇတီႈငဝ်ႈငုၼ်း ပႃႇတီႇမႂ်ႇသုင်ၸိုင်ႈတႆး တပ်ႉသိုၵ်းၸိုင်ႈတႆး လႆႈၵေႃႇသၢင်ႈပၼ်ႁူင်းႁဵၼ်း ၊ မေႃသွၼ် ၊ ၸိူဝ်းၼႆႉ တင်းၼမ်တၢင်းလၢႆယူႇယဝ်ႉ။

ပၢင်သွၼ်ၽိူမ်ႉထႅမ်ၼမ်ႉၵတ်ႉမေႃသွၼ်ၼႆႉ ယူႇတီႈလုမ်းၵူၼ်းၼုမ်ႇၸိုင်ႈတႆး SSYCBCသေ ဢွၼ် ႁူဝ်ပိုတ်ႇၽုၺ်ႇမႃးယူႇၵူႈပီႊပီႊ ၼႂ်းပီႊ 2023 မေႃသွၼ် ဢၼ်လႆႈလူင်းပိုၼ်ႉတီႈပိုတ်ႇၽုၺ်ႇပူင်သွၼ် ၼႂ်းႁူင်းႁဵၼ်း မီးၵႂႃႇ ႁိမ်း 200 ၵေႃႉ ႁူင်းႁဵၼ်းဢၼ် လႆႈပိုတ်ႇၽုၺ်ႇၵႂႃႇ မီး100 လင်ပၢႆယူႇယဝ်ႉ၊ ၵဵဝ်ႇလူၺ်ႈၵၢၼ်ပၢႆးပိင်ႇၺႃႇၼႆႉသေ ၼင်ႇႁိုဝ်ၵၢၼ်ႁဵတ်းၵၢၼ်သွၼ် ႁႂ်ႈပေႃးၶိုၼ်ႈယႂ်ႇ လႄႈ လုၵ်ႈႁဵၼ်း ပေႃးတေလႆႈႁပ်ႉလွင်ႈၵၢၼ်ႁဵၼ်းသွၼ်ၵႂႃႇၼၼ်ႉ ယူႇတီႈ ငဝ်ႈငုၼ်း ပႃႇတီႇမႂ်ႇသုင်ၸိုင်ႈတႆး SSPP/SSA ဢွၼ်ႁူဝ်သေ ၶတ်းၸႂ်ၵေႃႇသၢင်ႈပူၵ်းပွင်မႃးယူႇၵူႈပီႊပီႊ ယူႇယဝ်ႉ။

#shanstateprogressparty

#shanstatearmy

#SSYCBC

#ပၢင်ၽိုၵ်းၽွၼ်ႉမေႃသွၼ်