ငဝ်ႈငုၼ်းပႃႇတီႇမႂ်ႇသုင်ၸိုင်ႈတႆး တပ်ႉသိုၵ်းၸိုင်ႈတႆး ဢွၼ်ႁူဝ် ၸတ်းႁဵတ်းပၢင်လူင်းလိုဝ်ႈ ပၢင်သွၼ် ၵၢၼ်သိုၵ်း ၸုပ်ႈထီႉ 46 မီးၽူႈယႂ်ႇၵူၼ်းလူင် လႄႈ ၵူၼ်းသိုၵ်းႁူမ်ႈၼိုင်ႈႁဵင်ပၢႆ ။
မိူဝ်ႈၼႆႉဝၼ်းထီႉ -14 / လိူၼ်ၵျၢၼ်ႇၼႃႇဝႃႇရီႇ/ ပီႊ 2023 ၼီႊ ယူႇတီႈၽူႈယႂ်ႇၵူၼ်းလူင် SSPP/SSA ၵႅမ်ႁူဝ်ပဝ်ႈထီႉ -1 ၽူႈပွင်ၵၢၼ်သိုၵ်း ၊ ၵႅမ်ၽူႈပွင်ၵၢၼ်သိုၵ်း ၊ ၽူႈၵွၼ်းတပ်ႉငဝ်ႈသိုၵ်း ၊ ဢိၵ်ႇပႃး ၽူႈမီးၸၼ်ႉလၢႆလၢႆၸဝ်ႈ ၶဝ်ႈႁူမ်ႈၼႂ်းပၢင်လူင်းပၢင်သွၼ် ဢၼ်မီးလုၵ်ႈႁဵၼ်းသိုၵ်း ၼိုင်ႈႁဵင်ပၢႆ ၶိုၼ်ႈႁွတ်ႈ ၊ ဢွင်ႈတီႈႁူင်းႁဵၼ်း ၽိုၵ်းသွၼ်ၵၢၼ်သိုၵ်းငဝ်ႈငုၼ်း ။
ၵႅမ်ၽူႈပွင်ၵၢၼ်သိုၵ်းထီႉ-1 မွၵ်ႇလၢတ်ႈၶေႃႈၵႂၢမ်းၵႂႃႇဝႃႈ – မိူဝ်ႈမႃးပဵၼ်ၵေႃႉႁၢၼ် ဢွၵ်ႇၵႂႃႇပဵၼ်ၵေႃႉငၢၼ် သင်ၸိူဝ်ႉ လူင်းပၢင်သွၼ်ၼႆႉၵႂႃႇယဝ်ႉၸိုင် ၵႂႃႇယူႇတီႈလႂ်ၽႅဝ်တီႈလႂ် တပ်ႉလႂ် ႁွင်ႈၵၢၼ်လႂ်ၵေႃႈယဝ်ႉ တေလႆႈ ပဵၼ်သိုၵ်း ဢၼ်ႁဵတ်းလဵင်ႉ ႁဵတ်းလူၵူၼ်းမိူင်း လႄႈ တေလႆႈပဵၼ်သိုၵ်း ဢၼ်ၵႅတ်ႇၶႄပၼ် ၵူၼ်းမိူင်းႁဝ်း ယူႇယဝ်ႉ ၊ သိုၵ်းၼႆႉၵေႃႈ တိုၼ်း လုၵ်ႉတီႈပေႃႈမႄႈၵူၼ်းမိူင်းမႃး လႄႈ သင်ၸိူဝ်ႉ လူင်းပၢင်သွၼ်ယဝ်ႉသေ ၵႂႃႇယူႇတီႈ တၢင်းလႂ်ၵေႃႈယဝ်ႉ တိုၼ်းလူဝ်ႇမေႃႁၵ်ႉၵူၼ်းမိူင်း ၊ ႁဵတ်းလဵင်ႉ ႁဵတ်းလူၵူၼ်းမိူင်း ၊ ၵႅတ်ႇၶႄ ပၼ်ၵူၼ်းမိူင်းႁဝ်း သေၵမ်းၼႆႉယူႇယဝ်ႉ ။
လိူဝ်သေၼၼ်ႉ ၵၢၼ်သိုၵ်းၸွမ်းၼင်ႇဢၼ်လႆႈလဵပ်ႈႁဵၼ်မႃး ၵဵဝ်ႇၵပ်းလွင်ႈၵၢၼ်သိုၵ်းၸိူဝ်းၼႆႉၵေႃႈ ႁဝ်းတိုၼ်းတေလႆႈပေႉပုၼ်ႈၽူႈၶဵၼ်တႃႇသေႇ ၶၢဝ်းယၢမ်းလဵဝ် တႃႇဢွင်ႇပေႉၵၢၼ်သိုၵ်းၼႆႉ ပေႃးႁဝ်း တၼ်းလႆႈၵေႃႈ ႁဝ်းတေပေႉလႆႈၵၢၼ်သိုၵ်း ၊ ပေႃးၽူႈၶဵၼ်တၼ်းလႆႈၵေႃႈ ႁဝ်းၸၢင်ႈသုမ်းၵၢၼ်သိုၵ်း ၼႆႉပဵၼ်ၵၢၼ်သိုၵ်းယဝ်ႉ ၊ လူဝ်ႇလႆႈလႅတ်းသႅဝ်းၽႂ်းၽၢႆ ႁၢင်ႈ ႁႅၼ်းတူဝ်ႈတၼ်းတႃႇသေႇ ယႃႇယူႇမဝ် ၵိၼ်မၢင် ႁႂ်ႈလႆႈၶတ်းၸႂ် ၼႃႈၵၢၼ်ၵႂႃႇ ၸွမ်းၼင်ႇပုၼ်ႈၽွၼ်းၽႂ်မၼ်းၵႂႃႇသေၵမ်း ဝႃႈၼႆ။
လိူဝ်ၼၼ်ႉ တီႈၼႂ်းပၢင်ၵႅဝ်ႈ မီးလွင်ႈယိုၼ်ႈၶႅပ်းဝႂ် ၽူႈၵတ်ႉၶႅၼ်ႇ ၽၢႆႇယိုဝ်းၵွင်ႈၶႅၼ်ႇ ၊ ၽူႈဢွၼ်ႁူဝ်ၶႅၼ်ႇ လႄႈ ၼႄၽၢင်ႈႁၢင်ႈ ၵၢၼ်သိုၵ်း ဢၼ်လႆႈၽိုၵ်းၽွၼ်ႉမႃး ၸိူဝ်းၼႆႉသေ ယဝ်ႉတူဝ်ႈၵိုတ်းလိုဝ်ႈပၢင်ၵႅဝ်ႈ ၵႂႃႇယူႇယဝ်ႉ ။
