မိူဝ်ႈၼူဝ်ႇဝုၼ်ႇပိူဝ်ႊ 15 ပီႊ 2021 ၼႆႉ ၽူႈတၢင်တူဝ်မိူင်းၶႄႇၼႂ်းဢႄးသျႃး Mr. ၸၢၼ်ႉၵေႃႇသိၼ်း ၽွင်းတၢင်ၽၢႆႇၼွၵ်ႈမိူင်း  ႁွတ်ႈထိုင်ၼႂ်းမိူင်းမၢၼ်ႈသေ ႁူပ်ႉထူပ်းၵၼ် တင်း ၽူႈဢွၼ်ႁူဝ် သိုၵ်းမၢၼ်ႈ မိၼ်းဢွင်ႇလၢႆႇ တီႈၼေႇပျီႇတေႃႇ ဝႃႈၼႆ ။

လွင်ႈႁူပ်ႉထူပ်းၵၼ် ႁူဝ်ယွႆႈမၼ်းဢမ်ႇလႆႈႁူႉၸွမ်းသေတႃႉ ၸွမ်းၼင်ႇ ၽၢႆႇသိုၵ်းမၢၼ်ႈပိုၼ်ၽၢဝ်ႇဝႆႉ တႄႉၵေႃႈလၢတ်ႈဝႃႈ – ဢၼ်လႆႈႁူပ်ႉထူပ်းၵၼ် တင်း ၽွင်းတၢင်ၶိုၵ်ႉတွၼ်း မိူင်းၶႄႇၼႆႉ လႆႈဢုပ်ႇ ဢူဝ်းၵၼ် ၵဵဝ်ႇလူၺ်ႈလွင်ႈတေပႆၸွမ်းၼိူဝ်သဵၼ်ႈတၢင်း တီႇမူဝ်ႇၶရေႇၸီႇ ၊ လွင်ႈၵပ်းသိုပ်ႇ မိူင်းမၢၼ်ႈ လႄႈ ဢႃႇသီႇယၢၼ်ႇ ၊ ၼႂ်းမိူင်းမၢၼ်ႈ ၼင်ႇႁိုဝ်တေမီးလွင်ႈငမ်းယဵၼ်ၶိုၼ်း ၸိူဝ်းၼႆႉ ဝႃႈၼႆ ။

ၽွင်းတၢင်လူင်ၶိုၵ်ႉတွၼ်းမိူင်းၶႄႇ Mr. ၸၢၼ်းၵေႃႇသိၼ်း ႁွတ်ႈၽႅဝ်မိူင်းမၢၼ်ႈ ဝၢႆးသေၶွင်ႇသီႇ သိုၵ်းမၢၼ်ႈသိမ်းဢႃႇၼႃႇမႃးၼႆႉ မီးသွင်ပွၵ်ႈယဝ်ႉ ၊ ပူၼ်ႉမႃးမိူဝ်ႈလိူၼ်ဢေႃးၵၢသ်ႉ ၼၼ်ႉၵေႃႈ မႃးပွၵ်ႈၼိုင်ႈ ယွၼ်းႁူပ်ႉထူပ်းတင်း တေႃႇဢွင်ႇသၢၼ်းၸုႉၵျီႇ ၵူၺ်းၵႃႈ ၽၢႆႇသိုၵ်းမၢၼ်ႈ ဢမ်ႇပၼ်ထူပ်းသေ ဢမ်ႇလႆႈထူပ်း ဝႃႈၼႆ ။

ၼႂ်းမိူဝ်ႈလဵဝ်ၵၼ်ၵူၺ်း တႅၼ်းၽွင်းၵဝ်ႇ မိူင်းႁူမ်ႈတုမ်ဢမေႇရိၵၢၼ်ႇၽွင်းလူင်ၽၢႆႇၾႆးၾႃႉ ၵေႃႉၵဝ်ႇ Bill Richardson ၼၼ်ႉၵေႃႈ ႁူပ်ႉထူပ်း မိၼ်းဢွင်ႇလၢႆႇ ၽူႈဢွၼ်ႁူဝ်ယိုတ်းသိမ်းဢႃႇၼႃႇ မိူင်းမၢၼ်ႈ တီႈၼေႇပျီႇတေႃႇ မိူၼ်ၵၼ်ဝႃႈၼႆ ။

ဢုပ်ႇဢူဝ်းၵၼ် လွင်ႈတႃႇတေၵႅတ်ႇၶႄႁေႉၵင်ႈ တၢင်းပဵၼ် ၶူဝ်ႊဝိတ်ႉ – 19 ၊ လွင်ႈလူလွမ်တူၺ်းထိုင် လုမ်းလႃးၵူၼ်း၊ လိူင်ႈဢၼ်သိုၵ်းမၢၼ်ႈ ပွႆႇပၼ်သိုဝ်ႇၶၢဝ်ႇ ဢမေႇရိၵၢၼ်ႇ Danny Fenster ဢၼ်ထုၵ်ႇ တီႉၺွပ်းသႂ်ႇၶွၵ်ႈဝႆႉၸိူဝ်းၼႆႉသေ၊  ယူႇတီႈ ၽွင်းလူင်ၽၢႆႇၼွၵ်ႈမိူင်းၵေႃႉၵဝ်ႇ မိူင်းဢမေႇရိၵၢၼ်ႇ Antony Blinken ယုၵ်ႉယွင်ႈဢဝ်ၵုင်ႇမုၼ်ၼိူဝ် Bill Richardson ယူႇဝႃႈၼႆ ။

Sourse news.voanews.com