မိူင်းဢၼ် ပွႆႇဢွၵ်ႇလႆႈ ထၢတ်ႈငူၼ်ႉ ၵႃႇပုၼ်ႇတၢႆႇဢွၵ်ႉသၢႆႉ ၼမ်လိူဝ်ပိူၼ်ႈ ၼႂ်းၵၢမ်ႇၽႃႇ မိူၼ်ၼင်ႇ မိူင်းဢမေႇရိ ၵၢၼ်ႊ လႄႈ မိူင်းၶႄႇ သွင်မိူင်းၼႆႉ မိူဝ်ႈဝၼ်းထီႉ 10 November ၼၼ်ႉလႆႈပိုၼ်ၽၢဝ်ႇၵႂႃႇဝႃႈ သွင်မိူင်းမီး မီးၶေႃႈတူၵ်းလူင်းၵၼ်ဝႆႉ တႃႇတေႁူမ်ႈၵၼ်ယိပ်းၵမ် လွင်ႈၾိင်ႈၾႃႉလႅၵ်ႈလၢႆႈၼၼ်ႉဝႃႈၼႆ။

ၼႂ်းၶေႃႈတူၵ်းလူင်းၼၼ်ႉ ပႃးဝႆႉဝႃႈ တႃႇတေလူတ်းယွမ်းထၢတ်ႈငူၼ်ႉမီႇတဵင်း ၊ တႃႇတေၵႅတ်ႇၶႄထိင်းသိမ်း ထိူၼ်ႇပႃႇမႆႉလႄႈ တႃႇတေလူတ်းယွမ်း လွင်ႈၸႂ်ႉတိုဝ်း ထၢၼ်ႇငိူၵ်ႈ  ပဵၼ်ၶၵ်ႉပဵၼ်တွၼ်ႈ ၸဵမ်ၸိူဝ်းၼႆႉ ။

ပိူင်ၶေႃႈလႆႈၸႂ်တူၵ်းလူင်းၵၼ်ၼၼ်ႉ  ၽွင်းတၢင် ၾၢႆၾိုင်ႈၾႃႉရႃႇသီႇ မိူင်းဢမေႇရိၵၼ်ႊ ၸုၼ်ႇၵႄႇရီႇလႄႈ  ၽွင်းတၢင်မိူင်းၶႄႇ သျႄႉၸႅၼ်းႁႂႃႇ ၶဝ်လႆႈပိုၼ်ၽၢဝ်ႇၵႂႃႇ တီႈၼႂ်းပၢင်ၵုမ်ၸုမ်ႇၵူႈ(ညီလာခံ) ၸၢတ်ႈၸိုင်ႈ ၊ ၾၢႆႇ ၾိင်ႈၾႃႉရႃႇသီႇ ဢၼ်ၸတ်းႁဵတ်း တီႈဝဵင်းသၵေႃႉတလၢၼ်ႇၼၼ်ႉ ဝႃႈၼႆ။

ၵႄႇရီႇ လၢတ်ႈၵႂႃႇတီႈပၢင်သပ်းၸႅင်ႈၶၢဝ်ႇဝႃႈ “ၶၢဝ်းယၢမ်းတေႃႈလဵဝ် တႃႇၵႂႃႇတၢင်းၼႃႈၵူႈယၢင်ႈယၢင်ႈၼႆႉလွင်ႈ ယႂ်ႇၼႃႇ ၊ ၽၢႆႇၼႃႈႁဝ်းၼႆႉ တိုၵ်ႉမီးၶၢဝ်းတၢင်းယၢဝ်းၵႆလူင်ယူႇထႅင်ႈ” ဝႃႈၼႆ။

ၽွင်းတၢင်မိူင်းၶႄႇ သျႄႉၸႅၼ်းႁႂႃႇ လၢတ်ႈတီႈသိုဝ်ႇၶၢဝ်ႇဝႃႈ “ၼႂ်းၶေႃႈတူၵ်းလူင်းဢၼ်ပႃးဝႆႉ ပဝ်ႉမၢႆတႃႇလူတ်း ယွမ်းလႆႈ လွင်ႈၸႂ်ႉထၢတ်ႈငူၼ်ႉၼႂ်းႁိူၼ်းတိူၵ်ႈမၢၼ်ႇၼၼ်ႉ လႆႈႁၼ်မိူၼ်ၼင်ႇဝႃႈ တိူဝ်းထႅင်ႈႁႅင်းပၼ်မိူင်းၶႄႇမႃး လႄႈ သွင်ၸိုင်ႈမိူင်းၵေႃႈ ၼိုင်ႈၶႅၼ်းၶႆႈတိူဝ်းႁဵတ်းလွင်ႈၵိုတ်းယိုတ်း ၵၢၼ်ၽဵဝ်ႈမူၺ်ႉထိူၼ်ႇပႃႇမႃးယဝ်ႉ’’ ဝႃႈၼႆ။

(ဢၼ်ႇတူဝ်ႇၼီႇယူဝ်ႇ ၵူႇတႃးရႅတ်ႉ သ်) ဢၼ်ပဵၼ်ၽူႈၼမ်းၼႂ်းလူင်ၸၢတ်ႈၸိုင်ႈလုမ်ႈၾႃႉၼၼ်ႉၵေႃႈ ပၼ်ႁႅင်း ႁပ်ႉတွၼ်ႈၸွမ်း ၶေႃႈတူၵ်းလူင်း ၶႄႇလႄႈ ဢမေႇရိၵၼ်ႊၶဝ်ယူႇ ဝႃႈၼႆ။

(ၵူႇတႃးရႅတ်ႉသ်) လၢတ်ႈဝႃႈ “တႃႇတေ ယိပ်းၵမ်ၵႄႈလိတ်ႈလႆႈ ပၼ်ႁႃၽိုင်ႈၾႃႉရႃႇသီႇၼၼ်ႉ ၵူႈမိူင်းမိူင်း ထုၵ်ႇ လီမီး လွင်ႈႁူမ်ႈမိုဝ်းႁဵတ်းသၢင်ႈၸွမ်းသေ လွင်ႈၼႆႉ ပဵၼ်ပဝ်ႉမၢႆ ဢၼ်မၢၼ်ႇမႅၼ်ႈၸိုဝ်ႈၸႂ်ႈဢၼ်ၼိုင်ႈ လႄႈ  ပဵၼ်သဵၼ်ႈတၢင်း ဢၼ်လမ်ႇလွင်ႈဢၼ်ၼိုင်ႈယူႇ’’ ဝႃႈၼႆ။

ပၢင်ၵုမ်ၸုမ်ႇၵူႈ ဢၼ်ၼႆႉ ယိူင်းဢၢၼ်းႁႂ်ႈလႆႈမီးၶေႃႈမၼ်ႈၵႅၼ်ႇၼႅၼ်ႈၼႃ တႃႇလူတ်းယွမ်း ၵၢၼ်ၸႂ်ႉဢွၵ်ႇထၢတ်ႈ ငူၼ်ႉ ႁႂ်ႈပဵၼ်ႁူဝ်ပၢၵ်ႇ သုၼ် (0%) ဝႃႈၼႆ။

 ၼႂ်းပၢင်ၵုမ်ၼႆႉ တၢင်တူဝ်လူင်ပွင်ၸိုင်ႈမိူင်းၶႄႇ သျီႇၸိၼ်ႉၽိၼ်ႇ ဢမ်ႇၶိုၼ်ႈႁွတ်ႈၸွမ်းသေ သူင်ႇလိၵ်ႈပိုၼ် ၽၢဝ်ႇမႃး တႃႇလူဢၢၼ်ႇၼႂ်းၶၢဝ်းပိုတ်ႇၽုၺ်ႇပၢင်ၵုမ်ၼၼ်ႉၵူၺ်း ၼႆၶႃႈ။

ၼႂ်းလိၵ်ႈပိုၼ်ၽၢဝ်ႇၼၼ်ႉ ဢမ်ႇပႃးလွင်ႈသိုပ်ႇပၼ်ၶေႃႈမၼ်ႈၵႅၼ်ႇထႅင်ႈသေ ပႃးၶေႃႈတိုၵ်းသူၼ်းဝႃႈ ႁႂ်ႈၵူႈမိူင်း မိူင်းႁဵတ်းၸွမ်းၶေႃႈမၼ်ႈၵႅၼ်ႇလႄႈ ႁႂ်ႈထႅင်ႈႁႅင်းလွင်ႈယုမ်ႇယမ် တႃႇတေႁူမ်ႈမိုဝ်းႁဵတ်းသၢင်ႈၸွမ်းၵၼ်ၵႂႃႇ တၢင်းၼႃႈၼၼ်ႉ ဝႃႈၼႆ။

သျီႇၸိၼ်ႉၽိၼ်ႇ ယၢမ်ႈပၼ်ၶေႃႈမၼ်ႈၵႅၼ်ႇ တီႈၼႂ်းပၢင်ၵုမ်ႇၸုမ်ႇၵူႈၸၢတ်ႈၸိုင်ႈလုမ်ႈၾႃႉ ဢၼ်ၸတ်းႁဵတ်း မိူဝ်ႈၼႂ်းလိူၼ်သႅပ်ႉထိမ်ႇပႃႇ ပူၼ်ႉမႃးၼၼ်ႉဝႃႈ ၸူဝ်ႈပႆႇထိုင်ၼႂ်းပီႊ 2060 ၼႆႉ မိူင်းၶႄႇတေတိုဝ်းၵမ်ႁဵတ်းၸွမ်း လွင်ႈထူၵ်းဢွၵ်ႇထၢတ်ႈငူၼ်ႉ ႁႂ်ႈၵိုင်ႇတၢၼ်ႇၽဵင်ႇပဵင်းၸွမ်း ပႅင်ႈထုၵ်ႇလီလႆႈမီး လႆႈပဵၼ်ၼၼ်ႉၵူၺ်း ဝႃႈၼႆ။

Sourse news. Dvb.no