သိုၵ်းတူင်ႉၼိုင် ၽၢႆႇဢုပ်ႉပိူင်ႇ ၶွင်ႇသီႇဢဝ်ၶိုၼ်းၸိုင်ႈတႆး ပွႆႇၵူၼ်းသိုၵ်း တီႉၺွပ်း ၵူၼ်းမိူင်း ထႅင်ႈ ၼႂ်းဢိူင်ႇဝၢၼ်ႈၶူင်ႉ ၸေႈဝဵင်းၵေးသီး ၸိုင်ႈတႆးပွတ်းၸၢၼ်း ဝႃႈၼႆ ။

မိူဝ်ႈဝၼ်းထီႉ 10 / လိူၼ်ၼူဝ်ႊဝုၼ်ႊပိူဝ်ႊ 2021 ယၢမ်းၵၢင်ၶမ်ႈ 7 မူင်းပၢႆၼၼ်ႉ ယူႇတီႈ ၸၢႆးၼၼ်ႇတေႃး ၸဝ်ႈၼႃႈတီႈၵုမ်းၵမ် မၢႆ -7 RCSS ဢၼ်တူင်ႉၼိုင်ပၵ်းသဝ်းဝႆႉ တီႈဝၢၼ်ႈ ဝၢင်ႈမိူင်း ၽၢႆႇၸၢၼ်းတၢင်းၵႃးလူင် ႁမ်းငၢႆး- ပၢင်ႇၵေႇတူႉ ၸီႉသင်ႇၸတ်းၵူၼ်းသိုၵ်း မိူဝ်းတီႉၺွပ်းဢဝ် လုင်းဢေႃးပႃႉ ၵေႃႉပဵၼ် ၸဝ်ႈၽူဝ် ပႃႈၽွင် ယူႇဝၢၼ်ႈၵွင်းမူး ဢိူင်ႇဝၢၼ်ႈၶူင်ႉ ၸေႈဝဵင်းၵေးသီး ၊ တီႉၺွပ်းၵႂႃႇ ယွၼ်ႉလွင်ႈတၢင်းၸိူင်ႉႁိုဝ် ဢၼ်ဝႃႈၼၼ်ႉတႄႉ ယူႇတီႈၽူႈယႂ်ႇ ၵူၼ်းလူင် ၼႂ်းဝၢၼ်ႈၵေႃႈ ဢမ်ႇလႆႈႁူႉၸွမ်း ဝႃႈၼႆ။

ၽူႈမီးပုၼ်ႈၽွၼ်း ၼႂ်းဝၢၼ်ႈၵွင်းမူး လၢတ်ႈၼႄဝႃႈ – “ မိူဝ်ႈဢွၼ်တၢင်း လုၵ်ႈၸၢႆးလုင်းဢေႃးပႃႉ + ပႃႈၽွင်း ၼႆႉမၼ်းၵႂႃႇႁၢပ်ႇထၢမ်းၵၢၼ်သိုၵ်း ႁႃႈပီႊ တီႈ RCSS ၶဝ်သေ  ပူၼ်ႉမႃး 3 လိူၼ်ၼႆႉ မၼ်းၸၢႆးၶိုၼ်းပွၵ်ႈမႃး ယူႇႁိူၼ်းၶိုၼ်း မႃးတႄႇၼႃႈႁိူၼ်းယဝ်ႉ ဢွၵ်ႇယူႇႁင်းၵူၺ်းယဝ်ႉဢေႃႈ ၊ ၵွပ်ႈပိူဝ်ႈဝႃႈ မၼ်းတဵမ်ႁႃႈပီႊယဝ်ႉ ၶိုၼ်းပွၵ်ႈမႃးၶိုၼ်း လႄႈ ဢၼ်ၶဝ်မႃးၺွပ်းၵႂႃႇၶိုၼ်း ဢူႈမၼ်း ၸၢႆးၼႆႉ မၼ်းတေၵဵဝ်ႇလွင်ႈၼႆႉယူႇၶႃႈ ၊ ၵွပ်ႈဝႃႈ ၼႂ်းပိူင် RCSS ၶဝ်ၶိုၼ်းပိၼ်ႇဝႃႈ ဢမ်ႇမီးသိုၵ်း 5 ပီႊယဝ်ႉ ပဵၼ်သိုၵ်းလွၼ်ႉၵူၺ်းၼႆသေ လႅပ်ႈတေၶိုၼ်းမႃးႁွင်ႉဢူႈၶဝ်ၵႂႃႇၵူၺ်း ၊  ပွင်ႇဝႃႈ လႅၼ်ဢဝ်ဝႃႈသိုၵ်းႁႃႈပီႊၼႆ တဵမ်ႁႃႈပီႊယဝ်ႉၵေႃႈ ဢမ်ႇပၼ်ပေႃး ၶႂ်ႈဝႃႈၼၼ်ႉၵူၺ်း” ဝႃႈၼႆ ။

ပွတ်းထုင်ႉၼႆႉ ပၢင်တိုၵ်းယဵၼ်ၵႂႃႇယဝ်ႉၼႆသေတႃႉ တိုၵ်ႉမီးလွင်ႈ လွမ်လၵ်ႉငွႆးၵၼ်ယူႇ  ၽၢႆႇသိုၵ်း RCSS မီးၵူၼ်း 4/5 ၵေႃႉ လၵ်ႉမႃးယိုဝ်းႁဝ်းၶႃႈယဝ်ႉ ၶိုၼ်းလႅၼ်ႈ ၸိူဝ်းၼႆႉ တိုၵ်ႉမီးယူႇၼႆ ၽူႈမီးပုၼ်ႈၽွၼ်း SSPP/SSA  ဢၼ်တူင်ႉၼိုင် ထုင်ႉၼၼ်ႉ လၢတ်ႈၼင်ႇၼႆ ။