ပႃႇတီႇမႂ်ႇသုင်ၸိုင်ႈတႆး SSPP/SSA ႁူပ်ႉထူပ်းၵူၼ်းမိူင်းၼႂ်းပိုၼ်ႉတီႈ ဢိူင်ႇႁူဝ်ၶၢႆး  ၸေႈဝဵင်း မိူင်းၵိုင် ၸိုင်ႈတႆး ပွတ်းၸၢၼ်း သပ်းလႅင်းၼႄၵဵဝ်ႇၵပ်းငဝ်းလၢႆးပိုၼ်ႉတီႈ ဢၼ်ပဵၼ်ယူႇယၢမ်း လဵဝ် လႄႈ ငဝ်းလၢႆးၵၢၼ်သိုၵ်း ၵၢၼ်မိူင်း ဢၼ်လႆႈတူင်ႉၼိုင် ႁဵတ်းသၢင်ႈ ၸိူဝ်းၼႆႉ ဝႃႈၼႆ ။

မိူဝ်ႈဝၼ်းထီႉ 23-လိူၼ်ဢွၵ်ႊထူဝ်ႊပိူဝ်ႊ 2021 ယၢမ်း 11 မူင်း တေႃႇ 12 မူင်းၼၼ်ႉ ယူႇတီႈ ၽူႈယႂ်ႇၵူၼ်းလူင် ၽၢႆႇတပ်ႉၽၢႆႇဢုပ်ႉပိူင် ငဝ်ႈငုၼ်းပႃႇတီႇမႂ်ႇသုင်ၸိုင်ႈတႆး ဢွၼ်ႁူဝ်ႁူပ်ႉထူပ်း ၵူၼ်းမိူင်းၼႂ်းဢိူင်ႇႁူဝ်ၶၢႆး  ၸေႈဝဵင်းမိူင်းၵိုင် မွၵ်ႇလၢတ်ႈၶေႃႈၵႂၢမ်း ၵဵဝ်ႇၵပ်း ၵၢၼ်မိူင်း မိူင်းႁူမ်ႈ တုမ် ဢၼ်ပဵၼ်ယူႇမိူဝ်ႈလဵဝ် လႄႈ ငဝ်းလၢႆးၵၢၼ်သိုၵ်း တႆးတေႃႇတႆး လႆႈပိုတ်းယိုဝ်းၵၼ် ၊ လွင်ႈ ငဝ်းလၢႆးတၢင်းပဵၼ်ၶူဝ်ႊဝိသ်ႉ 19 ၊ ၵဵဝ်ႇလူၺ်ႈလွင်ႈမူႇပိူင် SSPP/SSA မီးၸိူင်ႉႁိုဝ် လႄႈ လွင်ႈၵၢၼ် ၶၢဝ်ႇငၢဝ်းၼိူဝ် Online ၸိူဝ်းၼႆႉ ႁႂ်ႈမေႃထတ်းသၢင်ၼပ်ႉသၢင်ႈလီလီ ၼႆ မွၵ်ႇလၢတ်ႈ သပ်းလႅင်း ၼႄၵူၼ်းမိူင်းၵႂႃႇ ဝႃႈၼႆ ။

ၸဝ်ႈၸၢမ်ႇဢွင်ႇ ၽူႈၶဝ်ႈပႃးၸဝ်ႈၼိုင်ႈလၢတ်ႈၼႄဝႃႈ – “ ၵွပ်ႈပိူဝ်ႈႁဝ်းၶႃႈ လႆႈမႃးတူင်ႉၼိုင်ၸိူဝ်း ၼႆႉသေ ၼင်ႇႁိုဝ်ၵူၼ်းမိူင်းႁဝ်းၶႃႈပေႃးတေႁူႉလွင်ႈပိူင်ဢုပ်ႉပိူင်ႇမုၵ်ႉၸုမ်းႁဝ်းၶႃႈ သဵၼ်ႈတၢင်း ၼႃႈၵၢၼ်ႁဝ်းၶႃႈ တူင်ႉၼိုင်ႁဵတ်းသၢင်ႈ၊  လွင်ႈငဝ်းလၢႆးၵၢၼ်မိူင်းမိူဝ်ႈလဵဝ် လႄႈ ၵၢၼ်သိုၵ်း တႆးတေႃႇတႆး ဢၼ်လႆႈပဵၼ်မႃးယူႇ ၸိူဝ်းၼႆႉ ယွၼ်ႉသင်ၵွပ်ႈသင်ၸိူင်ႉႁိုဝ်လႆႈပဵၼ်မႃး လႄႈ ၼင်ႇႁိုဝ်ပေႃႈမႄႈၵူၼ်းမိူင်းႁဝ်းၶႃႈ ပေႃးတေ ပွင်ႇၸႂ်ၼၼ်ႉ လႆႈသပ်းလႅင်းၼႄပၼ်ၵႂႃႇယူႇၶႃႈ ၊ လိူဝ်ၼၼ်ႉၵေႃႈ ပေႃႈမႄႈၵူၼ်းမိူင်း ၸိူဝ်းဢၼ် ပၢႆႈၵႂႃႇၸိူဝ်းၼၼ်ႉႁႂ်ႈၶိုၼ်းမႃးႁဵတ်းၵၢၼ်ၶိုၼ်း မိူၼ်ၵဝ်ႇ ၵႂႃႇလီလီ လႆႈယူႇ ဢမ်ႇမီးပၼ်ႁႃသင်ၸွမ်းၼင်ႇၼႃႈတီႈႁဝ်းၶႃႈၵုမ်းထိင်းလႆႈ ၸိူဝ်းၼၼ်ႉ ပေႃႈမႄႈ ၵူၼ်းမိူင်းႁဝ်းၶႃႈ မႃးယူႇၶိုၼ်းမိူၼ်ၵဝ်ႇလႆႈယူႇဢမ်ႇလူဝ်ႇၵူဝ်သင်  ” ဝႃႈၼႆ။

ၵူၼ်းမိူင်းဢၼ်မႃးၶိုၼ်ႈႁွတ်ႈ တေမီးမိူၼ်ၼင်ႇ ဝၢၼ်ႈလူင် ၊ ဝၢၼ်ႈၵွင်း ၊ ဝၢၼ်ႈၵၢတ်ႇ ၊ ဝၢၼ်ႈပႅၼ်ႇဝႅၼ်ႈ ၊ ဝၢၼ်ႈႁူၺ်ႈမူၼ်ႇ ၊  ႁႅင်းၵူၼ်းမီးယူႇ 200 ပၢႆၶိုၼ်ႈႁွတ်ႈၼႂ်းပၢင်ႁူပ်ႉထူပ်း ၵူၼ်းမိူင်းၵႂႃႇယူႇၼႆၶႃႈ ။

မိူဝ်ႈဝၼ်းထီႉ 24-လိူၼ်ဢွၵ်ႇထူဝ်ပိူဝ်ႊ 2021 ၼႆႉၵေႃႈ ယူႇတီႈ ၸွမ်ႁၢၼ် ၸၢႆးသႅင်ဢွၼ်ႁူဝ်သေ ႁူပ်ႉထူပ်းၵူၼ်းမိူင်း တီႈဝတ်ႉၵျွင်း ဝၢၼ်ႈမႂ်ႇႁူဝ်ၶၢႆး ၸေႈဝဵင်းမိူင်းၵိုင် မီးၵူၼ်းၶိုၼ်ႈႁွတ်ႈ 200 ပၢႆမိူၼ်ၵၼ် လႄႈ သပ်းလႅင်းၼႄၵႂႃႇ ၵဵဝ်ႇၵပ်း ၵၢၼ်မိူင်း ၊ ၵၢၼ်သိုၵ်း ၊ ၵၢၼ်ၶၢဝ်ႇငဝ်းၵူႈလွင်ႈ  ၸိူဝ်းၼႆႉဝႃႈၼႆ ။

ၵူၼ်းမိူင်းၵေႃႉၼိုင်ႈမွၵ်ႇၼႄတီႈၼႂ်းပၢင်ၵုမ်ၵဵဝ်ႇၵပ်းလူၺ်ႈ လွင်ႈၶဝ်ထုၵ်ႇလွၵ်ႈငိူတ်ႈၸိူဝ်းၼၼ်ႉ ဝႃႈ – ၵွပ်ႈလႆႈငိၼ်းၶေႃႈၵႂၢမ်းလွၵ်ႇငိူတ်ႈဝႃႈ ပေႃးသူဢမ်ႇပၢႆႈ ပေႃးသိုၵ်း SSPP/SSA ၶဝ်ၽႅဝ်မႃး ၼႆ ၶဝ်တေဢဝ်သူၵႂႃႇႁဵတ်းသိုၵ်း ပေႃးဢႃႇယူႉ 18 ၼႆၶဝ်ၺွပ်းၵႂႃႇႁဵတ်းသိုၵ်း လႄႈ ပေႃးပဵၼ် ၼၢင်းယိင်းၵေႃႈ ၶဝ်တေႁွင်ႉၵႂႃႇယဝ်ႉ ၼၢင်းယိင်းဢွၼ်ႇၸိူဝ်းၼႆႉ ၵၼ်ႉၸၼ်လူလၢႆပႅတ်ႈဝႃႈၼႆ လႄႈ ႁဝ်းၶႃႈၵေႃႈဢွၼ်ၵၼ်ၵူဝ် သေဢွၼ်ၵၼ်ပၢႆႈဢေႃႈ မိူဝ်ႈလဵဝ် ႁဝ်းၶႃႈလႆႈမႃးႁူပ်ႉထူပ်း လႄႈ လွင်ႈပိူၼ်ႈလၢတ်ႈ လႄႈ လၢႆးႁဵတ်းသၢင်ႈၼႆႉ မၼ်းဢမ်ႇမိူၼ်ၵၼ် လိူဝ်ၼၼ်ႉ တုၵ်ႉယွၼ်းဝႃႈ တပ်ႉသိုၵ်း SSPP/SSA ႁဝ်းၶႃႈ ယႃႇႁႂ်ႈလႆႈထွႆသိုၵ်းဢွၵ်ႇ လႄႈ ႁႂ်ႈလႆႈယူႇၸွမ်းၶဝ်ၵႂႃႇသေၵမ်းၼႆႉ ယူႇတီႈၵူၼ်းမိူင်း ၵေႃႉၼိုင်ႈ တၢင်ႇလၢတ်ႈတုၵ်းယွၼ်း ၼႂ်းပၢင်ၵုမ်ၵႂႃႇၼင်ႇၼႆ ။

ပႃႇတီႇမႂ်ႇသုင်ၸိုင်ႈတႆး ႁူပ်ႉထူပ်းပေႃႈမႄႈၵူၼ်းမိူင်းသေဢမ်ႇ ၵဵဝ်ႇၵပ်းလူၺ်ႈ ၵၢၼ်ၵေႃႇသၢင်ႈတွၼ်ႈလိၼ်ၶိုၼ်ႈတႃႇပေႃႈမႄႈၵူၼ်းမိူင်း ၼႂ်းထုင်ႉႁူဝ်ၶၢႆးၸိူဝ်းၼႆႉၵေႃႈ တႄႇၶပ်းႁႅၼ်းႁဵတ်းသၢင်ႈ သဵၼ်ႈတႃႈသၢႆတၢင်းပၼ်ၵူၼ်းမိူင်းဝႆႉယူႇဝႃႈၼႆ ။