SSPP/SSA 01.10.2021
By – SSPP Info
ဝၼ်းထီႉ 30 ဝၼ်း လိူၼ် September ပီႊ 2021 ၼီႊၼႆႉ ၶၢဝ်ႇVOT တႅမ်ႈဢွၵ်ႇၶၢဝ်ႇမႃးဝႃႈ ၵူၼ်းပၢႆႈၽေး ပွတ်းႁွင်ႇ ပွင်ႇထိုင်ပွတ်းၸၢၼ်းယဝ်ႉၼႆသေ မၢပ်ႇၽၢမ်းတႃၵူၼ်းမိူင်းဝႃႈ ၵူၼ်းၸိူဝ်းဢၼ်မႃးထိုင်ၸိူဝ်းၼႆႉ ပဵၼ်ၵူၼ်းပၢႆႈၽေး ဝႃႈၼႆ။
ၼႂ်းၶၢဝ်ႇၼၼ်ႉ တႅမ်ႈဝႆႉဝႃႈ ၵူၼ်းပၢႆႈၽေးဢၼ်ပၢႆႈမႃးယၢမ်းလဵဝ်ၼႆႉ လုၵ်ႉတီႈၸေႈဝဵင်းၵျွၵ်ႉမႄး ၸိူဝ်းပဵၼ် ဝၢၼ်ႈတေႃႉသၢင်ႇ၊ ပၢင်မၢၵ်ႇမိုဝ်း၊ ၶိုမ်းၵဝ်ႇ ႁူမ်ႈသဵၼ်ႈ(72)လင်၊ ႁူဝ်ၵူၼ်း(285)ၵေႃႉ ၸိူဝ်းၼႆႉ မႃးသွၼ်ႈယူႇ တီႈဝၢၼ်ႈလဝ်း၊ ဢိူင်ႇၵဵင်းၶမ်း၊ ၸေႈဝဵင်းၵုၼ်ႁဵင် ဝႃႈၼႆယူႇ ။
ၸွမ်းၼင်ႇလွင်ႈပိူင်ပဵၼ်တႄႉ ဢၼ်ယူႇတီႈ ၸုမ်းၶၢဝ်ႇႁဝ်းၶႃႈ လႆႈတွင်ႈထၢမ်ၵူၼ်းပိုၼ်ႉတီႈ ၵဵဝ်ႇၵပ်းလူၺ်ႈ ၵူၼ်းၸိူဝ်းဢၼ်ပၢႆႈမႃးၼႆႉ ၵမ်ႉၼမ်ပဵၼ်ပေႃႈမႄႈၵူၼ်းသိုၵ်း RCSS ၶႃႈဢေႃႈ ၊ ထုၵ်ႇၺႃး သိုၵ်း (RCSS)ၶျေႃးလႅၼ်ဝႃႈ တေတမ်းပၼ်တီႈယူႇ တီႈမိူင်းတႆး ပွတ်းၸၢၼ်း၊ တီႈၼၼ်ႈ တီႈယူႇလီ တီႈႁႃၵိၼ်ငၢႆႈသေ ၶျေႃးႁွင်ႉမႃး၊ ပိူင်လူင်မၼ်း ၵူဝ်ၵူၼ်းသိုၵ်းၶဝ် လၵ်ႉပၢႆႈ လႄႈ ႁွင်ႉ ၵုမ်းဝႆႉ ပေႃႈမႄႈၶဝ်ၸိူင်ႉၼၼ်ႉၵူၺ်းၶႃႈ၊ တီႈၵူၼ်းၸိူဝ်းဢၼ်(RCSS) ၶျေႃးႁွင်ႉ မႃးၼႆႉၵေႃႈ ၵမ်ႈၽွင်ႈၵေႃႈ ပဵၼ်ဝၢၼ်ႈၵူဝ်သေပၢႆႈၸုမ်း(RCSS)ဝႆႉၼႆ ၵူၼ်းပိုၼ်ႉ တီႈလၢတ်ႈၼႄၸုမ်းၶၢဝ်ႇ SSPP Info ၼင်ႇၼႆ။
မေႃႁွင်ႉၵႂၢမ်းၼၢင်းၶမ်းၼွင်ႉလႅင်းတေႉဝႃႈ “ ၶႃႈတေႉဢမ်ႇပႆႇလႆႈႁၼ်ၶဝ်ၶႃႈ ၵွပ်ႈဝႃႈၼႂ်းၵႃလိၼႆႉ Lock downဝႆႉလႄႈ ယင်းဢမ်ႇၸၢင်ႈဢွၵ်ႇဝဵင်းၼႆသေ- ၸၢႆးဢွၼ်ႇၶိူဝ်းလၢဝ်တေႉဝႃႈ မႃးတေႉယူႇ၊ ဢမ်ႇႁူႉဝႃႈ ၶဝ်လုၵ်ႉလႂ်မႃး၊ ႁဵတ်းႁိုဝ်သေမႃး လႆႈႁၼ်ဝႅၼ်တူၵ်းၵႃးပိုၵ်ႉပိုၵ်ႉပၢၵ်ႉပၢၵ်ႉၵူၺ်း ” ဝႃႈၼႆ ။
ၸုမ်း(RCSS)ၼႆႉ ပၢင်တိုၵ်းယင်းပႆႇပဵၼ် ပေႃးတဵၵ်းလိုပ်ႈၸႂ်ႉႁႂ်ႈၵူၼ်းမိူင်းပၢႆႈထႃႈယူႇ၊ ဢမ်ႇပၢႆႈ ဢမ်ႇလႆႈၼႆသေ ဢဝ်ၵူၼ်းမိူင်းပဵၼ်ၶိူင်ႈမိုဝ်းၶဝ်သေ ပေႃးၵူၼ်းမိူင်းပၢႆႈဢွၵ်ႇဝၢၼ်ႈယဝ်ႉ သမ်ႉ ၸုတ်ႇႁိူၼ်းၵူၼ်းမိူင်းပႅတ်ႈ တီႈၵူၼ်းၸိူဝ်းၶဝ် ဢမ်ႇပေႃးပဵၼ်ၸႂ်ၶဝ်ၸိူဝ်းၼၼ်ႉ မၢင်တီႈ ၸုတ်ႇပႃး ၵႃးၵူၼ်းမိူင်း၊ ၵၢင်မၢၵ်ႇဝႆႉ ၸွမ်းသဵၼ်ႈတၢင်းၵူၼ်းမိူင်းမႃး ႁဵတ်းႁႆႈႁဵတ်းသူၼ် လႄႈ ပေႃး ယဝ်ႉ ၼေးသႂ်ႇ(SSPP)ၼၼ်ႉ တိုၼ်းပဵၼ်လွၵ်းလၢႆးလဵၼ်ႈၶဝ်ယဝ်ႉၼႆႉ ၵူၼ်းပိုၼ်ႉတီႈဝၢၼ်ႈႁူးၵွတ်ႈ ၵေႃႉၼိုင်ႈ လၢတ်ႈၼႄထႅင်ႈၼင်ႇၼႆ ။
